ايه جهز لنا الموتر فداك السفيه=وانت راع المخوه لازهمتك خوي
فوق شاصٍ اليا ضاق المدى ننتخيه=مسندك يشبه ذويبان يوم يعوي
دق سلفه تسمع نغمته يالنبيه=يطرب اللي بوصل النايفه مهتوي
ان نطحته تقول الله واكبرعليه=وان قفيته تردد حيل ربي قوي
ان بدا بالتغطرس قمت تعلن ذويه=صممه واحدٍ مجنون ماهو سوي
ينتخي لك شجاعه كل ماقلت هيه=والمراديم لها بالجو برق ودوي
عل دهم السحايب كل وادي تجيه=والصحاري برحمة خالقه ترتوي
ملت النفس يامشكاي زيف الوجيه=والمدينة بميسمها كوتني كوي
ودنا ياعضيدي والسفر مشتهيه=يكفي اني من الضيقه سنه منطوي
ابعد الشوح والدرب الردي مانبيه=مايشيل الثقايل غير زند بدوي
محزمك والثمينه لاشرت تشتريه=يوم غيره طريقه بالردى ملتوي
اطوي الارض واللي فات لاتحتريه=والوي ذراع ظرفك بالعزيمه لوي
لوتهب الهبايب خيلها نمتطيه=ومايهمك كتاب احذر ومايحتوي
مالنا غير ربٍ بالوزى نرتجيه=وكّله دام قلبك هاويٍ منتوي
وقول يانفس بسك والعنا ودعيه=واطوي اللي مضالك ياعنيده طوي
شاعرٍ عاف هالدنيا وغسّل يديه=والمعاناة ناره يشتويبه شوي
ودام شعري مزخرف بالذهب والجنيه=لين يضوي طريقي بالجزايل ضوي
واترك دروب حظٍ عاقدٍ حاجبيه=مابكتله مداين ماضحك للقروي
وانت ياراعي الوقفات رايك وجيه=مابقى للمخوه غير مثلك خوي