ذكراك يا عذب اللمى تـسجن الليل= ما للصباح طلوع شَمسه توارى
سَطْوة هواك تعذب القلب بالحيل=واقوى سلاطين القلوب العذارى
اللّيّ بهِن تسلب عقول الرجاجيل= عشّاقهن من دون خمرٍ سكارى
ساعات .. كانَ اللّيل كلّه تعاليل= ما يقطَعَه يا كُودْ ضَيّ النهارا
شفَاتكْ اعذب حيل من ميّة النيل=والوَجه مثل البدر كان استدارا
مشْيتْك من زود التغنّج بها ميل= والقدّ عدل الوسر من حيث سارا
لك في فؤادي بَصمةٍ يَفْتر الحيل=عَن شيلها بالغصْب والاختيارا
حاولت اعزّي خاطري وانكسر شَيل= وشلون كَسْرَه لو على القاع صارا
يا اللّيّ تِحبّ التمشِيَه بالتساهيل =ارجوك ذاك الحيّ مرّه مرارا
صوّر لي الشارع ألا واعسى السيل=يسقي بيوتٍ وانت مشمِل يسارا
وان شِفْت بالشارِع صغارٍ قناديل=إيقف ترى لي حاجةٍ واعتبارا
سلّم عليهم ، وانتبه للتفاصيل= تلقَى وصاتي في وجيه الصغارا
فيهَم ثنينٍ باوّل احسانة القيل= علَى حدَيهَم مِن وصوفي شعارا
ترْ سنّهم واحد ،حدَيهم من الخيل= اوّل حروف اسمَه يغـَلبَه سمارا
والثاني ليا منّه ضَحَك يجلي اللّيل= من البراءه نور كلّ الديارا
صوّر لي الطّفلين وارسل لي ايميل= عنوانه التوأم .. شفا الانتظارا
انا عليهَم بين .. علّه و تعليل= محتار بين اللّوم و الاعتذارا
انّ طوّل الله لي بالايّام لا اطيل=لهَم اليدين .. اليوم عنهم قصارا
يا لهفتي عقب انقطاع المراسيل= ويا لوعتي والحال فيهَا مدارا
وان ظنّ بي مِن قال لي ظالم ابخيل= الله يسامح من على الطبع جارا
أنا النّهر يشمخ على شطّي نخيل= لو عكرّت صفوي خطوبٍ كبارا
ومسموح يا مستعمر القلب والليل=عندي تساوى اللّيل هو والنّهارا