حايل حايل حايل حايل ثم حايل ثم حايل

22-04-2010

حايل حايل حايل حايل ثم حايل ثم حايل=دار عكفان الشوارب بين حضره والبوادي
دار دار اهل الحمية دار ماضين الفعايل=سعد من هو في حماهم عند صولات الطرادي
دار مروين السلايل لااعتلوا فوق الاصايل=كم عدو من وحمهم حرّم لذات الرقادي
دار عز ودار مجد ودار وافين الخصايل=منبع اسباع ضواري ماكر طيور الهدادي
منبت قروم زحول كارهم كسب النفايل=يوم ولد اللاش خضب لحيته فعل السوادي
هم مدابيس المخاطر هم عناتيت القبايل=دون نقص في القبايل في نحى كل البلادي
كل حي دون حقه لا حتدم صايل وعايل=ما يخلي حقه الا كلف وهدان ربـــــــادي
الخبر شفته بعيني ما سمعته قول قايل=الكرم والجود ميزانه بحايل بازديادي
دار من داسو حياض الموت وارجال الحمايل=دار شجعان تبع الروح في وجه الأعادي
يوم روغات العقول ويوم حومات الهوايل=يوم دورات الليالي يوم قدّاح الزنادي
ساع لا عانق لهيب الزند في خشم الفتايل=لا اشتبك حابل ونابل حزة المت الوكادي
لا بدا صوت الموازر مثل رجاس المخايل=في نهار من مصابه شاب ورع بالمهادي
ارتكو للحمل مثل طويق وازمول الثقايل=واعتلو من فوق قب الخيل واكوار الشدادي
واعذاب اللي يناحيهم ليا صارت صمايل=اشهد انه شال حتفه في رداه وجاك عادي
فاقبلو عذب التحايا يالشغاميم الاوايل=بريح ورد وعطر مسك الفل عنبر ريح كادي
راعي الزلفي بعثها وافيه حد الكمايل=لدار حايل واهل حايل عد ودان الغوادي
حدني شوق الصبابه لأهل حايل جيت حايل=وشاقني حب الأمير الفذ زيزوم الاسادي
العقيد بن الغضنفر باتع وافي الشمايل=حاتمي الكف ريف اللي من الضيم متحادي
ساد في راس المعالي وهو ينبوع الفضايل=ما حد وافى مقامه نافل بين العبادي
سامي الهمة سديد الراي وهاب الجزايل=شيخنا اللي ساع شوفه عاض عن شربي وزادي
فاسعدي يادار حايل بالأبي راع الجمايل=مقرن السيف الصقيل الفينق الشهم الجوادي
فعل هتان المزون وعل رعاف الرفايل=فوق جوك ينثر حقوقه ويخضر كل وادي
يا بلاد هي منى روحي ولا عنها بدايل=هي مرامي هي غرامي هي هوى غاية مرادي
حب حايل واهل حايل صادق مابه دغايل=واضح كالشمس راسي كالشماريخ العوادي
لولا مكة كان اوجه في صلاتي صوب حايل=واسعى بين اجا وسلمى سبعة اشواط اعدادي
قلتها ياهل المعاني بالنوادر والمثايل=دون منّه رغم خشم الحاقد الضد المعادي
سقتناها من ضميري بالشهود وبالدلايل=ومايلام المرء لا منه بذل كل اجتهادي

هذه القصيدة قالها الشاعر ( عبد الله بن عبد العزيز آل غزي )