هـن شيبتين بلحيتي صفن مثل روس الرماح = وسم السنين اللي اتركت فينا عـلامه واضحه
عــزاه يـاقـلب الـشقـا مـاعـاد لـك شـيٍ مـباح = صارت مـناقيد الـعرب تـنقد عـليك وفـاضحه
لاتـستحي والله وهـبك الشيب تكريـم ونجـاح = كـل شـعرة بـيضا لها حـكمة بـصير وناصحه
بـين الـضلوع الـمانعه تـكفخ ولا زمـك جـناح = مـاعـاد فـي جـوك فـضا والا حـمام تـطارحه
شـيـبك وقــار ولا يـهز بهيبتك بـعض الـمزاح = والا تثاقل كـلمةٍ جـت مـن غـشيم ومـازحـه
كـنك تـصدد مـاتبي عـينـك تـشوف بنا وضاح = والا انصدمت ان شـفتني ماني خليل البارحه
وش لـون الـومك والـحياه بذاتها مثل الرياح = وحـنا اليا هـب الـهوا مـثل الـمزون الـسابحه
مـافـيه قـاسـم مـشـترك مـابـينا غـير الـجراح = نـفس الطعون وللاسـف نفس الاداه الجارحه

ارحـب هلا يا شـاعـرً. يـزها على مثله وشاح = الشارده. والوارده. دايم لمثله. واضحه
شاعر وانا اشهد مقتدر ماهوب حاجات امتداح = لـه باع وافي. بالادب والشعر نبعه طافحه
الشيب واقع. يالخوي.يظهر على وجيه الفلاح = امرً طبيعي للبشر لو غيرت. . ملامحه
سـنه كـتبها. الله. على كل البشر ليل وصباح = للعين تبـدو واضـحه. ماتختـفي مطـارحـه
مير. البلا. لامن تعـدا ثم تمـادا باجتياح = واحـتل. ريضـان. الخـفا بخـيول هــمً. جامحه
قامت تصول ابه وتجول والممتنع اصبح متاح = والصمت يفرض واقعه.والخوف اصبح ذابحـه
موت الفتى نقد العــرب اللي ايخنقـون النجاح = اهـل الشـماته. حـيةً بيـن الاوادم. ســارحـه
مالوم. قلبً. يالخوي بين الحنايا ما استراح = والناس تجهـل. علـةً داخل. وريده. جـارحـه
وان ماتغيّـر واقـعه للصدق وادروب الصلاح = في يومها يا صاحبي. اقرا عليه. الفاتحـه
واحفظ. مفاهيم. الصبر .وابشر بعزك والفلاح = واسمح وسامح. واعرف ان دنياك هذي رايحه