بس العرب تستر همومه بالملابس والهدوم

بس العرب تستر همومه بالملابس والهدوم ..

كتم الهواجس يافهد يضغط على القلب الكتوم=وهذا الذي يصدر على روح الجـريـح اعـدامها
وآفة طريق اهل الفخر والمرجله ضعف العزوم=وكـثر الامـاني تـغـرق الـسـابـح بمـوج احلامـها
وزمل الـمحامل لو تزود اثقـالـها تقوى تقوم=وبعض العرب لاسارت الـنـاقـه يعوق خـطامـها
ولو تكشف صدور البشر تلـقـى المغثـه والهموم=وسط القلوب اللي سرت تطرد سراب اوهامها
لو كان لهموم العرب مكتب لتسديد الرسوم=ضاع الورق بالطبع والتغليف قبل اتمامها
بس العرب تستـر غثـاها بالـملابس والهدوم=وتـرمـي مـغـثـــة لـيـلـهـا بكـتـوف حـلـم ايـامـها
ومايرتضي درب الـمهونه والردى غـير الرخوم=اللي يـهاب المرجله لا شاف زود اسوامـها
ومايدرك الطولات من يكره لواهيب السموم=ومن هاب نيران الـظـمـا ماطاق فرض صيامها
واللي زبن عند القسى ذبـاحـة الوضحا الردوم=يلقى الذي يقبس على الشدات سلك ألـغـامها
مثل المرضف وابن هندي وابن ناحل والفغوم=والا فـهـد شـيـخ الـزمـيـل اللي يـضـف ايتامها
وامثالهم بين الشيوخ اللي عن الـذله تشوم=نقـوة شيـوخٍ بالـشـدايد ماتطـيـح عـظـامها
اللي سمـعـنـا طـيـب اهـلـهـم في قديمات العلوم=وتدرا ملامة واحـدن وسط المجـالس لامها
وش عاد لو جور الليالي بالعرب هان القروم=وقـدم على الروس الشوامخ بالعرب خـدامها
اللي يـبي يلـعـب مدافـع مايـبـي قـلـب الهجـوم=ومافـاد عـرش الـمـلك حـافـظـهـا ولا صـدامها
والـحـمـد لـلـي عـزنـا بالـديـن والـقلب الرحوم=وطيب توارث من خوال عـيـالـنـا واعـمـامها
حتى كـروت المرجـله لـو شـالـهـا طـيـرن يحوم=تلقى بنا اللي حازها قبله وشال ارقامها
في ديرة اهل المرجله والطيب وكبار الحلوم=اصغرهم اللي يدرك امـجاد الفخر لارامها
بجبال أجأ وخشوم سلمى ماكر الطير الصروم=ترسخ تواريخ الندى الهاطل رسوخ اهرامها
امجادها قبل الجـيـوش وقـبـل تطويع الخـصـوم=من عهد حـاتـم قـبـل كـسـراها وقبل اروامها
تجمع مفاخر نسل وايل والشهامه بالبقوم=وفزعة عتيبه والشجاعه للعرب في يامها
واسم الـعـروبـه ما يـعـزك بالخصوص وبالعموم=مافاد يثرب واهل يثرب قبل عز اسلامها
لو طال درب الكذب والتزوير لايمكن يدوم=او طهبلت بعض العرب للناس عبر اعلامها
لو تجلبه للسوق ماتلقى الزبون اللي يسوم=مـالـه قـبــول فـي عـقــول الـعــاقـلـه وافـــهـامـها
ولايـنـفـع الـسـهـران مـقـعـاده تحـت نور النجوم=او لـيـلة(ن) بشباط راحت لذته مانامها
كيف اقتلب سير الزمان وصورة الرجل الظلوم=اصبح هو المظلوم عند اللي تصوغ افلامها
اقـدامـنـا بـالـقـاع لـكـن روسـنــا فــوق الـغـيـوم=وارواحنا ماتشـتـكـي ثـقـل الـدهـر لـو ضامها
تشابهت قـاعـة سـفـرنـا وسط صـالات الـقدوم=مـثــل اشـتـبـاه الـعــام هـذا مـع قــديــم اعــوامـها
نمشي تحـت حـر الـقــوايـل بـالـفــيــافـي والحـزوم=وهذي مـقـاديـر تـسـيـر الـنـاس تحـت احـكامـها
ترميك مكتوف الايادي داخل الموج اللطوم=وتعطيك بأمواجه قـسـيـمـه لاجل ربـط حزامـها