طلبت عين الشمس عود ٍ من الضي=في حلكة الظلماء يولع سراجي
قالت لي ابشر ثم غابت عن الحي=وانا لعين الشمس مازلت راجي
لا مر عام ٍ قلت ابنتظره شوي=ياعل صبري ينتهي بانفراجي
عشرين عام انطر ولا شفت انا شي=غير الظلام وحيرتي واحتياجي
عشرين عام ومهجتي جرحها ني=اكابد الحسرات شربي هماجي
الناس قالت وش لك بطرد مقفي=ماطعتهم واليوم صعب ٍ خراجي
حكّمت قلبي واثري القلب مخطي=الفوت فات ولا يفيد احتجاجي
حفرت قبري ياهل العرف بيدي=يوم اتبع المقفي لموت ٍ مفاجي
رحت ابعالج قالوا الجرح مبطي=العالم الله كانك انسان ناجي
وبدأ يبيع الياس فيني ويشري=وضاقت بعيني واسعات الفجاجي
وجيت ابقوم وعّيت الرجل تمشي=كني سجين ٍ حال دونه سياجي
وامسى نديمي كسرة سراج مطفي=لا ليلي انصفني ولا الصبح باجي
عزاه من خل ٍ ذبحني وانا حي=سكناي الارض وهو سكن برج عاجي
حسيبك الله كانك اسرفت بالغيّ=كيف العزيز يصير برضاك لاجي
ياما دعيتك ريم وخشيف وظبي=ولاهقيت انك تعكّر مزاجي
تركتني في قاعة البير مرمي=ولعبت بي لعب الطفل بالعياجي
اخر علاج العله الخافيه كي=كويتني واخفيت عني علاجي