يالله من فضلك طلبنا التساهيل=سهل لمن باسمك بيوته بداها
اتعب لها الافكار واسهر لها الليل=وابعد مسافة جودها عن رداها
انقا لها من جوهر القال والقيل=والجوهره ماكل شاعر لقاها
ونكان ماهي مثل كيف المعاميل=مااسوقها لقومن عزيزه الحاها
وحنا الى جونا الرجال المشاكيل=نفرح بجيتها ونوفي قراها
يامرحبا وانتم علينا مقابيل=ترحيبتن بالضيف طيب نباها
معطره بالعود والبن والهيل=والعنبر اللي غاليا مشتراها
وعندي حلاة الشعر مدح الرجاجيل=اللي من النوماس ربي عطاها
احفاد وايل تتعب الهجن والخيل=بالسيف تاخذ حقها من عداها
ماكنها الا الباسقات على النيل=الاصل ثابت والفروع بسماها
تطاولت هاماتهم نجمة اسهيل=ومع النجوم العاليه مستواها
احفاد وايل يالرجال الحلاحيل=مثل الجبال اللي يذري ذراها
اهل السيوف المرهفات المصاقيل=اللي تذود المخطيه عن حماها
اهل الكرم والجود ذباحة الحيل=وتشيل من حمل الخوي واقصراها
زمل الحمول اللي تشيل المثاقيل=اللي توثقها عليها عراها
توارثون المجد جيل بعد جيل=قومن تعدابه وقومن وراها
امجادكم ما اعدها بالتفاصيل=ولحدن من الشعار قبلي حصاها
في معركة ذي قار جبتم محاصيل=والمنذريه في حماكم رجاها
جتكم دخيله تشكي الظلم والويل=وانتم بعون الله رفعتم عناها
وحنابلي عاداتنا نوفي الكيل=بلي بلي واقولها واتباها
في قونا نارد الجم المناهيل=وتطلع بدود ادلينا في ملاها
وصلاة ربي عد وبل الهماليل=علي النبي ماهلت الغر ماها