ديوان الشاعر / رويضان الجسار

طاب صباحكم / مساءكم بكل ود
اليكم هذه المتواضعه
وعسى ان تنال على اعجابكم

إسطـورة الـشـعـر !! .. ..

	مال الغصن والهواء ملهوف بغصينه=من هو يلوم الهواء لا داعـب أغصانـه على مساره تدلّى الورد بيمينه =افرش ( بساط ) الامل نبحث ورى أوطانه على نسيم الهواء مال ( الامل ) عينه = ماغير ( أنا ) و ( الحزن ) صرنا من أعيانه يستوفي ( الحزن ) موت ( الغصن ) بيدينه=ويأبى كيان ( الوصل ) لو ماتـت أشجانه يرهقني ( الحلم ) ثـم ارجـع علـى سينـه=يتوه قاف الشعر لو راقب أوزانه هـدّي ( مـزاج ) الالـم ! لا يبلل الطيـنـه=يضيع ( جوّه ) و ليل الدّان للدّانـه اوتار حزنه / تواليفه / دواوينه = تنهيت صدره !؟ يغنّي همّها هانـه غصّت ( لهاة ) الشعر ماحددو دينه=تحتاج ( حبل ) الشعر في ( شنـق ) كتمانـه يفنى مدى هالعمر والحزن ياشينه=وتبقى عيون ٍ تضم الدمع بأجفانه من هو لمح في ( جبيـن ) العشق و سنينـه=من هو سبا من ( جناح ) الشوق عنوانه مجنون ضاعت !! وصوف الورد من عينـه=من هو قطف وردته !؟ من هز وجدانه مجنـون ليلى و ليل الجن !! يازيـنـه=مدام ورد الشعـر مـن غيـث هتّـانـه مجنون شافه وناض الشعر مـن حينـه=و ( إسطورة ) الشعـر غنّاها علـى شانـه

اخوكم رويضان الشمري


دمتم بكل ود

طاب صباحكم / مساءكم

بكل خير وصحه وعافيه
رساله متواضعه الى الاخ والشاعر القدير مرزوق الغانم
ارسلتها له عن طريق الجوال واضعها اليوم بينكم وعسى ان تنال اعجابكم
وهي بعنوان /

قرض الابادات

قـرض الابـادات !! !! .. ..

	الصمت سجن الصوت و القيد بلسان = رسالة ٍ ما يفهمه غير مرزوق تنقل كلام ٍ ما يسولف للأعيان =خشية قليل العرف يودع له بنوق وانا على شعري كما ضلع رمان = مايقبل الدمعه على طينة الموق اقنص سمين الهرج ماني إبحلان =واستر جناب المفرده عن هل العوق تبهر عريف الشعر ويصير بلشان =ويبحل عميد الشعر من فكة الطوق الا على اللي مثل شرواك لا بان =يدرك حلوم الشعر من بعد ما يفوق الشعر يا مرزوق ماهو ولد جان =وعبقر يشابه كذبة ابريل بالسوق و العلم يا برزان يشبه لبرزان =لكن حلاة العلم تاتيه من فوق يذكر على المرقاب بالقول عقبان = والذيب عدّي به مع الطير برفوق وآمد شوفي للمراقيب شفقان = وترجع لي النظره ولا شفت مخلوق دسمان ما دسّم شواربه دسمان =طيب الاسامي ما تطيّب له اوفوق ( النِّقْ ) لو تجمع على ( النِّقْ ) نيشان = إلا سميّ مشيّد البيت مفهوق هتلر ضريبة وقت في قصر الالمان= والبنك من قرض الابادات مزنوق مال الربا للسحت في كل الاديان = مصير مايجنى ولو زاد مسحوق اصبح خطا الدستور للوقت برهان =وجه الحقيقه بالزمن صار مسروق عكس الموشّر لا تسكّع بليهان =في نجد والدانه تصوّر له النوق هذيك بنت فلان وأمه على فلان =وهذيك مشريّه بمليون مدقوق مالوم جاشه لو تغنّى بالاوطان = وانا صدى صوتي بالاوطان مخنوق نجمة رقيبه بالسما ضوّها زان = من عقب ماهي بالوطا تقل غرنوق و اليوم طير الحلم غرّد بالاغصان= حظي بري ماعاد هي بيننا حقوق شفنا و لا خفنا طورايف سنمان =مير البلاء بأمه اليا شافت بروق واحيان ماتفهم على كل الأحيان= احيان ما هو كل مطرود ملحوق مادمت انا المرسل و صدري رويضان =لي الشرف لاصار بالعجز مرزوق

ودمتم بكل ود

اخوكم : رويضان الشمري

.

لـحـم نـي !! !! !! .. ..

	كانك فهد طير الشقى شافلك ريش=ماودّنا في هدّته يابعد حي ريش النوايا بيننا لقمة العيش=لا تطيّر الجزله وتقنص لنا السي ماانته بمسئولٍ على رحلة قريش= ماغير ربي يقطع الرزق والمي جاك النذير وفتش العلم تفتيش=الوضع مظلم والعداله لكم ضي قبل العلاقه بيننا تفصل الفيش=شمس الضحى ماهي مثل بارد الفي اصبح مدير القاع ياخذ بخاشيش = يفتي بتحريمه وياكل لحم ني خط الدفاع اللي يدافع على ويش=عيّد بنا عيدين والثالثه لي ظنيت تكتيكه دفاعي مع الجيش= وأثره كما الصحاف يكرخ ولاشي خل الحماقه لا تحدن على الطيش=خل الطيور تطير بأرزاقها هي اوجزت علمي والخبر بالمراهيش=وان طالت العله ترى طبكم كي لا يا فهد طير الشقى ينتف الريش= ماودّنا في هدّته يا بعد حي

طاب صباحكم / مساءكم بكل خير

1/1/1433 هـ

عامٍ جديد وعمرٍ مديد ان شاء الله

وكل عام وانتم بخير وصحه وسلامه

ابيات كيبورديه متواضعه من على الكيبورد
اهداء للجميع
...

لكل النشامى

لـكـل الـنـشــامـــى !!..

	سلامي على كلّ نبض ٍ ( بصدر الشّمالي ) نفض كلّ فيض الخيال=تحيّة غلا من زكاها يسوقه هِجوسي على كلّ صدر ٍ وسيع سلامي على داهيه داهيه من دهاة العرب كنَّ حرفه مثال=تسامى حروفه معالي سموّه فصاحة بيان المقام الرّفيع سلامي مداده لسبع القبايل جنوبه وغربه وشرق وشمال= لكلّ النّشامى / عسى ( كلّ عام ٍ بخير وسعاده ) عليكم جميع مضى العام كلّه بنقص العمر ياعسى كل حيّ ٍ سنينه طوال= سقى الله منازل حبيب ٍ ترك من يحبّه وودّع حبيبه وديع عسى ربّنا غافر الذّنب يغفر لنا كلّ ذنبٍ علينا مُحال = عسى رحمته فوقنا كلّنا ظلّها نستظّله حجاب ٍ منيع وبختم كلامي بذكره مدامه ذكر كلّ فضل ٍ بذكره تعال= تعالى جلاله وسبحان ربي عساه يحمانا بسد ٍ ذريع هو الواحد الأوحدي جلّ ربّي عظيم ٍ و كامل بكل الكمال= إليك الرّجا ربّنا إتّكلنا بك المتّكل يالعليم السميع

دمتم بكل ود

اخوكم : رويضان الشمري

الـنـخــل حــرّ !! !!..

	النَّاسِ تَنْسى وربَّ النَّاسِ مَا ينْسَى = حذْراكَ تَنْسى تِصَيْرَ النًّفْسِ مَنْسيَّه كِسبْتَ مِنْ (مُصْحَفَيْ) فيْ دِنْيتيْ درْسَا = واخذْت جرْعه مِنَ حْروْفهْ وقائيَّه كنّ ( آية ) الشّعْر في كفّيْ عَصَا موْسَى = مرْسَل على كلّ (فرْعوْنيْ) و (جنّيّه) و(سْفيْنتي) قمَّة ( الْجوْديْ ) لها مرْسَى = إِبْحرْ بها لوْ بحوْر الشَّعْر عبْريَّه الشَّعْر ماهوْ طلاسمْ (روْم) معْ (فُُرْسَا)=خلّكْ من الْليْ يقوْل : النّيَّه / النّيَّه يا صار ماهيْ مِنَ الْليْ عيْنها خرْسَا= حَرّجْ عليْها بسوْق (اعْكاظ) عيْديَّه والْخنَّه الْليْ ورى الْقوْسيْنَ (كالْخنْسَا) = خلّهْ تغنّي مادام الْحيّ معْ حيَّه نسْرجْ (بِراق) الشّعِرْ بالْليْلةَ الدّمْسَا = ونسْريْ ورىْ كلّ حدّ ٍ (للسّعوْديّه) شفْنا الرّقيْق تْغزي منْ دوْلة (النّمْسَا)= واحْرار تسْقطْ ورىْ ثوْرات حرّيّه ( قاروْن ) يسْبحْ مع الْقيراط والْفلْسَا = ويْغوْص معْ رمْلها فيْ لبّ الارْضيّه يا(قدْس) حنَّا عربْ (نكْسهْ) بَعَدْ / نقْسَى = (صْلاح) كرْديْ !! و ناديْ (نسْل) كرْديَّه تمْثال حرْيَّة (امْريْكا ) من (فْرنْسَا) = مثْْل (النَّخلْ) حرِّ !! معْ سيْفيْن (هنْديَّه)

[/center]

طاب مساءكم / صباحكم

بكل خير

ابيات كيبورديه وعاجله

بعد موقف في مزاين إم ارقيبه !!

ارسلتها بالجوال قبل قليل الى : هاجد الحلاّم البقمي

وعسى ان تنال اعجابكم

هاجد الحلام البقمي!! !!..

	علم البحر بالمد والجزر معلوم = من كل نوع ولون بالحرف حاوي يا هاجد الحلاّم !! والرزق مقسوم = بآمر الولي من فوق عرش ٍ سماوي يا ابن البقوم وعزوتك كلها إبقوم =يردون حوض الموت مثل النّداوي ياشوق من نهده على الصدر مزموم= عز الله انك يافتى الجود قاوي ان جيتني جيتك !! ورى كل مفهوم = من كل (ضدّ) و (ضدّ) فيني هقاوي حر ٍ من احرار الجبل يدرك الحوم = شرّي على (الخرب) السّمين النّحاوي وان كنت تنشدني عن اخبار وعلوم = الحمد لله ما نقلها السّواوي (اخبارنا) يا عزوتي تتعب !! القوم = مثل الذي في راس سنجار عاوي مع كل جرّت صوت غنّيت مهموم= من حرّ مابي اصبح الجسم ذاوي الصدق ضايع !! والزمن : صار مسموم= تِسْرق عزاوي !! ثم تسلْب نخاوي (غلبا) !!.. (طنايا) !! وغيرها كلّها لوم = راحت (لغيري) صار سهمه دناوي ماليبها دام الرخا !؟ بالوطن دوم = وان شبت الهيجا نجيب العزاوي ترجع لنا غصب ٍ على كل مرجوم= لا صاحت العذراء لعين الهواوي خلّ السّوالف !! كلّها غفوة احلوم =دام (آفة) التاريخ مع كل راوي والعذر يا (هاجد) من الوقت مزحوم= صارت هواجيسي تعن الفتاوي اترك هواجيسي غشى همّها النوم=ما ودّي اشغل كل حرف ٍ عناوي وان قام همّه قلت هيّا بعد قوم = شربت همّه مثل شرب القهاوي وختامها يا (هاجد) ابعد !! عن اللوم = خل العرب تقفي اليا صرت ناوي من صد عنّك لا ترجاه و تحوم = خلّه يولي دام ما انته رجاوي ياصار لك فلك ٍ وقادر على العوم = أبحر بها مع كل غبة شقاوي

.

اخوكم / رويضان الشمري

خـلّك طـبـيـعـي !!!! !!..

	لو طار طير المستحيل وغابت السّبع العجاب = خلّه على قول المثل هي ممكنه كلّ العجب كانه من الله لا يفسّرها على لفظ الخطاب = كلّ ٍ على نفسه يراجع غلطته وقت الغضب وقّفتها بيني وبـين الصّمت والخاطر يثاب = لو ماتت الشّرهه بصدر النّابغه يوم العتب ساعات اقول إنّ البشر ماعاد تدري بالصّواب = دام العقول الجانحه من فوق هامات السّحب كلّ ٍ يشوف النّاس في طبْعه مادام انّه مصاب = والظّاهر إنّ اسطبّها الخلفي ترقّت به رتب بانت على نبراتها فيها من الوضع اكتئاب = كنّه تمنّا موتها والموت عنوة من شجب يدرى خواطر ميْن ياعمّي على الوجه اكتتاب = إسهوم خوفه شاهده في سعرها يوم النّشب بان الرّدى بعيونها لا لا وظنّك فيه خاب = دام المظاهر خايفه ليه الشّبب ما هو شبب كان الرّجل حتّى لسانه صار من نفسه يعاب = هرّاجة المجلس لعذره حطّت ابليس السّبب حسبك على النّاشر مادامه حطّ للموجز نقاب = يا نشرة اخبار المساء ليه بتفاصيلك حجب ذيعي على العاقل عسى العقّيل تلقى له جواب = وإلا نذيع اخبارها في مركز الدّوله ذنب دبّـوسها لوعادها حطّيت في فمّه تراب = من شان يعرف قيمته دامه ذنب ما هو شنب لا لا نِعم صعبه نَعم وش جاك من صدر الكتاب = من كل صفحه نوع لونك لو بعثته لك كتب خلّك على بعضك ترى العاقل يردّه لك إياب= خلّك طبيعي لو يقولون العرب هيّا أجب وان شفت نفسك قادره جهّز زهابك لك ذهاب = والخافي اعظم والله إلا تاكله أكلت مطب

صندوق الزمن

صـنـدوق الـزمــن !!!..

	مسا الخير يا ورد الغلا كلّ ما امسينا=بهمـس المحبّـه و الـوفـا كـلّ مضمـونـه مادام الوفا باقي من اسمى معانينا =زرعت الأمل في كلّ درب ٍ يمرّونه قطفنا ورود العام واحلام عامينا=سعدنا بلحظه وانطفت كلّ شمعونه كسبنا ورى اللهفه من الشوق كاسينا =وكاس الهوا مسكوب من خمر دلعونه علـى همسـة العشـاق وافلح صباحينـا=صباحه مثل ما اصبح صباحـي يمسّونـه تعيش الجـروح وطـبّهـا مع مجـــافينـا=عسى الجرح ما يبرى ويبقى على لونه وحنّا ثلاث سنين غرقت مراسينا = على مركب العشاق ببحور مفتونه غيابي خـذا عـذره وشـوقـي لقـى فيـنـا= مسـافـة شقـى حـرف ٍ يتابعـه مجنونـه ولا عـاد صدري محتمـل عــذر نـاسيـنـا= طرقت الهواء من شـان سلهامـة عيونـه طقوس العزاء لو ننتظر مـن يـواسينـا=تموت المحبه والهـواوي علـى كونـه ضمـيـر المحـبـه لو ذكر وش خوافيـنـا= بصـدر الغرام بكـل طيف ٍ مـع مـــزونـه جــذبـني خيالـه لـو ضميره يعــادينـا=سرق خافقي لحظه وانـا مـن يجـازونـه كفايه وانا حسبي على من يجازينا= ببعد ٍ مع الصدّه ولا باح مكنونه شكرت الفراق وقلت هذي مآسينا=تحفظه بصندوق الزمن لا يشوفونه مــادام الــمبادي للنّهايه تودّينا=وداع الـهموم ولا وداع ٍ تعرفـونـه

.

طاب صباحكم مساءكم
بكل خير وسعاده
ابيات كيبورديه وعلى عجاله اتت هكذا
واتمنى ان تنال على اعجابكم

شبه العسل !!

شـبـه الـعسـل !!

	نشّفت ريق الشعر يا منشّف ارياقي=واهل الشعر منك فرحانه وزعلانه اتعبت من هو يحث العين والساقي=صارت خطاوي فقير الجاش تعبانه ماسرّهم من سحاب الصيف براقي=مزنك تعدى تضف الريح شلانه ماشفت مثلك ولا غيرك بعد باقي=فيك الوهم عاش لا يا زين مسكانه متلحفٍ تشحذ الهمه ورى اعماقي=فيك اللمم تحتفل في ميلة اغصانه لالا يقولون بك ضرب المثل لاقي=شفني آلملم لك الامثال عطشانه شبه العسل طفلكم بالقدس ما ذاقي=ياكن عباس جابه بأول ازمانه والذيب عاوي لو ان الصوت دفاقي=لو حظّ ملحه بري ماصاب حجّانه يا طير لا لا تنوح بوقت الاشفاقي=لا تزعج الناس صوتك تزعج آلحانه واليوم نجمك ظهر من تحت الانفاقي=ياشين طلع النجم في وجه بردانه شد الوتد عن دوال العرق يالراقي=دق السبب زين لا تتعب هل الدانه وان ضاق صدرك وصوتك بالفضا ضاقي=طشّه ورى المقبره لا تقبر اوزانه ماني طبيب ٍ إجبّر كل منعاقي=رح راجع اللي صدى الأضلاع عمدانه قصة مقص الرقابه مصدر اوراقي=خلف الكواليس تسمع قص جنحانه لا تتعب اقلام خلق الله مع احداقي=افعل بنا خير ياللي ترجي اثمانه

.

مراسيم الغياب !!

مراسيم الغياب !!

	يا عميلي كان ( نجمك ) بدى ضوّه يغيب = علّّم اصحابك ورتّب مراسيم الغياب الليال ( الوضح ) نص الشهر مابه نصيب=غير دم ٍ يحرق الروح يا فضل الثواب لو تصوم ( البيض ) ( للبيض ) عن وجه الطليب= ما تسرّ العاقبه شمعة العشق المذاب ضاقت الدنيا بوجهك مع الصدر الرحيب=كنّ همّك فوق صدره تباشير اكتئاب يا عميلي كان ( نمر ٍ) نثر دمعه سريب= إعرف ان ( وضحا ) سبب كل دمعك يا سحاب كل شخص ٍ لو يذوق المرض دوّر طبيب= غير من هو شاف طبّه ذهاب ابلا إياب وانت ياللي كل بوحك على شانه نحيب=من يلومك بالهوا جعل يرجمه الشهاب لو تحاول ذرّة الملح بعيون الصحيب = اكتستك اللي حفظته على صدر الكتاب جاهزه فور الطلب لو طلبته يا رغيب=لو تبيها جتك تسبق رموشك ما تهاب ليت والله يالغلا مع صدى صوته تجيب=لو تساهم في سهم حب مغليك اكتتاب بعدها لو غاب عنّك خياله ما يغيب= لو تغيب الشمس ماغاب حلم ٍ للغياب

.