ياوجودي على اللي مركبه شف بالي=اشهبٍ فوق بابه مثل كف العروسه
جيب شاصي من التايوت من نوع تالي=آه ياليت عندي يابو تركي فلوسه
حالفٍ لدفعه بالجيب والعمر بالي=مركبه طب قلبي لاتدانت هجوسه
لاسرى بارق بالليل شرقٍ شمالي=وحددولي مخيله يم حروة طعوسه
عقب ماعله الوسمي بعدة ليالي=ابذرت واخضرت والعشب جونا عسوسه
قيل شامة مغيلث مثل لون الزوالي=وحمصيص القعوره تو طلعت جروسه
قلت بالله حطو عزبتي مع دلالي=ناويٍ ديرةٍ قفرٍ ماهي بمعيوسه
ياحلو شبتي للنار في دو خالي=ثم سويت فنجالٍ يطيّر عموسه