ياوجودي وجد مطعون الرماح = من شطير قص شريان العروق
حده المرهوف وزود به أجراح= وكل جسمه غاديٍ قربة شقوق
طاح بالميدان مع وقت الصباح= بوجه قوم والزّعل كض الحلوق
مطالب بحقوق والنّجدة نياح = والهنادي مثل شعشاع البروق
يوم طاح وعرفه الديان صاح = بالمثارا وين طلاب الحقوق
قوةٍ رموه والشجاع طاح= أدبروا ربعه وخلوه أمعيوق
ماحصل له ينهزم ولامن سماح = حولوا به من على سرج الطفوق
جندلوه بساعةٍ مابه فساح = طاح غلب والنفس معه أمخنوق
من صغير كن خدّه برق لاح = يا أشتعل بالليل ولا بغيمه أفتوق
مظلم والمزن تحداه الرياح = المهب من شرق والمنشى يسوق
ياعيون موحش ظف الجناح = ماولف للناس ومن طبعه نزوق
أشقر ياطالع الأزوال زاح = واحش متوحشٍ مابه أسبوق
يوم مر الزين فاح الطيب فاح = عنبر من الهند مالحقه حروق
أبتهرت وحرت والنّظرة ذباح = عنق عنز ذيرت رتع الفروق
أستذارت وأجفلت وأرضه بياح = ماتطب المنخفض وأرض النسوق
وين طرّاد الهوا يأبو فلاح = مايريض كل عمهوجٍ عشوق
أتمنى وقت يامشكاي راح = لو يعود ونشتري في كل سوق
فارسٍ له خبرت برمي الوشاح = لو يهج الريم يعرف له أطروق
قانصٍ إذا طلع وإلاّ أستضاح = صاد عنز الريم لوأنه سبوق
لو تذيّر مع صحاصيحٍ أصحاح = أخر المشوار يلحقها لحوق
صايده وقت الضحى وإلاّ الرواح = مع غروب الشمس وإلاّ بالشروق
يسقي الهويان من نبعٍ قراح = وحامض الليمون من كاسه يذوق
الهوى وطرد الهوى قبلي مباح = يازبون الحرد يارصن بضوق
كم طردهن قبلنا طير الفلاح= وتبعوهن وتعبوا والطرق جوق
لكن هذا الوقت رمينا السلاح = مسلمين مقضبه كل أمعشوق
أنتهى الكلام وختمت المزاح = ياعسى ماقلت للقار ي يلوق