القلب لافنهّ قديم المعاصير=جروح روحن بالضلوع معطوفه
تحفها ذكرى الوصل حزة عصير=وابقى ثمان ايام تقل مخطوفه
وبعد الثمان تخاشرن بالمصادير=دمع القهر , ضيم المعنى وخوفه
يامحمد السوعان مسيت بالخير=يابن الحرار اللي تكرمّ ضيوفه
القلب حاير بين عذال ومشير=كلن يقول انسيه وانسي طيوفه
ياوجد حالي وجد من ضيع الطير=طيره شلع من بين كفه وشوفه
تشابكت دونه غيومن دواوير=وارخى لجنحانه رياحن عصوفه
أو وجد من صكوا عليه الطوابير=مهربّ نفت به عن دياره ظروفه
محملّ حشيش وخالطه بالقوارير=الفقر كااااافر واستوت له حتوفه
حركّ وشغلّ واتكلّ والتدابير=بيدين من نفسه لعبده عطوفه
الجيب ضاري والخوي ساتر البير=وطريقهم على النفود محفوفه
طعساً يبينّ جيبهم بالمناظير=وطعساً يخفيّ نورهم بالكلوفه
من خلفهم جيباً قطع له مشاوير=عليه رشاشاً عديم المروفه
اقفى وراهم بعد تبليغ تحذير=يرمي ويخطي والحياة مخلوفه
اقفوا مع دروبن طريقه عواثير=ذيابة خلا والحظ عارض جروفه
الرمل غطى جيبهم والشناكير=تجرف من تلالن تلاشت هفوفه
بالطعس تسمع حشرجة نافخ الكير=وتوحي ليا جا الرمل حس الجفوفه
لحقهم الرشاش همال ويدير=يبي الهدف واطلق حمايل كتوفه
وبعد العنا والجهد وين انت يالخير=صابوا خويه واستقرت بجوفه
وتوهق وشاف الغثا والمخاسير=مات الخوي والجيب طقت بلوفه
ولموا عليه بغربتاً كنه الصير=وحطوا الحديد وكـلـبشوه بعنوفه
بصمّ على اوراقه وشاف التقارير=قطوهّ في سجناً قليله شروفه
هذا الهجر من غير عذر ومعاذير=هذا الالم لاقبل تزفه دفوفه
يامحمد اقرأ حرف قمرا بتصخير=وانصح , وحاول لاتروع مخفوفه
ياعين منهو طال روس العناقير=يالليث لاتجرح مشاعر شفوفه
جاك الشعر يابن الرجال المناعير=اقبل من القمرا جدايد قطوفه