ديوان الشاعر / عبدالله بن طلال

السلام عليكم

والله يالربع كان ودي ان اول مصافحه لي في المنتدى تكون جديده وحصريه

لكن الوقت مضايقني وماكتبت شيء جديد

ارجو ان تتقبلوا هذه القصيده من ارشيفي والعوض بالجديد من الجايات انشاء الله

مرّت سنه !!!

	مرّت سنه والقلب (مِحْرِمْ وصَايـم) = يِخيلْ بَرْقْ الوصـل حولِـك ويمّـكْ أحيان جـوّه عَـجّ واحيـان غايـم = وحاديه وقته عـن مواريـد جمّـكْ ميّت على شوفـك ومغـرم وهايـم = ودّه بقربـك ، و إيتمنّـى يضمّـك وإن طعتنـي دامـه يـردّ النسايـم = (إلحق عليه) ان كان وضعه يهمـكْ؟ ما عاد يسمع فيـك ناصـح ولايِـم = اهـل الـدوادي و الكـلامْ المنَمّـكْ انـا و عذّالـي مـا غيـر إنتزايـم = ولا أسمح لأحد منهم بكلمـه يذمّـكْ وان قلت دلّونـي علـى حـلّ دايـم = قالوا لي: (إنسه والعوض بنت عمّكْ) متى على الله يصبـح الحـظ قايـم = بقـدرة كريـم انـه عليّـه يلمّـكْ بأمره .. يسوقك من يسوق الغمايـم = من بعد مانبدي على أبـوك وأمّـكْ بالمال , وإن عيّوا , حَذفْنا العَمايـم = تجي معي لازمـك بأطـراف كِمّـكْ نفـرح بجمعـة شملنـا و إنتلايـم = وننسى العذاب وكـل همّـي وهمّـك كنّي بيوم (النصْرْ) وأنت (الغنايـم) = لاصِرت في بيتي .. بلحْمِك ودمّـك

بسم الله الرحمن الرحيم

تواصليه ..

حماقة جحا !!!

	ياسيّدي .. طاحتْ الحَبّه بوسط الرّحا = والحَبّ حاول يقاوم .. لكن إنّه ، بَحَلْ كنت اضحك العام واٌقرأ عن حماقة جحا = واليوم مالي عن الواقع هروب و ، محل جيتك سواة المزون وكل سيلي نحا = وابرقت وارعدت لين الارض صارت ، وحل ثلاث اسابيع جوّي غايمٍ ماصحا = ومشاعري فوق ريضانك بردها ، يحل لاعاد تلعب بقلبي بين غُنْج وسَحا = ولاتحسب القلب ورده ، وانت صاير ، نحل لو هانت قلوبنا ، ماهان شعر اللّحا = شعر اللّحى مايهون براس قرم و فَحَل أشرق بشمسك على ريضان قلبي ضَحا = او قل لي : إرحل ولا تبكي على اللي ، رحل رح عني أبعد من اللي قيل ذكره محا = و اروح عنك ابعد إمن سهيل ولاّ ، زحل

وسلامتكم

السلام عليكم

وارجو المعذره اذا كان مكان المحاوره ليس في القسم المناسب من المنتدى .. والقرار لكم بنقلها

محاوره مباشرة بين عبدالله بن طلال وفايح شداد

عبدالله !!!

	سلام والمسلم على السنّه ومبداه السـلام = واللي من الشعّار ودّه يمسك المايك يقـوم نبا نسوق القاف بالمعنى على صفحة سنام = وناخذ ونعطي بالكلام ولا نبيّـح بالعلـوم

فايح !!!

	يامرحبا بالشاعر اللي جاء على حسب النظام = لو كان غير في النوايا البيض وإطبوع السلوم عبدالله الروقي يحسب انه يجمل فـي المقـام = ترى الحقيقـه مايـرد العلـم قـدام القـروم

عبدالله !!!

	ما انته بأخو عنتر ولد شداد يالقرم الهمام = لكن فيك اطبوع من عنتر ليا شن الهجوم ترى المعاني كلها يا صاحبي فوق الحزام = ماينضرب تحت الحزام الا الهلايم والرخوم

فايح !!!

	ترى الليال البيض معروفه من الليال الجهام = وانصحك ياطير النهار اليا بغيت تحوم حوم مابغاك ياعبدالله الروقي تدور فـي الظـلام = اطلع معي قدام وابشر بالسعد عندي وروم

عبدالله !!!

	الوقت يافايح تغيّر والسماء وسطه عسام = حتى البواخر فالبحر يا صاحبي عيّت تعوم البشت والشنطه مع الرجال مافيها كلام = والمشكله كان انها وصلت ليا فرك الخشوم

فايح !!!

الوقـت لابـد يتغيـر مــار لله الــدوام = ليه الرجال اللي تغير في الفعول وفي الهدوم؟
قلي وش اللي صار هاك اليوم قـدام الكـرام = حتى اني ارضى عنك يارجال واقول محشوم

عبدالله !!!

	ما صار غير الطبخه اللي لا حلال ولاحرام = وكر الحرار اشوف فيه غراب مدري فرخ بوم والمشكله لا جيت اقايسها على سعر الدرام = اشوف نفسي صايرن مظلوم جداً وإمهضوم

فايح !!!

	الظاهر انك لو تحوش من الغرام احلى الغرام = وإذا استرحت من التعب ياصاحبي لازم تقوم دكتورك اللي ينصحك اياك عرشـك للعظـام = وانته ماتشبع من عظام ظبا الديار ولا اللحوم

عبدالله !!!

	مادام للعساف بشت وللبشر قلّ احترام = اموالنا ضاعت وحنّا لا نبيع ولا نسوم وضّحتها لك يالعصيمي جعلها برد وسلام = واختامها عندك وانا يالقرم وفيت اللزوم

فايح !!!

	مدامك تضيف يابو طلال ضيفك ماتـلام = يمنا ً نديه ماعليها لو صاحبها محـروم انا التمس معناك يارجال والمسك بكـلام = ياجعلها في قلوب خلق الله ياعبدالله تدوم

السلام عليكم



الصوت منّي موجّه لناصر الهواوي العتيبي ..

ارجوا ان تنال رضاكم

الرنج والميراج!!!

	سلامي سلامٍ ناعمٍ كنه الديباج = على اللي عن الطالات ماتقصر اشبوره على المزحمي ناصر على مسندي هدّاج = ابن روق والتاريخ يشهد على دوره يابو عبيد لا تذخر بجودك على المحتاج = الاضلاع محتله والأحوال مستوره على ثومة القلب الخضر يلعب الطرباج = وعلى الخد مزنن يلتعج ما طفا نوره وانا صابني في تالي الوقت نوع اخلاج = خلاج الحنون اللي على الفقد مجبوره ابي رفقة اللي رفقته للصحيب علاج = رفيقن ليا مني زهمته خبط زَوره الاقي لياشفته لكل الكروب إفراج = و اماشيه و اسمع هرجته و استمع شوره مثل واحدٍ شرواك له سيره ومنهاج! = شبيهك وطبق الاصل والصوت والصوره! انا ما اعرف امثّل ولا ادري عن الاخراج = ليا جاني الهاجوس وفيّت مقدوره ما اعرف اهل المكياج ولاّ هل الدبلاج = ادبلج حسب عرفي والاجواد مشكوره ابا انخاك تفزع لي على الرنج والميراج = وبفزعتك تصبح كل الامور ميسوره تراني نخيتك والنخاوي لها منهاج = ومنهجك يا ناصر مورّخ بسبوره رساله تخصّك ما يسولف بها الهرّاج = والاصحاب فرحانه والاعداء مقهوره

وهذه مجارات ناصر الهواوي!!!

	هلا عد مالاح ال بروق الحيا وهاج=وعدد ما قرا القاري من الذكر من سوره عسى الهجس يملي ما بغيته بدون ازعاج=ولا يترك خويه هالمساء عقب جا دوره والعل القلم يصبغ بياض الورق بالزاج=وياليت القريحة تصخر القاف مشكوره نسيم الصبا ذعذع وريح الخزامى فاج=من الشرق روضٍ غاشنه فتّق زهوره زمرد وياقوت وذهب في خزينه عاج=دزوها هديه لي من الشيخ مذخوره استقصا عددها واغلق الباب بالمزلاج=وقال ادخل لو ان الباب رزته مكسوره وحاولت ادرجها الهوينا حسب ما احتاج=ما اوطيها الحفى والبكر ما ينكسر كوره ما ظنيت انا بيني وبينك عتب واحراج=لويش الضباب اللي يضلل على الصوره علينا نسج الرجل لا وافقت مسهاج=والمذهب حشا يلقى الذهيبه بلا دوره ونجرب حلول ومثل ماقالوا الهراج= ان ما عشرت ما ضرها شعيل في زوره ونبا نبذل المجهود ونحاول المخراج=وراها وراها سعي لو لفت الكوره وانت اوط وتثيقل والولي بيده الافراج=ولا ينلام عودك لا بذل معك ميسوره انهيت القصيدة عقب ما انتفخت الاوداج=مجهود المقل وسيرة النقد محضوره

مجاراه منّي للعلم / سعد بن جدلان

ابو محمد يقول :


بن جدلالن

بن جدلالن!!!

	انا ويـن ابلقـا يالاجاويـد فاعـل خيـر = حريـصٍ علـى سـر المحبيـن لرسلتـه امن اول لو اصبر عام ما بان بـي تأثيـر = وهالحين حتى صبر يوميـن مـا احتلتـه انـا مثـل صقـارٍ تولّـع بحـب الطيـر = ولف قلبـه افـروخ الشياهين وهبلتـه تولعت فـي فـرخٍ قضيـبٍ يتـل السيـر = ابي لمحـةٍ مـن نظـرة الحـر وإسبلتـه صغير بسنه غير عندي ماهوب اصغير = يا مغلاه فـي قلبـي ويـا كبـر منزلتـه اجمع له سمان الهرج خـوفٍ مـن التقصيـر = والا جيت ابشرح لـه كلامـي تهيزلتـه يجيني منه هيبة محبـه.. سحـى.. تقديـر = اقابلـه عنـدي علـم واروح مـا قلـتـه

وانا اقول :!!!

	انا لا لقيت الشاعر اللي فنونه غير = تعاينت فالضلع الطويل وتناولته احب الصقور اللي لها واجب وتوقير = ولا عمر شوفي رام عالي وما طلته صحيح ان بن جدلان قمّة من التصوير = يصوّر خيالٍ ليتني ما تخيلته ولكنّ طيره غير وانا مرامي غير = مرامي غزالٍ شفّ عيني مغازلته اذا نمت قام يدقّ بين المحاني زير = و إذا قمت صرت اعيد حلمي من اولته طعني برمح ذياب مدري بسيف الزير = واحب اشتكي له مير ما اقدر مقابلته عسى اللي منعني عنه يُسجن بلا تقرير = ويُرمى بسجن ويِنجلد فوق طاولته

قصيدتي ، الموجهه ( امس ) لاستاذي الشيخ/ زيد بن راجح شاعر قبيلة البقوم الله يحفظه ويرعاه ولاعدمناه :

يا زيد بن راجح!!!

	يازيد ابن راجح تحيّه من الجوف = انقى من الحب النقي والمودّه تبرق على نجران والعالم تشوف = وترعد على الدمّام و اتسيل جدّه ضبابها يجتاح عرعر مع الجوف = وهتانها يمطر على نجد مدّه ياشيخ .. حنّا ما بلانا من الخوف = كل البلا من بايعين الأشدّه احلامنا ضاعت على سوف ما سوف! = مابين ابو كرشه ومنفوخ غدّه! واجيبونا ماعاد تومن من الحوف = ومانعرف المبغض من اللي نودّه؟ ما عاد نلقى بعض الايام مصروف = من سبّة اللي ما يحيط اسم جدّه فارٍ تجنّس يقرض القطن والصوف = لارحنبو من بادله بالمودّه ما اقول غير الاصل له دور معروف = و لابد للغلطان ياقف بحدّه وتفنى الليال وتالي الكدّ مخلوف = جعل الحصيل اللي فقدنا نردّه

وهذا صداه الجزل وصح لسانه دوووم : !!!

	من نجد ذعذع تالي عصيـر هفهـوف = يـا حلـو ذعذاعـه ويـا حلـو نـدّه فزيـت لـه فـزة كريـم ٍ ومضيـوف = تقـري تراحيبـه لهـم قبـل مــدّه يا بن طلال الوقت سجـات وصـدوف = يبنـي مـن الاحـلام قصـر ويهـدّه والناس كل ٍ عنـده همـوم وظـروف = تعيـش والدنيـا سهـالـه وشــدّه واللي يسوي في هل الطيـب معـروف = مـا ضـاع معروفـه ولا خـاب كـدّه مير أنت خلك سيف في خزنة سيـوف = في نجد مـن عرجـا لمركـز مصـدّه لـون شفـك عندنـا وافـق شفـوف = ريع الجهـل لـو ينفتـح مـن يسـدّه والناس تحت الله مساكيـن وضعـوف = وكـل ٍ مثـل مــا قـيـل ودّه وودّه وكانك تبي من كتف زومان غضـروف = غيـرك يبـي زومـان كلـه بـبـدّه واللي عن أخطاء الناس ماهوب مكلوف= = قولـه تمعـن فيـه وافهـم مــردّه

تهنئه للغاليه على قلبي ( شوق )

الله يحفظها ويجعلها قرة اعين لوالديها

حبيبتي شوق !!!

	عيدك مبارك ياغلا القلب يا شوق = الله يصونك في ذرى ابوك وأمّك من لا يحبك محرمه ربي الذوق = حلا وصوفك كمّله خفّ دمّك الابو مطلق والعزاوي ولد روق = فداك روحي يابعد روح عمّك مادام ينبض في حناياي معلوق = تدللي يابنت لا أحدن يهمك

من جديدي ارجو ان يروق لكم

على الدّين والعرف !!!

	عسى القلم والطّرْس والحبر والزّرف = فدوة عيوني يوم اقول الصّراحه ما دامني ماشي على الدين والعُرف = و رازقني الله بالوفا والسماحه ابا ارتكب في مِجمل احروفي السُرف = واقطف وسام الشعر والبس وشاحه عاداتي اغرف من بحور الشّعِر غَرْف = دام الدروب السبع لي مستباحه! يمناي ضاريةٍ على المدّ والصّرف = و خيلي لها بالسّاحه اكبر مساحه وما الوم من يبكي على ناعس الطرف = وما احبّ من يصبح وهو في مِراحه يمسي على مَلّه وياقف على جُرف = ويكتب بدون احساس ولا فصاحه انا ليا مني بغيت أصْخَر الحرف = أسايره لين اني اضمن نجاحه! مهما يكون الوقت والحال والظرف = اعرف قوانين السفر والملاحه و لا خير في من لافتح لزقة الزرف = ما بل كبده من مشاشة قراحه

وسلامتكم

مهما يتوارى العضماء خلف الثراء ؟ فلن ننساهم ما حيينا



من جديدي ارجو ان يلامس الذائقه

فيصل وناصر وصدام !!!

	والله يالولا انّي على دين الاسلام = لامداني اذبح للتعاسه عقيقه اثر البنادم لو يصلي ولو صام = يلعب به المغوي ويخلف طريقه يفرك طرف سبّابته فوق الابهام = و يسجد وفي راسه صداع وشقيقَه والله ما غربل حياتي من العام = وخلاني اغطس في البحور العميقه الاّ لاقمت احسب صواديف الايام = وتجددت بالنفس حسره وضيقه تحداني العزّه على درب الآثام = واستغفر الله و اذكره في دقيقه وجدي على فيصل وناصر وصدام = و وجدي على راع العلوم الطليقه نايف فقيدتنا وحناّ له ايتام = عليه عيني من كدرها غريقه تبكي عليه القدس واليام والشام = وتبكيه الاعداء والبلاد الشقيقه انا اشهد انه كان وافي وضرغام = وعقبه تعبنا والحقيقه حقيقه

وسلامتكم