يامنتوينٍ يم حايل على خير=من الرياض وخص شرق النسيمي
عسى لكم مع السلامه مسافير=معكم سلآم لكل قرمٍ حشيمي
سلامٍ أحلى من حليب المباكير=ترعى زهر نوار ماهو هشيمي
خص الرجال الطيبين المناعير=لطامت العايل وضد الخصيمي
منا لكم أجمل تحية وتقدير=اعمكم به ياعيال اليتيمي
ربعي ليا شان اللغى طبعهم غير=متفهمين العلم دون تعليمي
اهل الحمايا والسطر والسعاطير=قومٍ تضيم الضد ماتستضيمي
ضياغمٍ لهم فعولٍ مشاهير=مبطي لهم بالطيب شانٍ عظيمي
بحدب السيوف القاطعات البواتير=ياما رموا بيمانهم من عديمي
بين الاعيرف والزباره طوابير=فوق الخيول الي تزج الرهيمي
الي حذاهن جودت بالمسامير=يركب عليهن مثل ذيب السليمي
مهي علوم مصور الهرج تصوير=الي يقال بكل وادي يهيمي
والخاتمه أزكى صلاةٍ وتكبير=على شفيع الخلق عند الكريمي