قال الشمالي يعتزي بالقبيله=وقول الشمالي علم يفهم ومعلوم
من لاتعب للطيبه والجزيله=ملزوم يسقط والهزيله له رخوم
راسي علي امتون عزي تشيله=الله خلقني حر والحر له زوم
ماني من اللي يجلبون الفشيله=ربعي هل الردات لمواجه القوم
اهديب شايل للحمول الثقيله=من عادته شيال حملٍ وزيزوم
ربعي طنايا كاسبين النفيله=عدونا نسقيه مرٍ ومسموم
للعز نرقاء ماندور بديله=روس المعالي نزلنا دايم الدوم
لاكبرت القالات حنا كفيله=باللحق حنا وطالب العق مهزوم
وياسعد عينٍ لالفتنا دخيله=عند الهيافا تهتني في حلا النوم
العمر يفنى والليالي طويله=وماقره المولى على العبد مقسوم
كلٍ على ماقال عقله دليله=وكلٍ على ماقيل يصبر على اللوم
من لاكسب للعاليه والجليله=يموت عايش بين الأجواد مهضوم
والقول يعرف جازله من هزيله=وكل العرب عنده تقاليد وسلوم
والنعم بالأجواد عن كل ميله=الحق بين والقبايل به قروم
وصلاة ربي عد وابل هميله=على الرسول اعداد ماتنشي غيوم