مبطي عن حروف الشعر والقصايد=عن مجلسي عن راحتي عن عويني
مبطي عن الشيلات هي والنشايد=مبطي عن احساس الغرام وكنيني
مبطي ولا هي لي من اول عوايد=ماني بمتعود اخفي حنيني
واليوم جيت ولي حروف(ن)جدايد=بعني بها منهو ابيه ويبيني
الوقت ما يرحم على طول كايد=والحزن شفته من عطايا سنيني
والعمر ما تكفي سنينه بدايد=ياسرعها تركض ولا تحتريني
والحب ما منه يروحي فوايد=ياخذ ولايعطي ولا يحتويني
والبعد لا قل الوصل صار زايد=درب المفارق له زمان(ن)وحيني
واشياء واجد كنها بي قلايد=تجارب(ن)يبقى صداها رهيني
ونار الوله شبت بصدري وقايد=ليتك تجين من الالم تستريني
ليتك وليت لماضي الحب عايد=شين وفات وراح وينه و ويني
هذا البخت حظي وما كان جايد=هي قسمتي راضي وكلي يقيني
نادر وراكان وفهد زيد رايد=ماشافو اللي شفت وا شيب عيني
ومدام تحكمنا سلوم وعوايد=بعيش في ذكرى الغلاء واذكريني
كثر الامل مذبوح والياس سايد=وانتي ولا ادري كانك بتنطريني
هذا جديدي يا عيون القصايد=فالبعد احبك فالغياب اعذريني