لاتسمعون الشايعة والدعايه = ضعف العقول تسقط الرجل تسقيط
والعقل نور وعلم ماهو روايه =وإلا الجهل ظلم وظلامٍ بك أمحيط
قدّام وجهك دار لك به بنايه= وسود الليالي تمرط العمر تمريط
وكثر التجارب علم لو به شقايه= وخبرات كبر السن ماهي خرابيط
سم الشتاء مره ودافي غطايه =والناس ببرد الشبط بلحفه مغاطيط
كم شايب يسهر خلاه أبخلايه= تقل الشناذر يلعط العين تلعيط
ويسمع ويترك كم سايه وسايه= من اللي يلقط ناقص الحكي تلقيط
مريض نفس له مآرب وغايه = يضحك بوجهك والخفايا ملاقيط
فجوجه وساع عن ردي الحكايه= خلّه مهف أمقيط ومن رافق أمقيط
ما رافقه وعقلي سليمٍ معايه = وظيم الرجال يشعط القلب تشعيط
من تاه وقت الظهر فاخت خطايه= عقلي براسي وكل خيط لها خيط
رحابه وساع ماعليها حمايه = نقطع فجوج أديار رمله مزاقيط
من دش للميدان يلقى الرمايه= بطراف شبكه فارغات المخابيط
والحق عدل ونور ماهو أهوايه = وأحذر تفرط بصاحب العرف تفريط
ومن لاخذا من الوقت علم ودرايه= ما مرقب إلا مرقبينه نواطيط
تمشي برايك والخلايق برايه= وشوك الكتاد يبطط الرجل تبطيط
من تاه عن طرق السنع والهدايه = روابيٍ تشيله والأخرى مهابيط
وطرق الرجوله واضحات البدايه = ومن لا صبر يصطه الوقت تسطيط
لا تنشحن وتقول أنا من عنايه = ترالقدربك حاط ومحيط ويحيط
العين ترمد والجوق هو عمايه = من ما جرى وتدبير الأيام تشطيط
قبلي مشت ناس وناسٍ ورايه = من عرض خلق الله رحيل أومحاطيط
وربعك عضودك والولاية ولايه =ولابيت إلا يربطنّه مرابيط
والعلم نور والتجارب كفايه = والهندسه رسم ومقاسٍ وتخطيط
قلت الحقيقه والخواتم نهايه = واللي زعل يبلط الموج تبليط