كل ماغبت غابت معك بعض الوناسه

كل ماغبت غابت معك بعض الوناسه=ياجميلٍ عن الانظار شهرين غايب
ياحبيبٍ بعد ماغبت شفنا التعاسه=ياطبيب القلوب وياحبيب الحبايب
كل ماسج فكري جاه ذكرك وحاسه=واشغل القلب في ذكراك والقلب تايب
صاحبك في غيابك قل عزمه وباسه=صار عنده غيابك من كبار المصايب
قل عزمه وباسه ثم تردا حماسه=لويحاول يطيب الحال ماهو بطايب
ماتفيد العلوم ولاتفيد السياسه=معك ياللي وهبك الله جزيل الوهايب
انت قلبك حديد وباقي الجسم ماسه=كم تمنى يشوفك من شبابٍ وشايب
بس مافيك امل والحب ماذقت كاسه=ولاشواك الهوى مثلي وشفت النشايب
ماتعرف الهوى وتعرف جوه وناسِه=ولااصبح القلب من لوعات الاحباب ذايب
ولاشكيت الظروف ولاشكيت التعاسه=ولا بدا الراس من دورات الايام شايب
ياهلا ياحبيبٍ دارسينه دراسه=بس قلي بعد ماجيت ويش انت جايب