11-06-2007
|
#1 | |
|
((ياكليب شب النار)) وفرز كل القصائد المتداخله معها
دغيم الظلماوي من الشلقان من الزميل من سنجاره من شمر له القصيده المشهوره بالقهوه ومطلعها: ياكليب شب النار ياكليب شبه000 وقد جاراها العديد من الشعراء حتى بلغت القصائد ست فتداخلت فيما بينها لتشابه القافيه والموضوع ولعلي احاول توضيح الكل انشالله والبدايه بقصيدة الظلماوي لانها هي السبب فقد قال:
ياكليب شب النار ياكليب شبه =عليك شبة والحطب لك يجابـي وعلي أنا ياكليب هيله وحبه =وعليك تقليـط الـدلال العذابـي وادغث لها ياكليب من سمر جبه =وشبة الي منه غفى كل هابـي باغي ليا شبيتها ثـم قبـة =تجلـب لنـا ربعـا سـراة غيابـي بنسريةً ياكليب صلفا مهبه =لاهـب نسناسـه تقـل سـم دابـي سراة بليـل وناطحيـن مهبـه =متكنفيـن وشوقهـم بالعذابـي الوالمة ياكليب عجل بصبه =والرزق عند اللي ينشى السحابـي صبة لقرما صرفته ماحسبه =يوم البخيل مكنهب الوجـة هابـي وصبة لمنعورين ليا جاة نبة =يرخص بعمره والدخل لها ضبابي وعدة عن اللي مايداري المسبه =اللي يدور بالقصيـر الغيابـي عن الطيب عده نازلا له بغبه =يضرب علي درب الخطا مايهابي لا باطن الهلباج خطوا الجلبة =يا حلو خبط عصيهـم بالركابـي أطمر لهم وأبدي سلام المحبه =لا جو على هجناً يديهم خرابـي سلام أخلى من شخاليل جبه =وأحلى من السمن الجديد العرابي مع كبشً مصلاح راسه نجبه =لا أدبـر الهيـن متيـن العلابـي خطو الولد يوم الملاقي نكبه =يأتي علينا من حسـاب الزهابـي وحتى يش لو يلبس وبينن وجبه =معيرة على غضير الشبابـي أنا لقيت الصبر يازين غبه =يرقيك رؤوس مشمرخات الهضابي من لاصبر ياكليب في حكم ربه =هذاك يوم البعث ماله ثوابـي يقولها اللي ما حسب المسبه =ولا عرقل الاجواد ببعض الهلابي هذا هوى بالي وهذا مطبه =من قبـل مايسفـى علينـا الترابـي هذي قصيدة الظلماوي اللي تعتبر سبب تعدد القصايد على الطاروق هذا وذلك لكون احد شعراء شمر المشهورين والمقربين من ابن رشيد غار من الظلماوي وهناك من قال انه ماهو هو اللي غار وانما شخص اخر وشرط له فلوس اذا شتم الظلماوي ففعل بقصيده ضائعه ومنها:
ياحسين شب النار ياحسين شبه=بقصيصتن مابه دبيبن ودابي والا اخو ظلــماء لو دلالـه يشبــه=يذكر لنا دونه ثلاثين بابي قهاوي عند العرب ينصب به=ماهي قهوتك ياعريض العلابي يقصد ان القهوه عند البدو ماهي عندك يالحضري لكون الظلماوي كان في بلدة قفار ساكن0 وهناك من الرواة من زعم ان الظلماوي رد عليه بقصيده منها:
يا حسين دلوك ما تعــدى المصبه =من الحوض زلت زلفة بانكبابـــي جعله بديرة ٍظالمن ما تحبـــــــــه =تاتي ذلوله بس علمه يجابـــــــي يا حسين خذ علمي وبالك تكبــــه =افهم نبا من هو عطاك الصوابـي الموت يقعد لك ومالك يكبــــــــه =لو ان مالك كثر طش السحابــــي وهذا بعيد لعدم معرفتنا ابدا بهذه الابيات وكذلك اقارب الظلماوي ورواته كما ان الظلماوي مشهور عنه عدم الرد على اللي يتعرضه 00 فربما تكون الابيات لشخص ممن جاراهم في ذلك الوقت ولم يشتهر لاني رايت الابيات يوضع بها ابيات من القصائد الاخرى التي سأذكرها الان00 فكان اول المدافعين عن الظلماوي لبيد المتينه البلاز الشعلان الرويلي فقال مدافعا عن الظلماوي ضد من هجاه قصيدته المشهوره والتي كثيرا ماتتداخل مع بعض الرواة هي ومثيلاتها بالقاف :
يادعيس شب النار يادعيس شبــه=بين القطوب وطارف البيت نابي وقلــط ثلاثــن معـتـنـيـنن بـربــه=مبرقعــاتن عن دبـيـبـن ودابـي يحوفــهن رجلن بعيـد المــسبه=بعــيـد عن طـرق الخـطا والسبابي فنجالهن يوم المقهوي لعب به=يشبه خضاب مفلــجات الخضابي اليا اشلـهبـت نارهـن ثـم قــبه=تجــذب لنا ربـعن سراتن غـيابي بنسريتن يادعيس صلفن مهبه=الياهــب نسناسه تقل ســم دابي اليا بركن حطوا على النار ضبه=عقب الصرد لما تجف الثيابي واسرع لهم باللي على النار صبه=وايمر لهم باللي سريعن يجابي واذبح لهم كبشن عريضن ملبه=ونكــمل الباقــي حلاوة جوابــي العبــد ماله مــدتن دون ربــه=ولا مــد الا مــد منــشي السـحابي والا دغيم مخــطي من يسبه=ماقيــل هـون لو هـو انحـى وشـابـي لو هــو من العــدوان قلـبي يـحبــه=اللابـة اللي ماذكـر به خيابي يـذكـر لنا عند الضيـاغم مربـه=وساع الـطعـون وملـقمــين الحرابي وهي قصيده تعتبر من اروع القصائد لكونها تحتوي على معاني رجوليه ومحبه للطيب والصخى ولاهله ايضا حتى لو كان خصما وذلك في مثل قوله ( لو هو من العدوان قلبي يحبه ) وتعطي درسا لجيل اليوم من القبيلتين ممن تأثروا بمنافسة عنزه وشمر في السابق على الطيب والمرجله وتوضح لهم انها كانت بسبب طيبهم هذه المنافسه وانهم انفسهم كانوا يحترمون بعضهم ويعترفون بالطيب لبعضهم البعض00 ثم قصد الشاعر ابن ثويني من سكان ( قصر العشروات ) الواقعه جنوب حائل حوالي عشرين كيلومتر وكان اميرها ( القبالي ) لذلك نسبوا هذه القصيده للقبالي لكونهم يقولون راعي القصر فيتبادر الذهن انها للقبالي التميمي والصحيح انها لابن ثويني فقال :
يا علي شب النار يا علي شبــــــه =ليا مال في بمــشرخات الهــضابي وادغث لهم ياعلــي من رمـث خــبه =قلط ثلاث لونــهــن كالغرابــــــي حنكية ٍ ماتنجلي لو نربــــــــــــــه =بلغودها تلقى سنا النار صابــــي يا اللي تقول النار كلن يشبـــــــه =الفرق بالمنبى ولين الجنابـــــــــي زادك وميسورك ولين المحبـــــه =أخير من كبشــن سمـيـنن يجابـــــي ان سمح الباري وسانع مهبـــــه =نقــضب مكان الشايـبـبـيـن الغيابـــي باغٍ اليامن من السنين اشلهبـــــــــه =وجو مفرغين محتتين الزهابــــــي اظهرت للعطشان فرغ المصبـــه =لزمــالتـه بارض الخـلا لا تهابـــــي دنياك ما عمّر بها كود ربــــــــه =الواحــد اللــي واعــدك بالحسابــــي المــدح دربه هيّن ٍ والمسبــــــــــه =والطــيب وعــرن والمراجل صعابــي وش عاد لو لك غرســةٍ تقل غــبه =دبسه تشوفه مع عروض الجوابـــــــــي ما تنهــج الا في ذراعيـن خبــــه =وخـمسك ومــامــدت يميــنك يجـابــــي طيــبـي وطيــبك بـيـن رجلـيك كبه=لاجــت بـهــم فاللــد لـك والــهـبـابي الضيـــغــمي حاز المراجل بعـبــــه=وحنـــا نلــقـط مــاوقـــع بالتــرابــي ثم قصد الشاعر بدعي ابن سمحان السلماني الشمري وهو من فحول شعراء الزميل وشمر بشكل عام وقيل ان الظلماوي ارسل له ينخاه بابيات منها:
انخى الزميلي مسندي وابن سمحان=والمغفلي واللي يحامي عليه للي على دقـــمه بشــره تبـــلان=لاله علي شي(ن)ولا له جنيه الا ان الرواة المقربين انكروا معرفتهم بهذه الابيات وقالوا ان الظلماوي لو رغب في الرد عليه لكان رد هو بنفسه دون الحاجه لنخوا احد يرد عنه00 والابيات اخذتها انا نقلا عن عبدالله بن حمود السمحان وهو من عائلة بدعي بن سمحان واعرف الناس بشعره وربما ان اقارب الظلماوي لم يطلعوا على الابيات لكونه ارسلها بسرعه ولم يذكرها لاحد00 خاصة ان ابيات بدعي تفيد في مطلعها ان الظلماوي نخاه لانه يقول:
جاني جوابن من رفيقن ينبه=دغيم ينخــاني قال رجلــن حــكابـي دب(ن)سمينن رابي(ن)له بغبه=لايزملك لاياعزيز الجنابي لو كان يقرى الزلزلة هي وتبه=ماكان من يمـــك يحـث الجوابي قهوة الامير محمدن ينصب به=وش عاد لو دونه ثلاثيــن بابـي وهل الصفاة وحضرنا اللي بجبه=هل البيوت اللي تشادي الهضابي كل(ن)قهوته تعجبك لو تطبه=ولو هو ضعيفن للندى مايهابي ورفيقك يادغيم عرفنا لطبه=عرض وانا لاجلك قضعته بنابي انا بعينه تقل ملحن وشبه=يادغيــم دون ربوعنــا مانهــابي ومن قال دادا جعل رمحن يدبه=مضرابه الابهر غميق الصوابي وتركت بقيتها ثلاث بيوت عمدا00 وقوله (هل الصفاة ) يقصد اهل بقعاء وجبه معروفه هي واهلها وطيبهم الله يسلمهم جميع00 وقال سعد بن مسعد الايداء العنزي قصيده يجاريهم ايضا:
يا عيد شب النار يا عيد شبــــــــه =قلّط دلالٍ مكرماتٍ تعابــــــــــــــي واسمك ركون البيت واذروا مهــبه =ان هبت الشمطا علينا انحطابـــــي اقصر بماها ثم زيدوا بحبـــــــــــه =يصبغ على الفنجال لون الخضابي درهـا على المجلس بلطــف ومحبـه =فنجالها يجلا عن الوجه غابـــــــي يديان شيختهم بالادوار عبــــــــه =اهل بيوت ٍ مثل لــون الهضابــــــي نصبر على نقل الخسارات دبـــــه =أول الى التالي شياب وشبابــــــــي انهــب من الدنيا قبل ما نكبـــــــــه =ومن قبـل ما يرجد علينا الترابــــي وهكذا تتوضح القصائد وهي ست قصائد كالتالي: الظلماوي-رد الظلماوي المنسوب-رد ابن بلاز العنزي-رد ابن ثويني=رد بدعي بن سمحان -رد الايداء00 هذه معلوماتي المتواضعه عن تداخل القصائد هذه ومن كانت لديه ملاحظه فليذكرها للتصحيح وعموم الفائده والسلام000 |
|
جرح العرب للي من الجرح داواه=واللي من جروح الليالي يشيله
ان ماوصل للي وصل له وساواه=حط الافاعي بالخفى في شليله
التعديل الأخير تم بواسطة فواز الغسلان ; 11-06-2007 الساعة 10:23
سبب آخر: مطبعي
|
 |
| مواقع النشر (المفضلة) |
| الذين يشاهدون محتوى الموضوع الآن : 1 ( الأعضاء 0 والزوار 1) | |
|
|
إن جميع ماينشر في المنتدى من أشعار ومشاركات ماهي إلا نتاج أفكار تمثل رؤية كاتبها فقط ولا تمثل رأي المنتدى
(رأيت الحر يجتنب المخازي.. ويحميه عن الغدر الوفاء.. فلا والله مافي العيش خيرٌ.. ولا الدنيا إذا ذهب الحياءُ)
المشرف العام
العرض العادي
