انا كلامي للحشام محشومي= ولا انت جبت الكارثه والعذاريب
حطيت في عينك قوي الهزومي= وعرضتها للفاهمين الشواذيب
ياما نصحتك عن طخاف الغيومي=وياما نصحتك عن رماد المشاهيب
قلت الكلام اليافعي مايدومي=وقلت انتبه من طين عكر المغاريب
لكن اضنك ياخزام مخزومي= ومحتار بين العايله والمعازيب
واصبحت في تيار سيلٍ دمومي=وضيّعت طيرك في قوي الملاهيب
واشتلتها بأمر العفون الرخومي= وغديت لعبه بين كل اللواعيب
اللي تعطر بالعرام الخشومي= وتضرب بعدلات القناء والمشاعيب
والهم على الشاعر كثير الحلومي= هوجٍ تخلي لحيتك كلها شيب
لكن غيّر نظرتك يالظلومي =وخلك صريح وجنب الظلم تجنيب
واحذر تحصل من خصومك سهومي= قافٍ تغني به جميع المراكيب
خلك على ماقيل حرٍ خدومي=مالك ومال الساذجين الزواريب
وانهج مناهيج الحصان العزومي= وارد العدود ام الدحم مارد الذيب
وأخذ التجارب من كبار القرومي= اللي لهم منهاج في ساحت الطيب
وصل الصلاة وقبل حجتك صومي=واد الزكاة وهذب النفس تهذيب