شرهتي عليك يا محمد العين

السلام عليكم ورحمة الله وبركاته ...

بعد غياب طال في كتابة الشعر ... رجعت من جديد ...

وهزني موقف صار لي مع صديق عزيز علي .... إتهمني بشي لم أفعله ... وحتى لو فعلته فانا (( أمون )) ولكن مادري وش اللي غير صديقي علي ...

السالفه ..:

انا عندي موهبة تقليد الأصوات .... وفي يوم من الأيام أتصل فيني خويي محمد وقالي ... مالها داعي وعيب عليك ووش تقصد من حركتك اللي سويتها فيني ....(( المشكله انا لي فتره ماقابلته )) ... قلت عسى ماشر وش فيك يالغالي ؟؟؟
قال انت داق علي من رقم !!! وتقلد علي صوت بنت ؟ قلت له لا وربي مادقيت عليك ولا قلدت عليك ولا شي !!! ولو بقلد عليك كان ضحكت معك في نفس المكالمه وعلمتك انه انا ..

قال وقسم بالله انه انت ... وسكر السماعه في وجهي !!!!!!!!!!!!!!

خذيت الرقم اللي قاله ودقيت ... وردت علي بنت ... وكلمتها وحاولت أفهم منها وش اللي صار إلين تأكت انها ... بنت ... وقلت لها دقي عليه وفهميه السالفه لانه على باله انه انا اللي أقلد عليه ما يدري انك بنت ...


رفضت البنت انها تدق عليه ومن بعدها وجوالها مقفل ... حاولت ان ادخل بعض الأقارب بالموضوع بس الولد معند ومتأكد انه انا اللي كنت أكلمه ...

ومن القهر اللي فيني كتبت هالأبيات ... وفي مطلعها أسب البنت ثم أعاتب خويي ...






دعيت ربي يقسمك نصين
نص بجهنم ونص تسلوابه

وفي كل يوم أصلي ركعتين
مره ادعي عليك ومره اتهجابه

أدعي الله يستجيب وأقول آمين
يصيبك بالشلل والضلوع منصابه

ياللي أنهيت صحبة أعز أثنين
بالفراق المر وأنت السبابه

لعنبو جدك صرت أنا البين
بين نار البعد ومحمد مادرى به

وبين عزة النفس وتعديل الموازين
وياصعب النزول عقب الذرابه

وياشينها لاهقا فيك صاحبك بالشين
ولايرضيه كلامك وأنت تعزوابه

عقب ماكنا للمراجل عنوانين
صرنا للهزاوي نبع وسحابه ؟

شرهتي عليك يا محمد العين
صاحبك باع الخلق وحتى القرابه

لجل تبرير وهو من الغنيين
وأنت بعته لجل جناحين الذبابه

طبعا منقووووول

مع التحفظ لما ذكر الأخ انه كلم الفتاة عشان تكلم خويه
وهذا لا يجوز فليس له الحق انه يكلم بنات المسلمين ويقول كلمي فلان وعلان
ولكن اعجبتني الأبيات فنقلتها

الخالدي
موقف محرج فعلا
ولانك تقول صديق
لذلك اعتب عليك بهذا الاسلوب لان من حق الصديق عليك تجاوز مثل هذه الامور والتسامح لان الاشرار كثير وقد يكون هناك من يحاول التفرقه فلا تدع له الفرصه والا مامعنى الصداقه .
هذي وجة نظري وغيرك المعلم
تحياتي

هذا الزمان به كل شيء الصديق ينقلب عدوك

والأصدقاء بهالزمان ما يعاشرك إلا على شيء

وإذا صاحبت القوم فصحب خيارهم

صدقت يا متفاءل وجهة نظرة على العين والراس

ولد الشمال الحق والله ما قلت

بالفعل الابات جيده

وتسلم على نقلها لنا

ودمت بود

وتسلم انت ايضا لمرورك يا القالش