ايه بدوي والبدو فيهم رجاجيل=نبع الاصاله شيحها مع نفلها
ايه بدوي لا تحط بالهرج وتشيل=ثمّن خطايا كلمتك واختزلها
اصلي شمالي ما ابي اي تأصيل=يكفيك في حايل علامة جبلها
الشمري عدّا على هامة سهيل=في منزله ما غيره احدٍ نزلها
من غير قاصر بالقبايل وتقليل=لا بد مالديره تصوّت لاهلها
مالي ومال الحاضره والمواويل=مالي بها حاجه ولاتبع مللها
آله على خوّة رجال ٍ مشاكيل=اللّي خواطرهم على الطيب ولها
في خايع ٍ والكيف ،، نار ومعاميل=فنجالها شوق النشامى عملها
شمال من عذفا بهاكالمداهيل=شرق الرعن فرق الجلد عن سهلها
تطرق نظرك ولا تبي مد دربيل=جوّك ربيع ومخضر القاع يلها
مع غيمة ٍ تمشي لها شوي وتميل=بامر الولي قام يتنثّر هللها
لوحة خيال ولا تبي اي تشكيل=جول ٍ من الكدري مخالط حجلها
هذا اثر ارنب على مدرج السيل=وهذي حبارى والجرودي نتلها
وهذاك ذود ٍ فيه لمّة مخاليل=لا سمعت التدويه يرزم فحلها
هذي مناتي والاماني تخاييل=ابعد عن الديره وزحمة فللها
ملّيت من سيف البحر والبهاذيل=حدّتني الدنيا وانا باحتملها
يارب سهّل وضع الاجواد تسهيل=وعسى الليال السود تبرى عللها