ديوان الشاعر / نجم الشعر

اهداء الى الاخ العزيز عبدالفتَّاح اليمني

هل أتاك / بقلمي

	فإن كَانَ لِلثَّقَافَةِ مَجدٌ=نُبَارِكُ لَهاَ بِعَبدِالفتَّاحُ اجدَادُهُ هُم اصلُ العربِ=نَجمُ الأَصَالَةِ بِاليَمَنِ لاحُ هل اتاك حديثُ قَومَ جُرهُمٍ=آنَسَت قَلبَ هَاجَراً بأفراحُ فَكَانوا لَها بَعدَ اللهِ مأمَناً=مِنَ الخَوُفِ وَعَناءَ الأتراحُ سجَّلَ التَّاريخُ أعظَمَ قُصَّةً=بِالقُرآنِ وأحَاديثٌ صِحَاحُ فابالأَخلاقِ تَملِكُ كُلَّ شَيءٍ=بَل هِيَ المَكَاسِبُ والأَربَاحُ فأقول لعبدالفتَّاحِ مُهنِّئاً=نُهنِّئك بالثَّقافةِ والنَّجاحُ

نجم حرب
نايف عبدالله السليمي

الحكي واجد / بقلمي

	الحكي واجد والفعايل قليله=ياقل من يرسي على جمة البير الطيب والمعروف ماهنا بديله=ماقام به ياغير زحول المناعير والا الردي ماقام بحمل الثقيله=تعرف مداه اليا بديت المشاوير ياهل السيوف المرهفات الصقيله=تاريخكم يكتب عن الفعل تقرير ياحي من عدا براس الطويله=الحر حر وله جناحين ويطير اليوم بعض الناس ضيع دليله=يقضي حياته كلها عاكس السير يا الله بستر الحال عن كل ميله=ويا الله غناةٍ منك عن حاجة الغير

نجم حرب
نايف عبدالله السليمي

ياموقت الساعة / بقلمي

ياموقت الساعة / بقلمي

	لاضاق صدري يم الاحباب سجيت=اهل الوفاء والطيب واهل الستيره سلام يا رموز الوفاء ياهل الصيت=انتم سمات الطيب في كل ديره انتم هنا واهناك جبالٍ ثوابيت=الكل منكم يرتكي للعسيره ياموقت الساعه على الوقت توقيت=حرك عقاربها بارض الجزيره هذا الزمن شتت لي الفكر تشتيت=والحافظ المعبود مافيه غيره يا الله تثبتنا على الحق تثبيت=وتجعل لنا في كل الاحوال خيره وحييت ياراع المواثيق حييت=وهذي علومي والسوالف كثيره

مع تحيات نجم حرب
نايف عبدالله السليمي

عندي طموح / بقلمي

عندي طموح / بقلمي

	اضحك واسولف وادفع الحال بالحال=والناس ماتعلم عن اللي ورايه من قال كيف الحال قلت عالي العال=لوكان ماحققت للنفس غايه عندي طموح وعندي آمال وآمال=ابني واصمم واعتني فالبنايه ومن فوقها حطيت موجات وارسال=ورفرف علم عزي بعالي سمايه ماللهزايم عندنا اي مدخال=لوكان بعض الوقت طول عنايه والحمد للمعبود في كل الاحوال=اللي جعل لكل بدايه نهايه شاعر نظم وابيوتنا دايم اجزال=ابدع جزيل القاف وعندي درايه وغيري من الشعار طحاطيح وابطال=كلٍ على معناه يقديه رايه وهذي علومي وغيرها قصار واطوال=وشربة قراح العد تبدد ظمايه

مع تحيات نجم حرب
نايف عبدالله السليمي

ياعونكم / بقلمي

	ياعونكم ياهل القلوب الجريحه=اللي على الخلان زايد المها مالومكم يامهتوين المليحه=عمهوجةٍ يجذب هواها وغرمها من حَبها ضاقت عليه الفسيحه=وخيَّم على النفس الشقيه ندمها من فارق الخلان طاح بمطيحه=مايروف حاله غير منهو حرمها الحب ياهل الحب دروبه فضيحه=كم عاشقٍ مثلي تجشم وهمها اسباب من شد المعاليق ريحه=كن البختري لاتبخر نسمها والا الشمطري لاتخالط بشيحه=وسط الفيافي والربيع اغتنمها الزين كنه والربيع بشريحه=والقلب بصمه والخفوق استلمها

مع تحيات نجم حرب
نايف عبدالله السليمي

ماهي على الرغبات / بقلمي

	لاجيت اعدد رغبت النفس ياقوم=ازريت الحِّق من كثير المطالب شيٍ تفاه وشي لاشك ملزوم=وشيٍ على ماقيل موجب وسالب احدٍ يفكر بس وش ياكل اليوم=واحدٍ يفكر كل الايام ناهب واحدٍ حداه الحظ لاشك محروم=وجه حظه من دون الارزاق شاحب واحدٍ يجيه الحظ بالرزق مرغوم=يجيه رزقه ماشعر بالمتاعب هذي احوال الناس رايق ومهموم=سبحان منهو للمخاليق واهب ماهي على الرغبات كل شي مقسوم=وتقوى الولي لاشك اغلا المكاسب

مع تحيات نجم حرب
نايف عبدالله السليمي

ياناس / بقلمي

	يا الله يالمعبود ياشافي ايوب=تشفي مريض احبابنا من مرضها يالواحد الاله ياقابل التوب=ياباسطاً سبعاً وسبعاً نهضها يامن جعلت الناس غالب ومغلوب=وحاجاتنا بيدك تقضي غرضها ياناس كل شيٍ مقدر ومكتوب=الخمس مع الخمس منهو فرضها خمس الاركان وخمس تغفر بها ذنوب=ولاحظ للي ياجماعه نقضها الحق حق ومالنا عنه مجنوب=اشوف بعض الناس تحسد بعضها ويا الله يالمعبود ياخير مطلوب=انت الذي عندك جزايل عوضها

مع تحيات نجم حرب
نايف عبدالله السليمي

هرج السعه / بقلمي

	هرج السعه يصبح علينا صغيري=نذبح ونصلخ واضخم القصر نبنيه كلٍ يقول الحل عندي يصيري=آصل بعيد الدار والغالي اشريه وهرج الفعل يصبح علينا كبيري=ياقل من حل الصواعيب بيديه فعل الرجل يظهر بيومٍ عسيري=لامن نخيته قام والدين يقضيه والا ردي العرف مافيه خيري=رداه عن فعل النواميس حاديه اللي على عمياه هرجه كثيري=لابد مالايام تظهر خوافيه الحر حر وفوق دايم يطيري=وقالوا اللي مايعرف الصقر يشويه

مع تحيات نجم حرب
نايف عبدالله السليمي

الفكر / بقلم نجم حرب

	اليوم عندي علم ماودي اخفيه=على جميع الشعب حتمي وفوري اول بدا علمي اتنومس مباديه=وعلمٍ مابه نوماس ماهو ضروري عندي على بعض المفاهيم تنويه=اشوفها دايم على شكل صوري الفكر فكر وفيه فكرٍ يغذيه=مثل النبات اللي غذاه الجذوري فكرٍ نشاء بالعز والخير حاويه=خيره على شبه الجزيره يدوري وفكرٍ نشاء والشر كله حواليه=مابه على شبه الجزيره سروري يضحك معك والرب يعلم خوافيه=يعجبك شكله باللقاء والحضوري كم واحدٍ بالشر بالسر معديه=بايدين الاعداء مثل سير المروري هذا ومثله لازمٍ نقطع ايديه=حتى علينا مايلف ويدوري وتم الكلام وعلمنا ذي معانيه=والعلم ياهل العرف لاشك نوري

نايف عبدالله السليمي

شاب القصيد / بقلم نجم حرب

	شاب القصيد وباقي الطيب ماشاب=باقي على لونه وشكله وعزه صممت له عزي شبابيك وابواب=لاني سمو العز وبيت المعزه وفتحت صدري للمشاكيل ترحاب=وعقلي جبل ماحدٍ يحاول يهزه رباني اللي نظرته فوق مرقاب=ابوي بالشدات ماحدٍ يلزه ياهيه ياللي تدعي حل الاصعاب=ماشفنا اركابك درهمت صوب غزه عوافي ماحدٍ قام يحسب لك احساب=عود على العصير وبالحيل مزه السوق له شراي وبايع وجلاب=وسعر الذهب يفرق عن اكياس مزه

مع تحيات نجم حرب نايف عبدالله السليمي