ياسعود وان كانت مسافات وابعاد=حثيت رجلي للمجرات وسهيل
مار البلا همٍ مع الوقت يزداد=يرمي طموحي للتعب والغرابيل
سافرت وجروحي قديمات وجداد=احمل على متني من الهم واشيل
ياما حفرت الارض سرداد مرداد=مافي يدي حيله ولا بالامل حيل
سرّيتها تحمل مجاميع وافراد=ترمح وانا مالي عليها مداخيل
يضمها ريح الصبا دون ميعاد= تاخذ مراسيلٍ وتزعج مراسيل
ما للرسن هيبه ولاظن تنقاد=لاصار دون الليل ياصاحبي ليل
اقفت تلاعب ضلها غي وعناد=حتى تلاشت عن عيون الدرابيل
له في جبل شمّر تواريخ واجداد=حنت تبي بعد المفارق مواصيل
في صدرها منفى واحاسيس وبلاد=وضيقه وتنهيده وضحك وتعاليل
ترزم وبارقها يجاريه رعاد=كنه من الخالق طيور الابابيل
تاخذ خيالي يم بابل وبغداد=وتشرح لي الخافي بدق التفاصيل
ضعنا ولو حنا على السيّد اسياد=وسقنا الاتاوه للردي والمهابيل
وصار الذهب سلعة محرج وحداد=صرنا بلا معنى وحيله وتحليل
اطلال نبكيها حضارات وامجاد=وحاضر يغنينا على عين ياليل
وان كان ما للجرح تعقيم وضماد=ليه انتظر وهم الليال المقابيل
ناديت واربكت الاماني ولافاد=عطشان وعروقي على ضفة النيل
اللي رحل ماعاد وان عاد وش عاد=الحب خدعه والمحبين تمثيل
الوقت غير الوقت ياامة الضاد=والليل مايضويه نور القناديل
والضعف مجّدنا على روس الاشهاد=وصرنا نعيش النور كذبه وتضليل
اسلافنا نادو على مجد الاحفاد=وردد صدى الاحفاد ياعين ياليل