من دون يابن منيس كرت وعزيمه=اجي لكم وافرح لكم يالقرابه
حيثٍ لكم عندي معزه وقيمه =وطول المسافه يابعدي مانهابه
ندعي عسى الافراح ربي يديمه=يابوجمال افراحكم يعتنا به
وانتم سندنا بالعصور القديمه=وانتم لنا ياكشر الوقت نابه
اجي واشارك والمعزه مقيمه=يكفيني القى من جنابك رحابه
ومن يعتذر بالكرت ظني هليمه=والناس تعرف مين حضرت جنابه
لاشك اباستثني اخاف الظليمه=الكرت للتبليغ ماينحكى به
وشمر تراها بالتراحم عظيمه=شمر سنام العز كل يهابه
شمر يديهم دوم دايم كريمه=فيهم سخا فيهم طنا يعتزا به
واللي جحد مافيه نخوه وشيمه=ومن يجحد التاريخ شمر عذابه
شمر ثلاثه يستظلو بخيمه=الاسم شمر والثلاثه زهابه
واليوم جيت وشوف وجهك غنيمه=وافخر بكل اللي جمعنا اللقا به
وانا عويد نسل ذاك الصكيمه=اللي انغلث بالسيف وقت الحرابه
واختامها يااهل العقول الحكيمه=مية هلا باقولها بالنيابه