ايه ابدوي وافخر وربعي عزيزين = وتاريخنــا منحوت فــي كــل ديــره
حنا هل الشيمات والصدق والدين = وحنا هل الناموس واصحاب غيـره
اهل الادب والمجد والمنطق الزين = نمــوت من دون الشـرف والقصيره
وألفــاظنا ياصاح مسك ورياحيـن = ولهجـــات اهلنــا ماش فيـها معيـره
وكلمة بعد حيي تداول من اسنين = ماهي نشـــاز انقــولها بكل ســـــيره
مانقولـــها الا للــربوع العزيزين = من نبض قلب انسان صافي ضميره
نقــولها في كل موقف فــخورين =ماهي جـــديده يالوجيــــه الســـفيره
حــنا نوايانا سليـــمه من الشين = ماهي على ظنك وشكك .؟؟ خـطيـره
وبنقولها باكـر وعقبه وهالحين = ولاهمنــا منــقود ســمرا وســــميره
وان عــودت للطـــيب حنا غنيين =ويا كثـــر ما بالكــون زينيــن جيـره
لكن انا بنصحك نصــح الوفييـن = فكـــر ابدربــك زيــن قبل ان تســيره
وفر نصيحك وارســله للغشيمين = وانا اعنــي اللي تاه وافـخت مسـيره
ايـه , بدوي ولادرست القوانيـن = لكـــن تعلمتــــــه ابـعرف العشـــيره
تجري بنا الشيمات مجراالشرايين = ما دام روحـــي ما لفـــــاها مــصيره
هذا الوكاد ولاذكــرناه تخمــــــين = ونعلن بها للناس ماهــي ســـــريـره
نحفظ مبـادينا على العسـر واللين = ونصبـــر ولاكـــن مانتحمـل كثيــــره
كل شي ؟ ولا التجريح لنا شريفين = ما نــرتضي به لو تــطول الجـــريره
ورثً عن الاجداد ماهيب ذا الحين = جـدودً حمــوها بالســيوف الشـطيره
تاجـــد لهم في كل ديره عناوين =مـن شــامهــا لبـغداد لارض الجــزيره
تعوذ من ابليس وانحا الشـياطين =ان كان تبـغــــى تســتمر المســــــيره