ديوان الشاعر / أحمد الجريفاني

الرجل في نظرهم ما يطيع الحريم ..!!!

	شاغلتني قضيه بس فيني وجل=خايف احدن يقول اني بطرحي عقيم لجل تفهم بسرعه سقتها في مثل=ماهو محتاج شرح ولا ذكاوة فهيم بنت عمره بلغ عشرين زين وعقل=عايشه عند ابوها وامها في نعيم بنت مافيه مثله دين طيبه اصل=مره اسمه مهاة ومره يقال ريم من نشد عن جماله قيل ماله مثل=من نشد عن طباعه ما لقى له خصيم عقب عشرين خاطب صاب اهلها ملل=طفشت امه وابوها منزعج وهو نيم كل ما رد خاطب قام سب وبتل=كدروا عيشة المسكين في سين جيم سمعته شوهوها قيل ماهو رجل=الرجل في نظرهم ما يطيع الحريم صارت الناس تشمت والحكي با الهبل=جملتن رددوها صابته با الصميم راح شاور مهاته تمتمت في خجل=(ابي اكمل دراسه) عذر رسمي قديم قال شوفي حياتي وادركي ما حصل=والدك جننوا به وصلوه الجحيم عن سعادتك لحظه خاطري ما غفل=ما اقدر اجبرك بنتي لو خياري حكيم قالت ابشر بوافق اعتمد واتكل=اختر اللي تشوفه واستعذ من رجيم هلل ابوه (بعذره) لو فرح واسفهل=قام يمشي يردد نحمدك يا كريم كلًم اللي خطبها للولد في عجل=قال انا بانتظارك ما باالاجواء غيم رتبوا ما لزمهم لين تم الحفل=طارت البنت فرحه زوج كشخه وسيم وجهوا شرق لجل امضاء شهر العسل=لاحظت زوجها با الجو ماهو سليم بعد رحله طويله في (كوالا) وصل=وصله تكسي اجره وين ناوي يقيم بعد كاسين ( .... ) بان سر الخلل=قام اخينا يغازل عشقته با( ...... ) الزواج بنظامه ما يرد الغزل=والمره بعتقاده : طبخ .. نفخ .. تْخديم زعلت البنت لكن وش يفيد الزعل=ما يفيد المجادل مع اناني سقيم بعد اجازه سعيده وصًله للاهل=(كانت) البنت (عذرا) واعْتبر يا غشيم

شيخة الحلوات (لذائقة عبدالله المفضلي والجميع) ..!!!

	ماكنت اظن ان البحر يطلب العين=تسقيه لامنه عطش مـن بحرهـا لين نظرت عيني مهاً عافت الزين=شمسٍ تغطى من سناهـا قمرهـا لا سلهمت تسبي عقول المحبين=ولا ناظرت نفسٍ وجاهـا قدرهـا في رمشها سهمٍ ورمـحٍ وسيفيـن=لو قررت ذبح البشـر ماعسرهـا المبسـم احلـى وردةٍ بالبساتيـن=يقطر عسل من يوم ربي فطرهـا تسحر وترمي به قلوب المساكين=مافكرت من ردهـا مـن امرهـا والجيد قالب ثلـج دافـي بلونيـن=جيد وشعـر متواعديـن بنحرهـا بان الحلا يوم اشترك فيه ضديـن=ياجيدها وشلون ابوصف شعرها حرير عجـزت لاتشيلـه بيديـن=لـولا ردوفـه نابيـاتٍ عثرهـا حسنٍ الاهي ما حبا فيه شخصيـن=لولا الحيا حبيت معسول اثرهـا ماله شبيهٍ فـي جميـع المزاييـن=مطنوخـة توج حلاهـا بطرهـا ياشيخة الحلوات مافيـه حلويـن=لامن حضرتي بيعت اغلى دررها ترفقي في عاشـقٍ متعتـه ديـن=يشوف حبـات العنـب ماقدرهـا

عليْ الطلاق !!!

	علي الطلاق : يقولها دون تفكير=البنت تطلق والرجل ما قصدها يقولها با الصبح والظهر وعصير=حتى وهو با الحلم والخافي ادهى طلًق على الفاضي مجاراة للغير=نسي انه اللي كان يحلم بيدها ابوه قبله جاهلٍ ما فعل خير=لو زوجته تنقذ حياته جحدها مريض ماقويت عليه الدكاتير=عطاه ربه نعمةٍ ما حمدها لمت الولد واثر الولد منهو صغير=يسمع قصص مليون ياصل عددها من والده من دون يحضى بتفسير=ما تقدر امه تنصحه لو نشدها اولهن (الرجال) حكمه و تدبير=البيت خيمه والرجل هو عمدها اما (المره) ضلعٍ عوج دون تأثير=مهمته تكنس وترضع ولدها بعد الفجر لازم تروٍي من البير=تطبخ وتنفخ وان شكت له جلدها فضًل عليها مهرته والمغاتير=بنت الحموله طيٍب اصله قردها اكرامها في منطقه زود تحقير=يا حيف الانثى تزدرى في بلدها

يا طامعٍ با الحياة وخيرته خامه .. !!!

	ما ياخذ الـروح غيـر الله باريهـا=اللي خلقها هو اللي حدد ايامه والروح لازم تلبـي لامـر داعيهـا=لازم تلبي لفـردٍ تسـري احكامـه اللي خلقها مـن الاجـداث يحييهـا=لوهي رميمٍ الاهي يحيـي عظامـه للرب حكمه عـن عبـاده مخفيهـا=لو حدد العمر عين العبد مـا نامـه ونفس ابن ادم تغرًه فـي تهقويهـا=الله هو المعتلـي والنفـس لوامـه علام با سرارهـا غافـر مساويهـا=حنا عبيده تحـت عطفـه وإكرامـه فرض علينا الشهاده وابتـدا فيهـا=واللي نطق با الشهاده يقبل اسلامـه وخمس الصلوات واجبنـا نأديها=بوقاتها مانوخٍر فـرض عـن زامـه وزكاة الاموال عند الحـول نوتيهـا=تطهير للمال شكر الـرب وانعامـه والصوم نفسك على التقوى يربيهـا=الفوز موعـود للـي تمًم صيامـه والحـج مـره لمكـه لا تخليـهـا=من استطاع السبيل يجهٍز حرامـه احرص وواظب ونفسـك لاتراويها=الحرص واجب كمال الدين باتمامـه ما احدٍ هدى نفس ربك ماهو هاديها=ولا يعلم العبد وش مكتـوب قدامـه اذا لطـف ربـك بنفسٍ ينجيهـا=ولا تنقبل توبةٍ لا قامـت قيامـه تر العمل نيةٍ بـا القلـب تنويها=واللي كفر ما تفيده عظـة ابهامـه يعلـم نوايـاك ربـك لـو تخفيهـا=من حط با النار ما تشفع له ازلامه احذر تغرك حياتـك فـي مباهيهـا=لو صابتك نعمةٍ ماهـي بدوًآمـه منيتـك مـا بمقـدورك تفاديـهـا=يا طامعٍ با الحياة وخيرتـه خامـه

للقلوب الخضراء (فقط) (يمتنع المطاوعه) ..!!!

	ارغب البيض وابحر في غرام السمر=عندي الملح والقبله هن الميزتين بس يامن بغيت الحق (موت) الشقر=كل مااوفيت دين ينشٍبنك بدين مشبعات العشيق ومطربات العمر=ما لهن عند مجنون العواطف وزين حسنهن فاق كل الوصف يآسر أسر=لومدحت العيون تلومك الحاجبين شعر خمري ليا ناداك يآمر أمر=لختلط مع شروق الشمس عيًا يبين لاشلعه الهبوب لفوق عوًد حدر=وكل ما هزته نسمات يرجع يزين لارتكز عودها ياصل لحدر الخصر=بينه وبين روس اردوفها بوصتين سايحٍ فوق متنه ما يبي له ظفر=لانسفته سرق راس النهد خصلتين ظلل خدود لاهن بيض لاهن حمر= خوخ شامي يموع ليا لمسته يدين بينهن مبسمن لونه بلون الجمر=يلعب بحسبة اللي يذكر انه رزين وجيد ريحه طبيعي عاف ريح العطر=كيف يحتاج طيب وريحته ياسمين والصدر آآه عزالي وصلت الصدر=طالبك عطني اخباره على دفعتين اتق الله فيني واخش يوم الحشر=شرع ربي يحرٍم ذبحة المسلمين ان وصفته اخاف يضيع منك الاجر=يا رجل خل عشاق النهد غافلين غالت الثوب بردوفه الين انثبر=والعباة ارغمت كل المحاسن تبين تزعل ان وصفوا حسنه بنور القمر=من يلومه وهي تفرق طراوه وزين لا تسبه بطول ولا يعيبه قصر=كامله والله الكامل على العالمين من خذاها دعن له عجز ليلة قدر=ساعة الفجر يوم ان البشر خاشعين بنت تفرح ليا منك نويت السهر=نومها لو يطوٍل ما وصل ساعتين العمى لو يشوفه رد فيه النظر=والمفتٍح يطيح اعمى من اسبال عين منوتي ماربت با الشام والا مصر=مسكنه منطقة (....) واهلها قطين البدو ما يقارن زينهم با الحضر=حكمةٍ سامعينه من قديم السنين

ان ضعت عني جيبي اخضر سفاري ..!!!

	ناوي تحداني اكيد انت مخطي=نصيحتي لا يقعد الشيخ ضاري الشمري دمه ماهو حسبة المي=ابيك تدري كان مانته بداري لا قيل لي شبل السناعيس يكفي=مادمت انا منهم يزيد افتخاري تبي الكرم والطيب انا من جبل طي=ومن دون حقي مثل شبل الضواري وقت اللكاعه مابه الكع مني شي=وقت السهاله كني النهر جاري لا حرتك شمسك ترى شمسنا (في)=وان ضعت عني جيبي (اخضر سفاري) مرسل شبيه لمرسلك توك صبي=ما هو قفاك الهرج خذها جهاري ابيك يا مرسول الانذال تدري=ان الجراذي مسكنه باالمجاري انته بعيني منتهي قبل تبدي=قبل تسلم تعتبر شخص ساري يا مبحرٍ با الزور مرساك باالغي=سفينتك ما له شراع وسواري والنعم والله في هلك ميٍت وحي=اما انت ما اسلم عليك بيساري مرضك غيره لو بداويك با الكي=(زعل الجمر) ليش اني ارخصت ناري لو يطلب انك تمدحن طالبك عي=مدحي مسبه لاحصل من خكاري الله وهبني قاف للعقل يسبي=راضي بحكم الله ماهو قراري مع الذي يستاهل العشره امشي=اما الردي ما له على البال طاري لا صرت مخطي قلت يا ناس مخطي=الاعتراف يزيد كامل وقاري

قصيدتي عند زيارة خادم الحرمين لمنطقة حائل..!!!

	امطرت حايل بمقدم امام المسلمين=يوم ابو متعب نوى درعمت شعبانها ماهو وقتن للمطر امطرت من شان عين=لا حضر صقر العروبه جرت وديانها مبطين عنها وهزه لشوفتك الحنين=دوك الارض تفز لاشاهدت خلانها المحبه خصلتن فيك يا القرم الفطين=المحبه ما تبي غير شخصن صانها وانت مالك با الغلى يا بعد حيي وزين=يمدحك فعلك وعطفك على سكانها الغلى ما جاك صدفه بنيته من سنين=قبل ما تصبح ولي عهد كنت لسانها اسال اهل المملكه عن محبتك ويبين=الصغار يقدرونك قبل شيبانها القياده مهرتن وانت فارسها الرزين=ما عسفها غير من جوده برسانها با السما صقر العروبه ومن حولك عرين=عادة الليث المحنك يصيد سمانها فيك رحمة والد وفيك حزم وفيك لين=الصرامه والعفو حنكتك ميزانها القصايد فيك تختال حسن وفرط زين=لو نحاول نختصرها عصت قيفانها الله يبهيك يا سيدي دنيا ودين=وجعل حايل دايم تزورها فرسانها ما يشيب الشعر في مدح من حبه دفين=ولا تفوت المرجله من ربى باحضانها يا مترجم كل شخصن غدى هرجه رطين=ما حدن يطمع بنا لا حميت اركانها الحكم من دون حكمتك ما يملك يدين=والعدل من دون من هيبتك ملك اعيانها

يــــــــغار (محـــسن) أو يــــــــغار (ابن لعــــبون)..!!!

	يا عزوتي لا يقفل الخط تكفين=خطٍ وصلني فيك خلٍيه مشحون حطيه صامت لانويتي تنامين=ماودي العذال لادق ياعون واذا صحيتي طالعي فيه تلقين=الف اتصال من الذي فيك مفتون ومن الرسايل تتعبي لو تعدين=الذاكره ما خزًنت غير مليون اعرف منهو يا غناتي تحبين=اللي تحبينه غدى فيك مجنون وادري بانك يا غلى الروح تدرين=عن ما بقلبي من تباريح وشجون واني اسير الوجد والسهد والبين=وان الفواد لدانة الغيد مرهون سوي بي اللي تشتهينه تمونين=هو فيه غيرك يا بعد روحي يمون يا من لها مسكان في داخل العين=ما فيه غيرك شخص اسميه مضنون ما دمت احبك يا الغلى لا تخافين=خلي جميع الناس با الحب يدرون انا اتحدى بك جميع المزايين=يغار محسن او يغار ابن لعبون دام الغلى ما بيننا زين في زين=وحنا مثال لكل منهم يحبون تدلعي بمشي على ما تودين=محلى الدلع لاصار راعيه مزيون

(ابيات من قصيدتي : هل من سبيل للوصول اليك !!!

	كل الزهور تغار من خديك=والورد يبسم من على شفتيك اما البنفسج قد جفا اغصانه=واحب ان يحيا على جفنيك والبلبل الغريد يشدوا هائما=هل من سبيل للوصول اليك الليل يغفوا حالما في شعرك=اما النهار فذاك من فوديك اني احبك والفواد اسيرك=والاسر يحلوا للاسير لديك في اي امر تبتغينه طائعا=ساقول مهما تأمري لبيك الروح والقلب المتيم با الجوى=والهائم الحيران ملك يديك

الفخر للي مرضين والدينه ..!!!

	الموت حق وكلنا ذايقينه=والناس كلن له ذنوب وخطايا عزيل حي(ن) شافت الموت عينه=ينطر متى تصدق وعود المنايا يعيش في جرح وعذاب وغبينه=روحه تعنت من ثقال الرزايا ما فيه من حوله رجالن تعينه=الياس سوى في خفوقه سوايا بسباب فزعاته توطاه دينه=خانوا مقامه حاضنين الصنايا يوم الدراهم ماليات(ن) يدينه=والناس تضرب له سلام وتحايا الغالي احمد ما لقينا وزينه=شيخ(ن) ولد شيخ وسليل الطنايا ساعة نخاهم دحدروا من عرينه=مثل الــكــلاب اللي تشم البقايا ما للوفاء عند ارذل الناس عينه=جيش الكرم ضحكت عليه السرايا الهيس واضح والملا عارفينه=لو كثر المكياج عند المرايا لكن بلاك العقرب اللي بطينه=تلدغ رجول الامنين العرايا لا جاك ابو وجهين محلا رطينه=صديق في وجهي عدو بورايا حلو(ن) نباه وكل قلبه ضغينه=قد سجل اسمك في سجل الضحايا يسحرك با اسلوبه وعطفه ولينه=واحيان يحضر لك رخاص الهدايا وان جاك نصح من الذي خابرينه=تقول ذولا ناقلين الوشايا ما تدري انه هو خراب السفينه=نسيت يوم ان النوايا مطايا لكن مادام حبال وصلي متينه=مع الاله اللي يعرف النوايا وآمنت با المكتوب زينه وشينه=وادركت بان الله كفيل الرعايا مالي ومال اللي يساره يمينه=مادام قلبي ماسكته الحنايا كل(ن) له طباعه وفكره ودينه=وانا لي اللي عالم(ن) با الخفايا الفخر للي مرضي(ن) والدينه=ولا مات تبكيه المدن والقرايا