بين همّي والطموح وثورة النّفس الطنيّه = ووضعنا اللي مايزين وبين ياعلّ وعساها
راح عمري يامحمّد والخوي يلقى خويّه = أربعينٍ ودّعتني والزمن يجري وراهــــــا
لاتظنّ إنّي هواوي يوم أجرّ السامريـــه = أو بعَد همّي من الدنيا خذاها من خذاهــــــا
والهنوف اللي عليها العلم ماعادت فتيـّه = شاب مفرقها وهي كانت على العالم تباهـا
وين هاكـ الجيدالاتلع والعيون النرجسيه = والجديل اللي ليا من ثار من لونه كســـاها
كان كلٍّ يهتويها عندما كانت صبيّـــــــه = ومن حلاها ياكثر حسّــادها حتّى قصراها
نسيَت إنّه من بنات النّوروالاصل بدويّه = غيّرت ملبوسها من شان ترفع مســـتواهـا
حطّت المكياج واختفّت عقب ماهي خفيّه = فرّعت قدّام أهلها وفصَخت باقي حيـــاهـا
أزعَلَت ناسٍ كثيرٍ عهدهم فيهــــــا وفيّـه = حاولت ترضي(كبير القوم) لكن مابغــاها
وامّها اللي ترتجيها خاب ظنّه باالعصيّه = اللي استعْصَت على(الصفران) ماطبّوا خبــــاها
وينكم يااهل المبادي وينكم يااهل الحميّه = كان ضاعت ضيعتنا وامّها ضاعت معاها
شكلها قامت تخبَّط مادرت ويش القضيّه = ومثل كل الناس قالت: يِحْتمِلْها من بداهــا
والقضيّه واضحه لاهل القلوب(الشافعيّه) = كِلْمةٍ قالَه(كبيرالقوم) ودّه ماحكـــــــــــاها
كانها تدري مصيبه، والهوى شرالبليّــــه = وكان ما تدري عساها تنتصح مني عساها
ترضي الله قبل ماترضي غرورالعنجهيه = وترجع لناسٍ حموها يوم شرع الله حمــاها
تلتفت لعيالها وتطبّــق احكــام الوصيّــــه = كيف ترضى لاهلها بالذّل دام الله عطــاها
عقب عزّالنفس والهقوات رضيوا بالدنيّه = ولايحسّ بجمرة الحرمان غيراللي وطاها
يا محمد لو يروح الصوت ماسقت المطيّه = لكن انّي يوم اشد ركاب فكري من غلاها
يا عزيز النّفس لاتحتار وارض الله فضيّه = صيدةٍ ماهي حلالٍ خلّهـــا للي شواهـــــــا
ومن رضي بالذّل يستاهل قصاميل الشويّه = يستريح ولا يلوم اللي شواها لو كلاهـــــا
يا محمد والزمن دوّار والدنيـــــــا مديّـــــه = والرجال بفعلها والنفس جاهـا ما كفاهــــا
يا محمد في زمان الذلّ ضيعنا الهويّــــــــه = ومن تغيرنا وحنّا من عمــاها في عماهــا
كلّنا جمهور ونتابع فصـــول المسرحيّــــــه = ومن بلاها يا محمد كلنا نضحــك بلآهـــا
صارت النكته ثقافتنا وضحكتنا غبيّــــــــــه = والطرب دستورنا وامراضنا صعبٍ دواها
عندنا الراعي منزّه لو يضحّي بالرعيّـــــــــه = دامنا مثل الرعيّه بس ما تسمع ثغــــــاها
أمّةٍ ما تحترم تاريخها مثل البقيّـــــــــــــــــه = تستحق اللي يجيها لو توطّــــاها عداهـــا