رثاء ابو علي السكران في زوجته منيره

بسم الله الرحمن الرحيم

السلام عليكم ورحمة الله وبركاته

اسعد الله جميع اوقاتكم بكل خير كلاً حسب وقته

اليوم جايب لكم قصه وقصيده ابو علي يرثي زوجته منيره الذي توفيت بعد معانات من المرض رحمها الله واسكنها جنات النعيم ..

0

0

اليكم القصه


يقول ابو علي ان زوجته جاها مرض وكل يوم اردى من اليوم الثاني وكان عنده ولدين علي وعبدالله واحداً ابو ست سنين وواحداً ابو خمس سنين ويقول مشينا للرياض واستاجر لي بيت بريالين واشيلها على متني واوديها الى الحجار حسين بشارع الرياض واعطاه حبتين وسألته زوجته وش قالك الدكتور قال اعطاني حبتين كل عشر ليال تاكلين وحده ( ايــــــه ) كانها داريه وقلبها معلمها وقالت صابره على ماحكم الله علي الحمد لله على حكمه ويضرب احد السيارات بوري السياره يقول ويطلع مع الباب قاله وين قال ادور الر** قال ر**ك جاك تعال ريوس على الباب هذا وخلك فوق وارقى وافرش فريشها بالحوض يقول خالصه قاضيه ويوم وصلو العصرلديرتهم وينزلها من السياره وتقعد والعيال يلعبون يقول وامرها والمس رجيلها الا بارده يقول عرفت ان الحق داخلها واخذ التعله والمسحات والمفحر واحفر القبر يوم خلصت اجيب ماء واحطه عند القبر يوم خلصت واخذ زماله من احد الجماعه واخذ عشر لبن واحطهن عند القبر وادخل واشيل المغسل والنعش واحطهم بالحجره يقول يوم لمست صدرها لا والله انه يحشرق وقلت تشهدي قالت ( اشهد ان لااله الا الله وان محمد رسول الله ) يقول واطرد العييل روحو شوفو النخل جايه هوا واملو مخابيكم لي من التمروانا ابوكم يقول ابوخرهم يقول واطلع للجيران قلت يابنات الحلال منيره ماتت واليوم ماعندي الا الله ثم انتم وقال وهي تصيح وحده وقالت انا اذا شفت الميت صحت تقفاء يابو علي لا تخليني اغسلها وقالها انا عند الباب اذا صار عليكم مشكل بالتغسيل قولو لي واعلمكم وش تسوون على قوله انه جايب الماء ومصخنه والسدر وكل شي جاهز يقول يوم خذيت حول الساعه قالو تراها قضت يابو علي قلت الله يجزاكم الجنه ويقول واطرد العييل واطلع واكلم الجماعه ونشييلها ونصلي عليها ونحطه على جال القبر واتحزم بغترتي واطبح بالقبر قلت يالله عطوني اياها واعطوني لبنه وطينه لبنه وطينه يوم خصلت قالو على ملة رسول الله وهي تطير الغبره يوم خصلنا الا الشمس يوم غربت واشيل عفشي واروح للبيت


ويبدا بالقصيده

يـاالله المعبـود ياربنـا العالـي =محصي الأعمال باللـوح كاتبهـا
دمعي اللي فوق الأوجـان همّالـي= مثـل نـوّ يـوم هلّـة سحايبهـا
من مريض طايح عنـدي اقبالـي= يوم جاه الحـق روحـه يجاذبهـا
يوم اخـذه الله ونـزل بمنزالـي= وادفنوا خلّـي وغـزوا نصايبهـا
الله يثقّـل موازيـن الأعمـالـي =يوم والي العرش خلّـي يحاسبهـا
يوم قفّوا قلـت يامشتكـى حالـي= مشتكى حالي على اللي يجاوبهـا
يوم جيت الدار وامرحت بلحالـي= والبزور صغار مااكثـر نشايبهـا
قالوا الأبزور لي وش ذا الأزوالي= قلت ماادري ياعلي وش سبايبهـا
قال عبدالله يبي أمه وانـا سالـي= خابر وش صار ماأحسن عجايبها
قلت يـاالله بـدّل الغالـي بغالـي= بدّل الغالـي لنـا مـن قرايبهـا
قالوا الابزور ماعـاد بـه والـي =والقرابـة ماتساعـد قرايبـهـا
هـذي الدنيـا عـذاب وغربالـي =ياكثـر عذابهـا مـن مصايبهـا
ليت خلي قاعـد ولا نبي مالـي= هو طراتي يوم عيني تلـد ابهـا
حسنة الأطبـاع ماتلفـي المالـي= مابعـد دورتهـا مـن صحايبهـا
باليقظ والنوم هـي دايـم قبالـي =وان غفت عيني فقلبي يحس ابها
وعذاب العين مـن ليلهـا طالـي= كـل مايطلـع نجـوم نحسبـهـا
يوم بان الصبح ثـم أذّن التالـي= هل دمع العين واحـرق مذانبهـا
قاموا البزور ثم انثـوى الغالـي= يايبه وين أمنـا يايبـه جبهـا ؟!
مابكيتوا ربـع ماابكيـه ياعيالـي= وامكم والي السماء اليوم طالبهـا
ثم لجّـو بالبكـاء بيتهـم خالـي= والليالـي ماتـرجّـع بغايبـهـا
كبدي اللي حرّها واهـج الصالـي= كن كبـدي بالمناشيـر تشذبهـا
من سبايب قلّـة المـال وعيالـي =والليـالـي فرقتـنـا مخالبـهـا
لو اصوّت للغضي قالـوا اهبالـي= جعل من يلومنـي فـي لهايبهـا
مامثـل ( منيـره) أول ولا تالـي = والصـلاة اعـداد ذاري هبايبهـا

اتمنى انها حازت على رضاكم والسموحه تسان حصل اغلاط او عدم وضوح في القصه


ولكم مني فائق الاحترام والتقدير