بعض الاوادم رفقته شرك في شـرك=يجيـب نوبـاً بالرفيـق المطـمـه
نوباً على بعض المعانـي يدهـورك=يجيب لك مـن كـل صوبـاً مذمـه
لو تعتذر مـاعـاد يقـبـل مـعـاذرك=نوبـه ونوبـه والحـيـا مايهـمـه
على هدف مصلوح نفسـه يعاشـرك=ومن الحيا مسلـوب وجهـه ودمـه
لا تقـدر اللـي باللـزم مايـقـدرك=نصيحتـي ياسامعـن وانـت سمـه
بعض المواجع نوب تسطي وتسهرك=مثل الجريح وريـح الاطيـاب شمـه
مال المعاضب من علاجاً سوا التـرك=جنـب عنـه مـادام راسـه بكمـه
ارحـل وفـارق ديرتـه لا يقاصـرك=يلقـاء علـى طبعـه حليفـاً يضمـه
وراع الردى لوطبت به كـود ينكـرك=مايقدر المعـروف مـثـل الجعـمـه
ساس الردى من عرق الاقصين سامرك=من عند ابوه وعـرق خالـه وعمـه
ياللعجب ناساً على الشيـن تجبـرك=اللي علـى مسمـا اللعانـه تسمـه
لوهي على كيفـه تهينـك وتدمـرك=ناسـاً بريهـاج الـردى مستحـمـه
مابين قيل وقـال والهـذر والكـرك=عروق النجاسه فـي حشاهـم تنمـه
النـاس لو جنبـت شـره تنـحـرك=يلحق على صبـرك خطـات الجلمـه
عليـك بالـلي بالصراحـه يباشـرك=واترك عنّك بعض الهلـوس المرمـه
وعليـك باللي بالصراحـه يباشـرك=لامـن وعـد يافـي وهرجـه يتمـه
وعليـك باللي بالصراحـه يباشـرك=ماجـاب منـه عبيـد وسعيـد نمـه
رجلاً على صعود المعالـي يناصـرك=حكيـم عـرف وبالمواقيـف قمـه
دايم على منهج هل الطيـب يامـرك=لو انت بيبـان الـردى مانـت يمـه
يحافظ على دينـه وبالخير يذكـرك=في طاعـة الرحمـن نفسـه ملمـه