بالتأكيد الذيب لا يهرول عبث، وصلني من الراوي / فواز الغسلان القصيده الرابعه وكلاهما خلال إسبوع إن لم تخني الذاكره في عام 1425هــ وتذكرت قول الشيبان يرحمهما الله ( كن على حذر من الراوي الشاعر وليس من الشاعر الراوي لذا يلزمني توثيق مايحضرني من مايتجاوز أربعين قصيده إرسلها لي ورديت عليها في حينه
المساجله رقم(4)إسناداً على الشاعر / مبارك طناء مبيريك التبيناوي
صك (ن) صدر للجفن بالنوم ممنوع = رجواي بالله كان ماجاه تمييز
لي صاحب(ن) من حبه القلب مشلوع = ونواضري برموش عينه مغاريز
فواز ضاع بلاهب العين مدفوع = ويحرق ورى فواز عشرة فواويز
يابو طناء مافادني جمع وفزوع = باللي جعل عيني دموعه مناقيز
صارالخطاء من صاحبي دوم مرفوع = ونوافذي عن شوف جرحه مقازيز
ردا على الراوي والشاعر/ فواز الغسلان البقعاوي
يامرحبا بأربع مكاتيب بإسبوع = وأطرب مادام السالفه نوع تعجيز
إعطيك من صافي نهر كل ينبوع = ولاني مدوّر له مع الربع تعويز
أبشر وأنا رتبت لك خوش مشروع = كأنك فهمت الحرفنه والبراويز
عذبات عسرات القوافي تجي طوع = هتلر لياركزت بالقاف تركيز
لاشك مشغلني من العام موضوع = إمجهز(ن) جيشه على القلب تجهيز
يابو فهد ماشفت له حل وسنوع = شفتك تعزز لي ولا شفت تعزيز
أنا بلى قلبي من البيض مربوع = يرسل على قلبي هموم (ن) مجاويز
لا لا تقول الصبر خيره ومنفوع = وباب الرجاء دونه قفول ومجاليز
والهَيِنّه صارت مثل حبة الكوع = لاتشكي أبكي لك وأفك المحاجيز
ولاتبدي أسرارك على كل مصقوع = ياكثر هرج مدورين المهاميز
أخوكم الشاعرالراوي/ مبارك طناء مبيريك التبيناوي