اهل الموايد بالصور تتـقن الزوم !
المدح صيغة شعر واضح ومرسوم // لو كان ما هو شرط دايم اساسي
تلقى به اغراض الشعر توصف قروم // من منطلق تسييس ما لا سياسي
يكتال به منهو عرف نية القوم // وزنه على طبخ القصايد حماسي
ويعتاش به ..شاعر عن الجزل مفطوم // الرابع اللي عاش دور الخماسي
وانا لقيت المدح ما هو بملزوم // يزيد جوه بالقصايد ...عماسي
عن ما يلي سمع الحشيمين محشوم // وما كل رجلن بالرجال متواسي
لا تمدح اللي بالردى طيره يحوم // لو هو موزع للقبايل...جناسي
تقول فيه الشعر بالوصف معدوم // يا خامسن ما عاش جو السداسي
اهل الموايد بالصور تتقن الزوم // تلقى لرداهم بالفلاش انعكاسي
بعض المساري لو يجي منها لوم // خلك مثل ذيك الجبال الرواسي
اليا نخاك صويحبك فز له قوم // خلك لاجل حق الصديق انغماسي
ياللي عليك الشعر تنعق له البوم // حرر كتاب الشعر جاه احتباسي
كان الهدف ..في غاية البوح محسوم // وش فيه طاير من عيوني نعاسي
كثروا دعاة الزور ..في وضع مشؤوم // فيه التنابل ..معتلين الكراسي
|