الكــــون دلّى يلتطم مثل الامـــــــواج =وانا وحيــدٍ والقصيــده شــــــــراعي
ألقى بهــا من قســوَة الوقت مخــراج = واســجّ في كل الفجـــاج الوســـــــاعِ
والقى بهـا عـونٍ على النّـفس وعلاج = وان ضِقت اغنّيهاوتِطْرِب سمـــاعي
وآخِـذ بهـا بالليـل مســرى ومعـــراج = واطيـــرْ من فوق النّـجوم ارتفـــــاعِ
شَــرَعْت بافكـار القصيـده والانتـــاج = وانبَـحّ صوتي واستِـثـََرْت اليـــــراعِ
كتبت بالاوراق مـــزجٍ من الــــــزّاج = واوجَــزْت فيها غايــة المستطـــــاعِ
وهــاضَتْ معانيها تقِـل فوج حِجّــاج = بديت باوّلــــها وجت لك تبـــــــــاعِ
كلّـــه علَي، قصّـه وحبـكه ومونتــاج= ويحتاج للفزعــه قليــل المســــاعي!
والشِّـــــعر ميداني وممنوع الاحراج= ورثٍ قديــــمٍ وارثه من رضــــاعي
ونويت احطّ الصــاج والباقي افـــراج= وحيـلة ضعيف الحيل كِثْـرالمـداعي
مزحات بين احباب مع ضحكةاحجاج = وإِزعال عبدالله مهو من طبــــاعي
ولايفتح الملــعب ولو كان محتـــــــاج = من يشتكي من ضعف خط الدفــاعِ
يااهل العـــراق انا لكم دوم(حجّـــــاج) = و(الشّعرَه إيّـاها) بدَتْ بانقطـــــــاعِ
ياصــاحبي واحذر من الهرْش لاهاج = يااللي تبسّـــم لاتحــاول خــــــداعي
تـَـرا الوضـوح سراج والحق مفـلاج = والاّ التّخفّي من طبوع الافـــــــاعي
ياصاحبي ياشــوق من تــاخذ البـــاج = على البْنِي،بنت الكريــم الشجـــــاعِ
طبّــت بحفل العرس في صالة(التّـاج) = تقــول للميــدان: هـــذا بتـــــــــاعي
منبوزة الردفيـن هيـــفاء ومغنـــــــاج = ترضيــك غنج وتـزعلَك بامتنـــاعِ
تضحك ببيضٍ كنّهن عــــــاج وثلاج = واكبر عذاريـــبه عيــونه وســــاعِ
ياخوي ياحُبّ البنــــادم للازعــــــاج = ماادري يابو نوّاف ويش الــدواعي
متكفّـــلٍ باحوال غيــره وهــــــــرّاج = تقِـل جليس ٍلك ابباص (الجمــاعي)
لوبِعْت حاجـه قال شوفــوه محتـــاج = ولو تشتـري تيـــس ٍيسمّيــك راعي
يالله يامديـــر الكواكب والابـــــــراج = ياللي لك الحجّـاج طايف وسـاعي
تِنْزِل لنا غيـــثٍ مغيــثٍ وثجّـــــــــاج= يِستَـرّ به راع الغنــم والزراعــي
سحابةٍ من حَـدّ عــرعر للافــــــــلاج = تشبــع بها كل البطـون الجيــاعي
ويزين مقناص الحبـــــاري(والادلاج)= ياللي تلومن لاتصيـر(اندفـــاعي)
يا ماحلا من عقب ريغــــا وبطنــــاج = شوف النّـفود وِزين مشي الوقـاعِ
وجيبك جديدٍ وارضك شعاف وهبـاج = هذا هـــواي وعـــاذلي مايطــــاعِ
وحِــسّ امّ سالم يبهج الخاطر ابهـــاج= كان أطربَكْ يا القرم ديكٍ يعــاعي
ورعيّـــةٍ خلفــاتها تخلــِج اخــــــلاج = وطِـلْيَ الربيع امشنكَـــرٍ بالكـراعِ
ولاّ انت دونَــك حِــطّ ضبّـه ومزلاج = بالبيــت حتّى لايطــول النّــــزاعِ
فنجــال، والشّــاهي مذاكيـر حــــوّاج = ولبن بقَـرْ والزّبـْد قشطة مـراعي
وخلّك من(الرّدهه) ليا ســـوق(دوّاج) = واقصى مداهيلك شعيب الرفـاعي