كتبت من واقع معاناتي حروف=فيها لكل وافي وهافي رساله
ماني ضعيّف من مساكين وضعوف=يسكت وشوفاته على قد حاله
ولاني عمى عن يِمِّة الحق مكفوف=لا خير باللي ما يقيم العداله
رزقي على اللي يرحم العبد ويروف=ولا الحثاله طول عمره حثاله
مرّيت أنا بظروف وظروف وظروف=عسى تمر اهل الردى والنذاله
ولا شفت مثلك يابو سامي ولا اشوف=رجلٍ تقدّر (صدق) حق الزماله
يا تاج راسي لك على الراس معروف=كسبت يا ذرب اليمين الجماله
لا يا بعد من هزّ كرسيّه الخوف=وخلاه يكسب بـاخوياه الرزاله