هيضت ما كنيت وابديت ما اخفيت=ولانمت انا سايلت حالـي لحالـي
ولانمت انا عقب الهرم ثم سجيـت=الاربعـه بالحلـم كلـن لفـالـي
ياليتنـي قيلـت معهـم ولاجيـت=ولاشفت تقطيعـه محمـد قبالـي
متعب ولد بنتي لشوفـه تشافيـت=ولاأبطيت ما جيته هو اللي عنالـي
ومشعل يداوي الجرح لو ماتداويت=ولاشفت زوله ورد المـاء حبالـي
وطلال ينجيلي وانا لـه تناجيـت=عز الله انه من نضايـض حلالـي
وعز الله اني بالعهد مـا ترديـت=مار ان جاء بوق العهد من عيالي
وعز الله اني للمراجـل تقصيـت=مع نسل عبدالله مـن اول وتالـي
محمد عقيم باللقاء حصل الصيـت=وحاش المراجل دقهـا والجلالـي
وسبهان زكاله جميـع العفاريـت=هل الجبل واللي بـروس العوالـي
وجاه ابن أخوه ومثل ماصار سويت=وعز الله اني نعم ضيـف عنالـي
المسجد اللي به على ابوي صليت=واليـاذن المـذن نحرتـه لحالـي
والله يلـولا عورتيـن فـلا جيـت=موضي وبنت العم مالـه رجالـي
عطيتهن عهد اليا صبحت ومسيت=انـي لكـن مثل الغديـر الزلالـي
مار ماينفعن كثر المنى لو تمنيـت=ولاينغـرف دم صفـق بالسهالـي
شمر بني عمـي وعنهـم تلزيـت=واقفيت عن نجد وانا بـه شفالـي
اقفيت يادار الخطاء عنك والويـت=مثل البعير اللي مصيبـه جفالـي
سلطان لاتغريـك دنيـاك ياشيـت=الشمس لو زانت وراها ظلالـي
سلطان ورث الميت مثلك غدا ميت=الليلـه الظلمـاء سببهـا عيالـي
جاني منك خط تقل ريـح كبريـت=تواعدوا بأخـذه جـرود الزوالـي
ميزاك فرس محمد طايل الصيـت=او فرس ابو متعب محازم رجالي
لو لك ركاب مثلهن كـان فزيـت=تغزي عليهن شـرق وألا شمالـي
سلط على سلطان وسعود وسبيـت=ومن جورهم فارقت انا كل غالـي
وصلاة ربي عد مـازاروا البيـت=علـى النبـي محمـد بالكمـالـي