دار الغرام ولف بالقلب لافوف = لاع الولع قلبي وحالي صرمها
أنا ذهيلن من هوا البيض مشفوف= سيف الهوا بالحال يلحا لحمها
القلب رفرف وانعثر غر بصدوف= والروح فوح الجوح يلفح فحمها
جسر الغرام برامعي زل بزهوف= نزغ الزغازغ زلزله عن قدمها
ماني بكف العذل عني بمعروف = لا تبحثه بالله يقبس لغمها
الله خلق ناس ٍ بناس ٍ لها نوف= والشمس ماتخفا العرب من عجمها
كاس الهوا بألباب الأشباب مذروف= من ذاق رشف شفاه يفرق طعمها
لولا الهوا مارشرش الريم بخشوف= الناس نسناس الهوا هو نجمها
خشفن عفر فارع ضفر عشرمكشوف = تل القلوب وسلها إستلمها
رعبوب راعب كاعبن طرب غطروف= عمهوج داعج لاعجن عاج فمها
تمشي تهز الخصر تنعاج بعطوف = مال الهوا به مال عوذا كصمها
بعيونها رايات وآيات وحروف = ترمي هل الغايات سم ن سهمها
مادار دوّر نهدها نز بوقوف = نشوّن نشا مانيش مشمش حرمها
عفرا برا طرز الطرا صدر وروف = طرخم طخم طخم الطراخم طخمها
شربت شذا شذر الهوا كمع وكفوف = من طاح بتفاحه حرق وحمها
تلعا فتا ترس الفتاتير بتروف = تتل ردف ن ينثني تو تممها
كن البرد فيمَه ورا الجمر مصفوف = وخدود به موجات جمرن زحمها
تكسف وجيه البيض ياجاه بكسوف = ياطب جملات العذارا خزمها
ياناس خلوني أشوفه وأبا حوف = لاموت فوت وناضري مافهمها
رد النضر زين التعاجيب بهنوف = قالت سنا نار الهوا من كهمها
حنا عريبات شريفات وعفوف = جواهرن بالسَلط دونه خدمها
رديت يكفي بالنضر كل ماشوف = النفس يفرَّق عزها من كرمها
ياجرح قلب المبتلا فيك مكلوف = إرفق ترا روحي تقطَع وذمها
إرحم طريحن بين أياديك مكتوف = سلم العرب من سالمه في لزمها