قال من لا قال ..ما دقّر بتالي كلامه=يختصر طول الحكي..ماهو براعي طويله
يتبع قول المثل..اربط حزام الكرامه=ولا تدنق لايّ شيٍ ..على الدرب وتشيله
ماعرفنا للبشر.. تالي الوقت ونظامه=كل ما نركد قمز ..من يدور عن فشيله
شفتوا اللي غاطسٍ في صناديق القمامه؟=يلقط القرطاس او ينثر امجاد القبيله!!
لابسٍ دسّه تقل.. من صقاقير المنامه=والزباله ممتلي.. منّها حتى شليله
كان تبغى الشور لو طعتني.. شيل العمامه=واجدع ثيابك ترى.. البدله احلى مع فنيله
وحطلك معزل مثل.. معزل اصحاب الاقامه=كان قلنا عاملٍ.. هج واقفى عن كفيله
ما آتشمت لكن الرجل.. لا يرخص مقامه=ينتقص قدر الرجل.. لا اقتنع بأيت هزيله
الطمع لابو الطمع.. ما تجي منّه سلامه=خايفٍ باكر طمع.. هالبشر يآصل خليله
خايف العربان يكثر.. على (****)ملامه=عقب ماهي مضرب.. لكل افعالٍ جزيله
طيعني يا جامع المال.. من جمع القمامه=واجد الارزاق بس ..شوفلك شغله بديله
كافلٍ رزقك ترى.. من كفل رزق الحمامه=وراس مال الرجل لا مات يذكر بالجميله