[قصيدة] ماني من اللي تكثر القيل والقال

يـامـا كــــتــــمــــــت الهـــــــــــم

ماني من اللي تكثر القيل والقال=اللي مابين الناس تعمل شتاتي
وماني من اللي تعشق بزود وخبال=‎تشوم نفسي عن طريق الرداتي
اعز نفسي لو علي الزمن مال=‎ما ذلها لو كان فيها مماتي
ولا دق في قلبي من الهم موال=‎عزفت به في ارض قفراء خلاتي
ماودي افرح على القلب عذال=‎ولا يبين اللي كتمته بذاتي
ابعد عن اللي طبعهم طبع الأنذال=‎اللي علي تفرح وتدور هفاتي
ياما كتمت الهم لين انطوى الحال=‎وياما بكيت بليل مابه ضواتي
وياما تجرعت الحزن والصبر طال=وياما عيوني للكرى عايفاتي
يامن يحس بقلب شال العنى شال=‎يامن يداوي همومي الخافياتي
الحزن خيم في ضواحيه والجال=واصبح كما اللي راح ملكه رفاتي
عزاه ياقلب تعنى ولا زال=‎يشوف له في كل يومِ خطاتي
لكن بعد هذا ترى قلبي محال=يبوح باللي داخله من شكاتي
قلبي معودته على طولة البال=‎الصبر والكتمان هذي صفاتي
ولاخير في دنيا توريك غربال=‎ولاخير في ناسِ على الشر تاتي

الشاعرة / الـــــطـــايـــــلـــه