لاتجي بيت العنود ولا تمره

السلام عليكم ورحمة الله وبركاته

لــقد تفاجأت عندما قرأت ديوانا لأحد المعاصرين فوجدته قد نسب القصيدة المشهورة والتي

مطلعها :

لاتجي بيت العنود ولاتمره والحذر ياللي على عمرك تداري

نسبها للشاعر سعود العرافه وأن العنود هي أبنة عمه والصحيح أنها عبارة عن أربع قصائد

وردت كمساجلة بين كل من عباس أمين من أهالي الوجــه ومحمد الخميس البقعاوي

ومحمد الديري من عتيبة وأما العنود فهي بنت حطاب النصافي وكانت تسكن في قرية لينه

وجدته قد جمع من هذه القصائد عدة أبيات متفرقة ثم نسبها للمذكور والصحيح ماذكرت

واليكم القصة والقصائد .

في عام 1365هــ كان عباس أمين مدير مالية الدويد عندما كانت الدويد عاصمة الشمال

قبل انتقال الدوائر الحكومية للحدود الشمالية وكانت العنود قريبة من الدويد وتتصف بالجمال

الباهر وكان عباس معجبا بها فدخل عليه محمد الخميس ذات يوم وقال له عباس من أين اتيت

فقال ذهبت لأرى العنود فقال عباس :

لا تجي بيت العنـود ولاتمـره=والحذر ياللي على عمرك تداري
فر قلبي يوم شاف الزيـن فـره=فر طيرن شايفن جول الحبـاري
قلت عطني من ثمانك بس مـره=قال مايكسى العرا ثوب العواري
العنود سهيل والبيـض المجـره=فرقهن فرق الفتيل عن السواري

فأجابه محمد الخميس بالحال :

ليه يا عبـاس بيتـه مـا نمـره=كيف تنحى واحدن للزين سـاري
كنت اظن انك صديق وبك مبـره=ما دريت انك عدوا لـي مبـاري
الحيـا لـو انتحـا لازم نـمـره=وما قسم الله على المخلوق جاري
العنود سهيل والبيـض المجـره=بس يفرقها الزميـم والخـزاري
يوم لبست ثوبها الاحمـر ومـره=يا شبيهت مهرتن للشيخ ضـاري
مع سواد عيونهـا محـلاه غـره=مثل لون البـدر بايـام الغـداري
كم قلب موجـل قامـت تجـره=عرضتها الجال ودروب الخطاري

وعندما اشتهرت الابيات عند الناس غضب محمد الديري العتيبي على عباس لأنه

فضل العنود على جميع البنات فقال غاضبا :

العنود سهيل والبيـض المجـره=اخس ياعباس ماتدرى المـداري
انت يا عباس غادي فـي مغـره=قلت قولن مانت عن قصياه داري
تحسب الدعوى على قانون حره=وانت معك الفين ورادن مبـاري
يمكن انك ذايقـن منهـم مبـره=من طرف لازمك تمدحها جهاري
يذكرون العيش بهدومك تصـره=يمها شافوك بالبخشيـش سـاري
حالفن ما اتركك يا عباس مـره=لين تابس مثل دغلوب الخبـاري
ما ظلمتك بس انا جيتـك بجـره=والعرب بسلومها تتلي الأثـاري

فقال عباس امين لمحمد الخميس جاوب عني واعطيك اجازة شهرين تذهب الى اهلك لبقعاء

فقال محمد الخميس ردا على محمد الديري :

تو ماهب الهـوى والعيـن قـره=واستراح القلب من كثر الهـذاري
يـوم بـان الــهـرج للــفـزاع ذره=تو هذي بـه يـدور لـه مبـاري
فزعة الديري مثل غزو الصفـره=تو يكرب محزمه عقب القطـاري
يذكر انه موقفـن بالشعـر مـره=والرخم سلطان في وسط الصباري
جنب الديبان واترك عنـك شـره=ياردي الفود وش لك بالخطـاري
لو تحصل مثلها ما صمـت غـره=كان تسري بالظـلام وبالقمـاري

وكما ترون فأسماء أصحاب القصائد مذكورين فيها ولامجال لأنتحالها

وبالله التوفيق



اخوكم فواز الغسلان

الراوي

مشكور يالغالي

ردية حلوة ورائعــــــــــــــة

لو تحصل مثلها ما صمت غره
كان تسري بالظلام وبالقماري

فيه شي هاليومين إسمه اقتباس ههههههههههههههه

الله يعطيكـ الف عافية تقبل مروري

تسلم على هذا الإيضاح يابوفهد
دام قلمك وسلمت اياديك يالعزوة


لك كل الود

يسلم قلبك يالراوي
مشكووووور على هالطرح الجميل

رحمك الله يامحمد الديري رحمة واسه

هذا حقك علينا يالشريف

00000000


ابوفهد

تسلم يمينك على التوضيح

والايراد الطيب


وياليت مايسكت عن الي ينسبه لنفسه .

مبدع في كل حالاتك


الله لا يهينك يا بو فهد ولا تحرمنا من هذه القفشات الجميلة

فزعة الديري مثل غزو الصفره
تو يكرب محزمه عقب القطاري

هههه..هالبيت .. فدغ سبدي ..من الضحك ..

الله ... يرحمك يابن خميس .. ويرحمهم جميعاً..

أبو فهد ... راوية الجبل ... دائما ... تأتي ... بالنجوم ... لتضعها بين أيدينا ...

ربي يوفقك ... على ماتقدم ... من قصص .. ومن حقائق ..

تقبل مروري ,..

ودمت بحفظ الرحمن ..

احسنت الاختيار يابن غسلان



تسلم يمينك ياخوي


دمت بإبداعك

اقتباس المشاركة الأصلية كتبت بواسطة الغريب مشكور يالغالي ردية حلوة ورائعــــــــــــــة لو تحصل مثلها ما صمت غره كان تسري بالظلام وبالقماري فيه شي هاليومين إسمه اقتباس ههههههههههههههه الله يعطيكـ الف عافية تقبل مروري

حياك الله اخوي الغريب ومشكور لاهنت

تحياتي العطره00