قل ماتقول بكل وصف وكل لهجه واصطلاح

لا واهني الطـيـر فوق الغيم خفاق الجناح=ماضاق في دور ظلامه مثل ظلمة دورنا
لا ضاق مايقعد بنار الغيظ لحدود الصباح=يكفخ ولا يحتاج بسبـور مثـل بسبورنا
ولايرتجي لأجل العمل فترة اجازات وسماح=او يشتكي حبسه بسور مثل حـبسة سورنا
يسري يطارد بارق من بعد نصف الليل لاح=قبل الصلاة وقبل ترجس بالدنين نجورنا
يلفح بجنحانه لغيث في دماث القاع طاح=مابات بهمومه بجحـر مثل ضيق جـحـورنا
يابوهلا يالذيب ضاق الصدر لا زل المزاح=هذي شهور القيظ جتنا عقب خـمس شهورنا
حنا تبعنا ياعضيدي هجرة طيور الفلاح=يمكن نشوف اللي على الهجره يحد طيورنا
معقول ناحت لاجل محبوب من الهجران ناح=او شوقها للقصر يشبه شوقنا لقصورنا
وان كنت ياطير السعد تشكي طواعين وجراح=فالجرح ياطير السعد يسكن بوسط صدورنا
وش عاد لو قالوا عصور العولمه والانفتاح=ماننفتح قبل انفتاح البحث حول قبورنا
لو كان مقبور العرب من لوعة الوقت استراح=من جرحنا اللي مابداه الطيب مع دكتورنا
مايصلحه تصريح قايد مع دراسه واقتراح=دام الكلام الواقعي ماعاد في مقدورنا
قل ماتقول بكل وصف وكل لهجه واصطلاح =دام البلد والشعب للحكام في دستورنا
راحت دعايات العساكر والامانه والكفاح=وصارت سبب ذل الشعوب وشرنا وشرورنا
وش عاد لو تسري ركايبنا مع الدرب البياح =وظهورنا ماتختلف بالوصف عن مظهورنا
كان العرب ماعندها للخصم ترسانة سلاح=وشفناه يظهر لاجل يقصف بالدجى جمهورنا
مدري علامه صامت واعراض الامه تستباح=والا القذايف ماتثور الا على ديكورنا
تشبه سلاح اللي سرق روحي برمشه ثم راح=اقفى ولا راعى قبل يرحل لجرح شعورنا
اللي رمى قلبي بناره عقب مازاح الوشاح=واحرق بنظرات الحلا والزين روض زهورنا
حبه رماني في معاليق الحشى عدة رماح=ماجيت دربه بس حظي حطها بنحورنا
ليتي تركت الدرب عنها يوم شفت العطر فاح=مادام عطر الزين عيـا يندمج بعطورنا

صح لسانك

قصيده جزله ومعناها جميل


بانتظار ابداعاتك

يامرحبا بشيخ القصيد ابن غسلان
مبدع بكل حالاتك عمي صح السانك
تقديري لك

صح لسانك شاعرنا وراوينا أبو / فهد صدقت وتصوير واقعي من الواقع سلم راسك ودمت بخير ,,,

الشاعر فواز الغسلان
صح السانك ملايين ولايكفون يابعد حيي
تقديري لجنابك

فواز . كيف الحال يافواز؟. شفت السد باح = ياعيلمٍ تشّر له أصباع الوفاء بعصورنا.
بذلت جهدك والكمال لمن فلق بحر وصباح= صح الله لسانك مدام أيامنا بشهورنا.

:


.


:

صح بوحك
ابيات قمة الروعة

شكري

شاعرنا الفاضل

ابو فهد

صح لسانك وعلا شانك


لاهنت

دام البلد والشعب للحكام في دستورنا

في الصميم

ابو فهد ﻻفض فوك يالجزل

لك كل الشكر

الراوي والشاعر الكبير ابو فهد

صح لسانك وطاب فالك نص فاخر ويحمل معنى قوي ورائع

سلمت ولاغرابه فأنت شاعر فحل وجزل ابدعت بالتصوير

تقبل مني كل التقدير