الــــــــــــفيتي الـــــــــــمثومنه

الف(ن) انا اللي ذقت كاسات الامرار=دايم وروحي مشعلن وسطها نار
والله لولاني على الظيم صبار=كان انحسبت اليوم من ضمن الاموات
اموات ماذاقوا ولا يوم راحه=كلن قضى عمره يضٍمد جراحه
هذا الزمن لامن بغيت الصراحه=مابه معزًه للذي ينكر الذات
الباء بقلبي خمسة الاف عله=اقلها فرقى وليفن لخله
جرح القدر ياويل قلبن يتله=ماينفع المفجوع كثر التنهاًت
انهت على من فارقت عن عشيره=وانا الذي ماقد تمنيت غيره
دنياي من دونه بعيني فقيره=مالي بعدها غير ترديد الآهآت
التاء ترى بلواك تاتي من اقراب=حسٍب للادنى يافتى ميًة حساب
حذرى تبرهج يمًهم درفة الباب=تدخل عليك ذيابة الغدر عجلات
عجلات خصٍ لامن اصبحت مديون=لاقيل حال فلان من دون في دون
لو انت تاجر لجل مالك يمارون=يحب راسك كل حاقد وشمًات
الثاء ثلاث عقود ياخوك صابر=لاني بحي ولا سكنت المقابر
مجروح لكن فوق هذا مكابر=صارت همومي في فراشي مخدات
مخدات تلعب بي على ماتورًا=غديت في بيتي تقل ولد براً
من يزرع المعروف يجزا بشرًا=وش لي بدنياً كل ابوها مرارات
الجيم جربت الزمن مع صروفه=عزيل حيٍ ماتقدر ظروفه
جرحي كبيرٍ والملا ماتشوفه=اضحك وانا عايش حياتي بماساة
ماساة تكبر لاقفت الناس عني=بوجيههم ماغير اسولف واغني
وفي داخلي جرح الزمان امتثني=اعيش في حال الوزى والمواساة
الحا حسبت اقرب قريبٍ يواسيك=عن حر شمس القيض عطفه يذرٍيك
لقيت ما بالقرب لا ذي ولا ذيك=الا رفيقٍ واثًرت فيه نخوات
نخوات مافادت مع اغنى هل الكون=قرايبٍ للمرجله ما يعرفون
فزعاتهم تذخر لمن هم يحابون=اما القريب بشرعهم جعل ما بات
الخاء خبرت الناس باول شبابي=ياتون للفزعه الى حد بابي
كلٍ يقول ابشر مصابك مصابي=لاوالله الا راح وقت المروات
مروات قفت في زمن والديني=يا سرعها تقلب طباع السنيني
اصبر وتلقى كل شيٍ يبيني=الخافي اعظم يا زمان الندامات
الدال دوٍر من يعاشرك لله=لامن لقيت الاجودي لا تعداه
صادق من اللي يعجبك زين مبداه=تلقاه في وقت الوزى عذبٍ فرات
فرات يروي مايعرف الملوحه=وليا نخيته سلمك كل روحه
يعد جرحك واحدٍ من جروحه=من عادة الفريِس تظهر با الازمات
الذال ذل النفس لاشخاصٍ انذال=اخس من لو عقبوك الف فنجال
لايعجبك من خضًع الراس للمال=من عقب ماهو صقر يدعونه حداة
حداة ماتقدر تصيد الجراده=يرضى بذل ويصبح الذل عاده
الحرمله ماينتفع من حصاده=والحر دايم يفتهم با الاشارات
الراء رفيقك يا فتى من يناصرك=في حزة الشدات حولك يساهرك
الفرق واضح بين الايمان والشرك=الشرك له نارٍ و الايمان جنات
جنات عدنن للذي ينصر الدين= وعد به المولى جزا للمصلين
الي بمكه و الذي باخر الصين = الدين واضح ما يجي بالمراءات
الزاء زماني كيف يصبح عدوي= وانا الذي مقريه هيلي وضوي
عجلٍ علي بفراق واقول توي=مالي رجاء ياكود رب السماوات
سماوات سبعٍ والاراضي مثيله=الوقت مايرحم قلوبٍ عليله
لامتت باكر وحفروا لك نثيله=ثلاثة ايامٍ ومن عقبه اسكات
السين ساقتني ظروفي لحساد=قدامي احبابٍ وفي خلفي اضداد
خلوني اسهر ماتهنيت برقاد=مايعرفون ان المواجع كثيرات
كثيرات في وقتٍ شربنا مراره=مات الوفاء مغبون في وسط داره
هم يحسبون ان المغثه شطاره=النذل نذل ولو عكس وجهه مراة
الشين شفت بماضي العمر الاهوال=عاشرت ناس كثار من عدة اجيال
لو هو بخيل يعز من يملك المال=ولوهو حقير يكافئونه بزيجات
زيجات ياخذ من جماله يهوٍل=وليا خذاها عشرته ما تطوٍل
يزتها ببليس خله تسوًل=عافت ولد عمه على شان شيكات
الصاد صار المال معبود للناس=لا واحسافه صار للطيب مقياس
راع الشهامه ينعتونه بالافلاس=والاجودي خلوه للضحك مدعاة
مدعاة للنكته فقيرٍ مسيكين=لو فيه خير اصبح رصيده ملايين
لاتقردون البنت والراتب الفين=على ثلاث تزوج البنت بسكات
الضاد ضرتني طباعن خذيته=عن والدي ورثتها ما شريته
زود الثقه باالناس ليتي نسيته=كان استرحت ولاتحملت ويلات
ويلات ويلاتي من اللي تصافيه=تعطيه سرك باكمله واثقٍ فيه
ماتدري انه سفلةٍ ما يلفٍيه=الاشبيهٍ له والاثنين شبهات
الطاء طلبتك (بر) في والدينك=عند الولي ملزوم تافي بدينك
من قبل تولد كلهم محترينك=اظن ماتحتاج تذكير ووصاة
وصاة طاعتهم فرضها مسوٍيك=احذر ابليس يدروشك ثم يغويك
لا فارقوا تلقاك تصفق باياديك=يقل توفيقك تعيش بمتاهات
الظاء ظروفك لاتقوله لغيرك=ولاتشاور شخص مايستشيرك
تراه يشمت بك عسى الله يجيرك=لو صب لك من حالي الهرج كاسات
كاسات حتى تختفي عن عيونه=يمسك قفاك وكلهم يسمعونه
وليا وصلك الهرج يهتز كونه=يبدا يحلٍف باالذي نزًل ايات
العين عمرك خله يصير قسمين=دنياك عشها بس لاتغفل الدين
ولاتشرك برب البشر يا مسيكين=تصلاك نار ولا ورى الشرك منجاة
منجاة حظ اللي ذنوبه خفيفه=الله يغفر والاوادم ضعيفه
وحنا تحت عطفه ولطفه وكيفه=عالم نوايا الخلق لو هن خفيات
الغين غير كل طبعٍ يضرك=شاور هل التقوى ولك مايسرك
تر الرضى باالزيف لاطال شرًك=اجزم ونفذ ماتفيد المراواة
مراواة مافادت كثيرٍ من الناس=الذنب له غفار والتوبه اقياس
احذر يصيبك باخر العمر وسواس=تراك تصبح عند عدوانك حكاة
الفاء فوادك ماهو دايم دليلك=العقل عن درب السماجه يشيلك
ولا تمهزا كان قالوا دعي لك=تر الله المعبود قبال دعوات
دعوات خله لك ولا تجعله فيك=وتر دعوة المظلوم ماهي بتخطيك
حصٍن فوادك وادع ربك ينجٍيك=خلك مع اللي ينصرك باالملمات
القاف (قل العرف) ياناس بلوى=لاجاك شخص يقول انا طير شلوى
وهو من اللي بعدهم عنك سلوى=كلٍ بعقله راضين لو هو فتات
فتات حنضل جنٍبته البهيمه=لو تاكله ما عاد باتت سليمه
من وهق المغرور سوًى جريمه=مريض نفس ولا تداويه وصفات
الكاف كني عايشٍ لي مئة عام=ماتت بعيني كل الاحرف والارقام
اشوف نفسي بس في بعض الاحلام=اما مع الحاضر فلالي علاقات
علاقات تجمعني مع طباع الاجداد=ماني مع ايام المهازل والاحقاد
حنا رضعنا الحب والوصل بمهاد=مالي على وقتٍ نعيشه حسوفات
اللام لملمت الجراح وتوكلت=عن نخوة الهافين ياخوك بطلت
كنت اتعشم بس يومي تأملت=لقيت ما با الفار طاهر ونجسات
نجسات لو غسلت بماءٍ وصابون=مايقربونه كل ناسٍ يصلون
نصيحتي يااللي لقصدي تعرفون=حذرى معاشر من طبايعه عفنات
الميم منهوا ما يومٍن معاشه=وهو شباب مولعٍ با الطياشه
يجيه يوم يبيع حتى فراشه=الوقت ما يرحم اذا تهمله فات
فات وتعدى وانت واقف تراعيه=تظن يرجع ليه مستهترٍ فيه
اغنم زمانك يا فتى لاتخليه=من قبل ماتشكي ولا تنفع شكاة
النون نم مرتاح لاوفيت دينك=مع الاله ومرضيٍ والدينك
لاكلت حق ولانجاس بيدينك=ولا ظلمت ولا تعمدت زلات
زلات كل الخلق عنده ذنوبه=مكتوبةٍ عند الولي ومحسوبه
يفوز دايم من يخاف العقوبه=ومن يتكل يغفر له الله عثرات
الهاء هوى قلبي وغاية مراده=اشوف من ياناس طوًل بعاده
في جنة الفردوس عضدي وساده=للي طباعه دايم الدوم عذبات
عذبات عذباتٍ قراحٍ زلالي=فقدتها وامسيت هايم لحالي
لافارقك في تالي العمر غالي=اصبر يعل الصبر تكفير سيًات
الواو وجدي مايعانيه غيري=والله مافارق حبيبي نظيري
قدام عيني كل مااقعد واسيري=طيفه يهيٍض داخل الصدر عبرات
عبرات ضاقت به جميع المخاليق=حيثه تفتٍق بسرة القلب تفتيق
عسا الاله يفرٍج الكرب والضيق=واذوق عقب الحزن طعم المسرات
الياء يريدالله والناس يرضون=هو ربنا العالي وهو فاطر الكون
امره نفذ في حكمة الكاف والنون=وله رحمةٍ فاقت على كل رحمات
رحمات ربٍ نزًل ايات قرآن=على الحبيب المصطفى خير انسان
وصلاة ربي عد مارفع الاذان=على نبي الخلق راع الشفاعات

اللهم صلى على نبينا محمد وعلى آله وصحبه أجمعين
بــ شاعرنا العذب القدير أحمد الجريفاني
الأيادي يالنشمي
أتشــــــــرف بأن أكون أول المعانقين لها ، أنشهد ألفيه من العيار الثقيل يحسب لها الف حساب ؟ أقف استاذي ويقف قلمي عاجزاً عن الرد عليها وأعتذر عن تقصيري وشح قلمي بالرد؟ وأقول هنيئاً لنا بشخصك الكريم وفي قلمك النير الذي نفتخر فيه فاضلي ولنا الشرف بمتابعته
صح السانك مدد بلا عدد
:bar :
:bnm :
خالص التحايا لسمو شخصك النبيل

معلقه ايها الشاعر الكبير / احمد الجريفاني

لاغرابه ابد ان يكون هذا الشعر منبعه انت

صح قلبك وسلم راسك ايها العملاق الداهيه

ابو فراس

لاأنشل منك عضو يالشامخ ولاحرمنا الله ابداعك

تقبل تحياتي

:ffff :
الله الله الله الله الله الله الله الله الله
الله عليك ايه المحيط الهادر لله درك يالغالي كفو الله يالجريفاني
لاخلاولاعدم شعرك درر قمة الشعر قمة الابداع
سسسسسسسسسسسسسسسسسنايدي والله
بيض الله وجهك امتعتنا هذ المساء
بصوت وصدى الشعر الاصيل ، قصيده جزله من شاعر جزل وفحل
تقبل مروري قصيدتك ابلغ من التعليق يالغالي
لك سمو تقديري لشخصك الكريم
حفظك الله بحفظه

هلا وغلا باخوي الغالي والشاعر الكبير احمد الجريفاني صح لسانك اخوي احمد ولاغرابه ان ياتي كل هذا الابداع من شاعر معروف لدى الجميع بحجم احمد الجريفاني اخوي الغالي احمد هذه المعلقه تذكرني بقصيدة قديمه مادري والله منهيله اللي يقول فيها الفن اولف من كلامن نظيفي
ودموع عيني فوق خدي ذريفي
يالايمي في حب ذاك الوليفي
الى اخره
لله درك ياخوي احمد اشبعتنا شعرا وامتعتنا الله يطول عمرك على الطاعه

اللهم صلِ وسلم على سيدنا محمد
صح لسانك وسلم بنانك
كل الشكر

صح قلبك وصح السانك مليار
وسلم راسك ايها العملاق الداهيه الشاعر احمد الجريفاني
اشبعتنا وأرويتنا بهذه المعلقة الجريحه
تقبل مروري

ياقوها حيل عمي احمد الجريفاني
سلم راسك ودام شامخاً
صح السانك

اللهم صلى وسلم على نبينا محمد وعلى آله وصحبه أجمعين
الشاعر / أحمد الجريفاني
صح لسانك ملايين ابداع بمعنى الكلمات - ذوق - ورُقي - وتميز - لاهنت يابعدي
أتمنـــى لــــك التوفيـــق حفظـــك ربـــــي ورعــــــــــــاك.
دمت مبدعاً ودام قلمك النير الجميل.
تقبل فائق أطيب التحايا والتقدير،،،

اللهم صلى وسلم على نبينا محمد وعلى آله وصحبه أجمعين
الشاعر الكبير احمد الجريفاني
شامخ ياجدي انت
صح السانك بحجم السماء