20-05-2006
|
#1 | |
 
|
الرجال شمــــــال والابل جنــــــــوب
 هلا ومسهلا والف مرحبا بالربع اللي يسند عليهم الرفيق وترحيبه لكل عينن تلفت النظار ولكل زين يجذبك بطيب منبته وفوقها الف ترحيبه تلحقها بعد الف لكل داعج عينن مستتر في بيوت الطيبين الطيبين ويجي عقبه ترحيبة شيوخ لكل من زان له العلم وطرب له والحقها من عنده بعلوم الاولين اسعد الله اوقاتكم المهم سالفتنا اليوم منقوله طبعاً وهي بوصف الرجال و اللي به يزين الرجل وتكمل به باقي وصوفه ومكمل زين الرجال وموفي طيبها .. هو الحلم وسعة البال خوينا راعي السالفه اللي قال مقولة الرجال شمال والابل جنوب .... قدرت له الظروف ومد يم الجنوب والمقصود بالجنوب لاهل الشمال هو نجد وكل ما كان جنوب منهم ... وفي رحلته لمنطقة الجنوب اعجبه فيهم كل شي واكثر ما اعجبه الابل لان الشمال ابلهم مهوب ازين من ابل اهل الجنوب ورفيقنا اعجبته ابلهم بالحيل بس اللي ما اعجبه فيهم عجلتهم وعدم سعة بالهم وقال مقولته ... الرجال في الشمال والابل في نجد .. والقصه مهيب في مقولته بس انها كانت سبب لشخص سمعه وهو يقولها وأستنكرها واللي سمعه عزم امره انه يشوف وش اقصى اللي يقول الكلام وبغى يتثبت من ساس قوله ومن صحته المهم قام النجدي ودبر له سبب انه يخاوي الشمالي ... وفعلا خاواه ورافقه في طريقه وهو رايح لاهله شمال ويوم اقبلو على ديرة الشمالي ..شافو شيفة الشر شافو في بطن ذاك الشعيب عبد اسود مع مره بيضا ... يعني حره .... وكانو في وضع مخزي وطار الجنوبي وسحب بندقه بي يذبحهم والتفت عليه الشمالي ورده وقال انا شيخ ذا الديره وانت في حكمي ولا تسوي شي.... امش لا يشوفونا.... الجنوبي عقد حاجبه وتنفخت شدوقه وبغى يمشي ويخلي الديره ويرجع واجبره الشمالي لا منتاب رايح الى ان تعشا وجلسه غصب يوم رجع الشيخ بيته وجلس شوي الا مرته جايه تسحب رجليها يوم شافها قالها طمنتي يالرديه للعبد .. يوم جت تكلم قالها شوفي مالك عندي الا حل واحد يا اني اذبحك والا تنفذين اللي ابي .... هي معاد قدامها حيله درت انه كشفها قالت ابشر بالي تبي قال الاوله عندي ضيف سوي العشا ... واذا اجتمعو الرجال ادخلي واطلبيني في وجيه الحاضرين اني اطلقك ..... وانا بقولك ماقلتي القول الا انك تبين واحد ثاني .... وبشرط اني منيب مطلق الا اذا كان الرجال اللي تبينه رجال كفو فارس وشجاع غيره منيب مطلقك ويجي لعيالي اخوان من رجال ردي .... قالت مرته طيب من اختار قال اختاري فلان ... قالت افلان شايب وبيلعوزني وبيظربني على الزله .. رد عليها يارديه منتيب في محل المتشرط جعله يذوقك النار مالك الا توافقين والا ذبحتك .... وافقت يوم اجتمعو الضيفان دخلت المره ونادت رجالها قدام الرجال وقالت دخلت على الله ثم عليك وعلى الحاضرين انك تقول تم ... قال قولة تم مهيب اعز من وجيه الرجال .. تم ..تم ..تم قالت ابيك اطلقني ... هو عاد رد عليها بالرد المتفق عليه .. وقال بطلقك بس اكيد لك غرض في رجال ثاني ان كانه كفو ويستاهل ان عياله يجون اخوان عيالي ابشري .. قالت هي انا ابي فلان وجاي في خاطري...(تمثل الرديه ) والحره ما تشوف احد غير رجلها وتقعد عنده وترى ما بينا الا النقى بس عيني وروحي تبيه ... نقز الرجال اللي اختارته وشاش وقعد يقول وش قلت ياشيخ تشوفني كفو ولا منيب كفو .. يعني الرجال استانس انها عايفه الشيخ وتبيه .. يعني شرب المقلب وكبرت في نفسه وزانت له رد عليه الزوج الا كفو ونعم.... بس ترى فلانه غاليه علي بس ادامها باعتني برجال كفو مثلك ... يشيش بالخبل انا بعد منيب بايع برخيص ومهرها نص حلالك ... رد اخينا في الله تم مهرها يجيك كل ذا السالفه والجنوبي طايره بوهته ويقول الرجال مهبول والا وش قصته قال انا منيب رايح الى ان اعرف وش تالية ذا الرجال المهم يوم خذت عدتها واعرست المره برجلها الجديد .... قام الشيخ ينوه انه يبي يبيع العبد اللي كان مع المراه لانه كان عبده راعي ابله الجنوبي معاد يقول شي بس داري ان فيه شي براس ذا الشمالي المهم زوجته يوم سمعت ان زوجها الاول يبي يبيع العبد نقز ابليس في راسها وقالت لرجلها فلان انهبل بيبيع عبده وهو مافي اخدم ولا احسن منه وقعدت تمدح العبد الى ان وافق رجلها الجديد انه يشتري العبد وبكذا جمع المره الخاينه مع العبد عند الرجال نفسه وهو خابر ان ذا الرجال ذا شكاك يشك في زوله واذا زعل فقد صوابه وحكمته وبعد كم يوم الا الصايح يصيح في بيت الرجال اللي اعرس على مرته .. يوم جوه الا هو ذابح العبد والمره وعقبها درى الجنوبي ان حلم وحكمة الشمالي ابعدت عنه النجاسه ورفعته من زلة الرديه .. وفي نفس الوقت تقاضى لنفسه وعرف الجنوبي اساس قوله يوم قال الرجال في الشمال والابل في الجنوب ان المعنى منها ان الفرق هو في حلم وسعة بال اهل الشمال وعقب هالكلام كله قام الشمالي وعطى الجنوبي نصف المهر اللي جاه في عرس العايبه |
|
|
|
20-05-2006
|
#2 | ||||||||||||||||||||
|
الإدارة
|
حكمة هذا الشيخ وصلت لأهل الجنوب شف كيف القدره جمعت الجنوبي بالشمالي وصار اللي صار امام ناضريهم وحبكها الشمالي ماشاءالله عليه خلها براس الشايب ، بكل هدؤ صحيح شماااالي تسلم اخونا / حسين |
||||||||||||||||||||
|
لن يضرك ان ترد على زميلين او ثلاثه في كل مره تزور المنتدى
رحم الله من أهدى لي قبسا يضيء لي عتمة المكان من حولي
|
|
21-05-2006
|
#3 | |
|
هلاا بالخاال ....
والحكمه اسااس كل شي ... لذلك الله اعز الانسان عن الحيوان بالعقل والتفكير لاهنت على مرورك |
|
|
|
 |
| مواقع النشر (المفضلة) |
| الذين يشاهدون محتوى الموضوع الآن : 2 ( الأعضاء 0 والزوار 2) | |
|
|
إن جميع ماينشر في المنتدى من أشعار ومشاركات ماهي إلا نتاج أفكار تمثل رؤية كاتبها فقط ولا تمثل رأي المنتدى
(رأيت الحر يجتنب المخازي.. ويحميه عن الغدر الوفاء.. فلا والله مافي العيش خيرٌ.. ولا الدنيا إذا ذهب الحياءُ)
المشرف العام
العرض العادي
