ياصاحبي اقر الرسالة لياجتك=اقره ولو مره على اقل تقدير
ولياقريته خذ قرارك براحتك=مضمونها ياصاحبي شور ومشير
اما انها على بعض شي دلتك=وإلا انت طيّرها بهبوب المعاصير
كانك تبي مع الجماعة معزتك=ويصير قدرك عندهم كنك امير
احرص على حضور جمعا جماعتك=لاتحاول تبرر لنفسك معاذير
ترى حضورك بين ربعك وجيتك=يحط لك بين الرجاجيل تقدير
ومهما يكن تعاملك مع معرفتك=اعلم ترى ربعك لهم حالةٍ غير
ربعك ليامن الليالي تحدتك=تراهم سنادك بوقت المعاسير
ان طعتني لاتطيع نفسك ليا اغوتك=تراك تلقى بعد عصيانها خير
وانكان نفسك في بعض شي زغوتك=تعال خذ مني (بـ بيتين) تعبير
الاولة. اعرف مع الناس حضرتك =تراك لا (عنتر ولا (سالم الزير)
والثانية. يلزمك تعرف نهايتك=مكانك اللي جهزوه الحوافير
ويارب غفرانك وعفوك ورحمتك=واجعل لنا في كل ضيقٍ تياسير