قلبي غدى لمذلق الشوك محضار=طلحن بساتينه وسدرن بلاده
ورعي الزقيميات في حد سنجار=اخير عندي من حياة الزهاده
يالله ياعالم خفيات الاسرار=عليم ماتخفى عليك الجحاده
ياخالق الجنه وياخالق النار=ياخالق الدنيا وبيدك نفاده
واليا التفتت لثاوي(ن) ثابي(ن) ثار=عقب الهزل يرمى عليها شداده
في قدرتك تحيي ضعيفات الاطيار=بلا قوت يامحيي عيال الجراده
في وسط دار وامهن يم له دار=ومرامي الدنيا بعيدن بلاده
وخلاف ذا ياراكبن فوق مذعار=حمراء طوال وكن فيها زهاده
حمراء من العيرات به زوم وسطار=ولافوقه الا المزهبه مع شداده
عينه تشادي حمرته جمرة النار=تقدح كما المقباس عقب السواده
عين العديم لياسمع صيحة الجار=عي(ن) وله عند الملازيم عاده
واذنه تشادي لون كافورة البار=لاصار كاويها الشتاء من براده
ركابها عده بظل(ن) تحت غار=لاهي دنوع ولا تعرف الشراده
تمد من دار وتمسي ورى دار=ولا عمرها من كثر الاهذال باده
تلفي لخالد واخبره كل ماصار=وعليه يظهرن السراير وكاده
قل لاصار عندك ضيف واخطى على جار=عز الله انك ظاهرن من سواده
اصبر ولا بالصبر لك كسر تعبار=يامالك الدنيا تبين مقاده
واعرف ترى الدنيا لقحتن بشبشار=ولايندرى بأيات وقتن ولاده
لقاحها لقاح قدر(ن) ليافار=او ضرب قبسونن قمعها زناده
وتلقح رجال(ن) من رجالن بالاشوار=وتثور الفتناه عق انمهاده
وتسلطنت ناسن هله ميتت نار=ونيران اجاويدن يحرث سماده
والذيب لو يطلع عليه الطلي نار=وصارت عواقيب السباع الشراده
ولو نتبع المذكور ماصار ماصار=مذكورن الدنيا طمعها فساده
ومن عيا عن الجنة تعبته على النار=يلقى عماله عند وال الشهاده
الصدق خلي باركن له على دار=والكذب سلف للجهامة وقاده