يابوي انا عن درب الاشوار جنّبت=ماعاد اشاور بالمواضيع لـلّه
طقتني الدنيا بليا وجرّبت=حتى غدا شوري من الراس كلّه
ان صبت زين وزين كاني بعد خبت=لجل آتعلم من خطاي وأحلّه
اما اجيب الشور من راسي ان جبت=والا ترى بعض المشاور مذلّه
اخاف من شيرة شماميت لا غبت=تركضبها بأسمي وكلٍ فطن لّه
اما انفضح علمي عليّ وتسربت=مثل الخبر كلٍ لقاه بمجلّه
والا يظن انّي عن المرجله عبت=وصرت استشير الخلق في كل زلّه
انقص مقامي ليه لا صار ما اذنبت=واللي عقد روس الحبايل يفلّه
ربي معي ماهمّني لو تعذبت=ولابد ماياتي فرجها من الله
وكان الخبر بفلوس مع طلعة السبت=يوم الاحد ببلاش كلٍ حصلّه
لاتصير مثل اللي يبي يعجل النبت=وجاه الثمر ماهو على منوةٍ لّه
والحاجه اللي تنتظرها وشيّبت=اعرف لو اتجيلك بيومه تملّه
يابوي هذا اللي من الشعر رتّبت=ابيات والموضوع عندك بجلّه
لكن ترى عن درب الاشوار جنّبت=واخترت لي دربٍ ضميري يدلّه