تقدر تقول ان الغلى سبة اعجاب=وتقدر تقول ان المحبه مذله
الحب لغز الكون مجهول الاسباب=لغزٍ جميع الناس عجزت تحلًه
يللي سلبتيني بتذبيل الاهداب=انا فدى ذيك الرموش المظله
ما كنت اظن اللي للالباب نهاب=يسلب حشاك وفوق ذا سامحٍ له
يبرق ويرعد والمطر خارج الباب=وانا رجيته غيمةٍ مستهله
غروٍ غرير يبهذل القلب سلاب=بنى له بوسط المعاليق فله
نصفه من الديره ونصفه من اجناب=يخطي وانا مستانس ومرخصٍ له
لا جا يهرج بلهجتي صار مرتاب=ولا جيت اعدل لهجته قلت خلًه
واليا ابتسم بان الحلى بابيض الناب=وليا همس خلٍ تلاقى بخله
ما يعرف الغيره ولا يبدي عتاب=واثق كاني واحدٍ من هلٍ له
غلاه زار القلب واهداه ترحاب =اموت لا شفته لقلبي يتله
حلو اللعس يا ليتنا نصبح اقراب=ما دام قلبي سلمك كل كله