الحياة افراح واحزان ودمــوع

الحيــاة افــراح واحــزان ودمــوع
.................................................. ..................

راحت الايام و الخاطر جزوع = والظــروف تسوقنا ونسوقها
‏رحلة الدنيا ذهاب بلا رجوع = تحت الأرض اكثر من اللي فوقها
‏و الحظيظ اللي من الدنيا قنوع = ‏ عاقباً كل الفتن و طروقها
‏والله إني بالخوي ماني قطوع = والعهــــود الوافـية مابوقهــا
‏المحبة سحر والفرقا تلوع = كم عشيقة فارقت معشوقها
‏الحياة تطوّع اللي ما يطوع = مثل تطويع الرعاة لـ نوقها
‏‏والرحى تطحن محاصيل الزروع = والعيون تخيل نوض بروقها
‏الحياة تخلّي النايم يثوع = والأماني من قطف زملوقها
‏الحياة أفراح واحزان ودموع = والأمل نور الحياة و ذوقها
‏تختلف روس الرجال من التبوع = والرجال تبين مــن منطوقها
‏بالسلوم وبالمذاهب والطبوع = دبــرة الخـلّاق في مخلوقـها
وعادة الحاسدمن الطيّب بشوع = يحسده في لقمته لايذوقـهـــا
كثرت عفون العرب من كل نوع = ســـمِّها ببطونها و شــدوقها
مايبونك في سما العزة طلوع = والقوافل ما فيه شي يعوقها
الله أعلم وش ورى عوج الضلوع = السراير في بطن صندوقها
الردى له سوق تنصاه التبوع = و المراجل له أهل في سوقها
النخيل اللي لها تمر و فروع = طيّبة في طلعها وعروقها
والأثل لو له عروق و له جذوع = مابه إلا الدود يرعى عذوقها
الحياة دروس و الفجعة تروع = بكره الأيام تطوي طوقها
السنة مثل الشهر و لّا السبوع = والاوادم مالحّقت ملحوقها
أمس يوم السبت و اليوم الربوع = ماسرع من غيابها إلّا شروقها
أطلب الله في صلاتي وبالخشوع = كان ضاقت بي جميع طروقها
الذنوب كبار و الوالي شفوع = لو وصل ذنب البشر لحلوقها

منقــــول مما راق لي

يسلموا الايادي

محمد سوعان الربيع
تسلم الايادي يالنشمي
وصح السان شاعرها بحجم الكون
تقديري لحضرة جنابك

نقل جميل جدا
صح لسان شاعرها
وتسلم يمينك على النقل لاهنت

هلا والله وكل الغلا بالجميع
اسعدني مروركم الرائع والجميل
تقبلوا خالص الشكر والتقدير .

تسلم الايدي اخوي ابو فهد
ودي لك يسبق ردي