15-11-2007
|
#1 | |
|
مناقب قبيلة شمر بالشهادات المحايده((الجزء الاول))
((مناقب قبيلة شمر بشهادات محايده)) اقصد في هذا الموضوع هو ماقاله الشـعراء من غير قبـيلة شـمـر في مدحها وذكر مناقبها التي اشتـهرت لدى البعيد والقريب لما تحـمله هذه القبيله من تاريخ حـافل بالفخـر والمجد والذي يدعوا للفخر والحمد لله ولكون شهادة المحايد لها وقع خاص بالنفس فقد احـببت التطرق لبعض هذه الشهادات الصادقه00 ولايعني ذلك ان فخرنا ومجدنا لايتم الا بهذه الشهاده لا لان تاريخنا معروف بها وبغـيرها وقبلها وبعدها ولكنها من باب الاستئناس فقط000 (1)-ولعلي ابدأ بقصيدة عبدالله بن سبيل الباهلي راعي نفي الشاعر الفحل والذي اشتهر بالغزل الرقيق وكانوا يطلبون منه ان يطرق مواضيع اخرى غير الغزل وكان يرفض الى ان سيطر محمد العبدالله الرشيد المهاد على كامل نجد فخرج ابن سبيل على جماعته فقال وين اللي يبوني اترك الغزل قالوا موجودين فقال:
بديت بذكر الله على كل ماطرا=مجيب الدعا معطي العطايا الجزايل وتركت الهوى ماعاد بي طاري الهوى=ولا قايل بخيار قوم مثايل ولا عاد لي في باقي الاشيا حسايف=أكود مشاهد راس شيخ بحايل محمد سلطان العرب موهب الذهب=هو خير من تافد إليه القبايل تشد النضا من كل فج تجي له=كما تاتي البيت الشريف الرحايل من جاه يلقى رغبة في جنابه=ومن راح مغلول يزيده غلايل سهل على الدانين صعب على العدى=لكن عيونه صلو جمر الشعايل فهيم عديم يرهب القلب عارفه=لكنه يقرا الغيب وافي الخصايل ولاشي غير الخمس ماهوب عالمه=مضى من سياساته وبخصه دلايل يشوف عيان ما بدا إلا صدورها=ويشوف من المقفي نحور الاوايل كن الاماني كلهن وسـط كـفه=ولا على مضمون تيل بسايل الى فتل بالاسباب ناقضه=على كل حال ولا لفتله محايل ولا كيل له قيل قصر دون قيمته=وتزيد مكاييله على كل كايل جضور من العليا جزوع من الخنا=جزوع رثوع الى اوجس الشد مايل من ريعته يوم الملـيـداء تمايلوا=واهل القصيم وبان هـرج الصمايل ذبح روسهم والحي منهم بحبسه=خذيل ذليل بالردا والفشايل وملك دارهم ومدارهم يوم دارهم=واللي شرد منهم رمى له حبايل يصيدن حذرات الوحوش حبايله=ومصايده ما تدرك الا الجلايل ومثل رثعته بمطير ماهي خفيه=نهار تشيب أطفال سمر الجدايل على ثرب يوم الله نوى بذهابهم=تمارح العزبات بين النزايل عقب مبانيهم وغاوى حـلالـهم=وباقي الشرايد يطلبونه زمايل هذا جزاهم يوم يدخل عقولهم=على مثل عمل ابليس ماهوب ضايل أطاعوا من لاسرهم يوم ضرهم=غشوم يشوم عن القريب الموايل كثيرات رثعاته قليل سليمها=إلى طنا ما يستمع للعذايل والى بغى امر ما يداري عواقبه=يجي له دجران من الغيظ شايل إلى شال غيظه يرذي الخيل والنضا=تطول بواريده بعيد المخايل فيما يغيظ الغيظ إلا على العدى=بيوم يغط الشمس قبو الدبايل تضع منه ذات الحمل والمرضع اذهلت=لكن فوق اكبودهن الملايل على شفايا فرق البين شملهم=على راي من لا هوب عنهم مسايل إلى خرب الله شملهم ثم خربه=يصبح وسيع البال والغيظ زايل أخذ مال ما حساب يضبط حسابه=وجوز عزبان وطلق حلايل مثل ما مضى ماهيب غر فعايله=ولا خير باللي مامضى له فعايل يهاوي ليال الشبط مع كثحة الشتا=ومن كثحة الجوزا يهاوي القوايل إلى عثا بالشرق والغرب واليمن=وطاعوا وراعوا عقب ذبح وسحايل تجاحرت حضره وبدوه تخامروا=كل يحسب ويش له من خمايل ومرهم وحذرهم وهادوا وهيدوا=وصغوا له وزكوا له بليا فضايل تعدى هقاويهم وضيََع هجوسهم=يبي عادته على اخباث الدغايل لكن يوحى له من الله اذا عــدا=يعرف مصارعهم وماهوب نايل ناس ينفعهم وناس يضرهم=حليم بحال وحال عبث وعايل إلى عال مثل الموت مامنه فرَه=والى عطى يعطي المهار الاصايل صخي مناله كلمته من لسانه=مردَه على الكتَاب يغني قبايل عساي من ألي ما يقصر بحقهم=عنيت لفضله والمشاحي قلايل شفاتي إلى جيت اتحدث بمدته=قدَام أجاويد العرب والرذايل ولا رايح من عنده الا بواجبه=وعاني لفضله مثل راعي العدايل نفاد لماله مثل ماقال والده=عسانا ما نعتاض غيره بدايل ولا فرد يوم قلط الزاد قافر=عليها ظهور الخور والسمن سايل وضواين جوف المتوع متقاضبه=كنَه مع الشاوي عطين الثمايل على ابيار عوهات وساع مجاذبه=ولايشربون إلا بشط ومحايل أعدد خصال الجود وازريت أعدها=إثر ما يحسب جوده إلا الهبايل شجاع تورخ بالأماكن فعايله=كما ورخوا للسلف الأول فعايل وهو خاتم الشيخـان لا شيخ بعده=إشارة سميَه نزِِلت بالرسايل قول ابن سبيل (نفاد لماله مثل ماقال والده)يقصد بذلك قصيدة عبدالله بن رشيد التي يقول:
لي ديرة ما به حذا البرد والجوع=لولاي عـفـيـتـه بضرب الهنادي حـمـيـتـهـا مـن كـل دوار مطموع=وحـي ٍ نـصـبحهم وحـي ٍ نهادي القلب مـصـمـوع وبالكف قاطوع=ماهي حـكـايا رقصتك يابو هادي ولاحد يطيع إلا له السير ممروع=وإلا بضرب مـصـقـلات الهنادي فـعـال نــو الخـيـر نجزاه بنفوع=من مالنا نكـثــر علـيـه العــدادي والشر فـعـالـه نجـازيـه بجـمـوع=وزير ٍ إليا جا الفجر حسه ينادي أخو عـبـيـد إلـيـا هبا كل مسبوع=أسهر إليا نامـت عـيـون السرادي أحـاول الـدنـيـا بداخل ومـطـلوع=بالمال وإلا مـرهـفـات الحــدادي كم خـيـر ٍ عـاني لنا شاكي الجوع=حـاديـه مـن لـوعـات الأيام حادي لـو مـانـعـرفـه راح مـنـا بمطموع=من راس مال ٍ نجـمـعـه للنـفـادي (2)-الشاعر محمد العبدالله القاضي راعي عنيزه شاعر شعراء نجد الذي تربع على صدارة الشعراء في نجد في وقته قال في مدح طلال العبدالله الرشيد قصيدته الشهيره:
ياليت حـكـمـك دايـمـن يالرشيدي=ماكان يوخـذ زملـنا من وراء الباب طلال لو قلبـك حجـر أو حديـدي=أمداه من حامي وطيس الرغى ذاب شبيت فـي نجـدٍ بنـار الوقيـدي=واحرقت فيه اعداك واذيت الاصحاب واكسيت ثوب مـلـكك عـزٍ جديـدي=وسليت حد عداك ياعـز الاقـراب بحربٍ وضربٍ شـاب منه الوليـدي=مـالـوم من عـاداك يـومٍ ولا شـاب تلقى الخطوب إباس ليـثٍ شديـدي=وعزايمٍ عـزت عـلى عمرو وشهـاب أحـيـيـت شجاعة خالد بـن الوليـدي=وانسيت قالات لابي زيـد وذيـاب ولو كان عـمـرو بن مـعـد الزبيـدي=حي لجا بحماك يازاكـي الانسـاب حـيـثـك وفـيٍ بـالوعـد والوعــيـدي=غـيـثٍ وليـثٍ حـضـرمـي وغـلاب ساروا له الحكـام مثـل الـعـبيـدي=واسقى سراج العز من دم الارقـاب بالغت في مدحـه ولاصـح بـيـدي=ولا احصي خصال عجزت كل حساب يقصر عنه فـهـمـي وينـفــذ نشيـدي=ومن الثنا لي خاطـرٍ مابعـد طـاب يا اولاد عمـه كاسـبـيـن الحـمـيـدي=شمر ينابيع الصخا حصن الاطـلاب ياما هــفـا بايمـانـهـم مـن عـقـيــدي=ولاجنبوا عن قالةٍ خـوف صـلاب قـومٍ إلى ركـبـوا على حـرد الإيـدي=شـفت القلايـع كالجراذيـن هـراب وصلوا على الـشـافع بيوم الوعيـدي=محمد المخــتـار وآلـه والأصحـاب وكثير من الرواة يضعون مطلعها البيت الثاني والصحيح ان هذا مطلعها الحقيقي احفظها هكذا من الطفوله ولكن بعض المؤلفين الذين يصورون حكم الرشيد بأنه مافيه امان اضطروا لحذف البيت الذي يرد دعواهم فهو اكبر شهاده على الامان الذي نعموا به خلال امارة الامير طلال رحمه الله0000 (3)-الشاعر عبدالله السنيدي من اهالي رياض الخبراء ولكنه رحل الى حائل وسكنها على وقت محمد المهاد فأحب حائل واهلها واحبوه وعندما ضعف الحكم على وقت امارة عيال حمود العبيد ارسل قصيده الى حمود السبهان في المدينه المنوره ليحضر سعود ابوخشم ولد الجنازه لتأميره بدلا من عيال حمود العبيد وكان سعود صغيرا وهرب به خاله حمود السبهان لكي لايقتلوه عيال حمود الرشيد فقال السنيدي ينخاه يجي:
يالله ياسماع صوت المهتدي =جنح الظلام وخاشعن لك يسجدي نرجـيـك مانـرجي اله غيرك=يالفرد ياللي بالـسـمـاء متوحدي تجبر عزاء دارٍ تجض أركانها =حـنت من الفرقى حنين مفردي من عقب ماجب الهنوف أحرابها =عنها الضديد من المهابة مبعدي جاها الهزل والـذل من حكامها =حـنـشـل هـتـيـم بالزبارة تلبدي أنا برجوى فالق الحب والنوى =عالم دبيب النمل بالليل الاسودي يرجع على تالي الديار بعزنا =فهود الزراج أهل السيوف الوردي ياحمود لو تسمع حـنـيـن أجبالها =ماقـمـت يـوم بالـمـديـنـة مفردي صاحت لك السمراء ورمان الحمر =وخشوم جلدية وضلع ابا عدي وخشوم سلمى والـعـنود بصوتها =تقول ويـن حمود سـتر الخردي ياحمود حائل والـعـلياء تنتظر =منك المــدد وشراع سقاي الودي انشر وقدامك مـفـاتيح الفرج =ولياجيت ديار الـشـمـريين فترشدي سـم وتوجـه يــم ضلـعـان الجبل =ثم اعتصم بالله وانت مساعدي أنصب ولد عـبـدالعزيز المتعب =سبع الضواري لضواري يسندي من بين ابوه وخاله الطـيـب ظهر =مقراض صـم الحـديـد المبردي وعادات ولد الحر ليا نيش اللحم =مـن مـس روحة يـم ربه تصعدي ولد الذي يوم جت مراهيش العدى =وأشـتـب نارٍ بالصريف تتوقدي جاهـم من الـغـربي سلايل متعب =نجـم على رؤس الفراعين ارجدي وقام يتـدخـل بالـدويـش مبارك =باغين عن الـبـوقـات به يتجـودي مـن هـومة الـمـيـدان ينخى سابقه =وأقفت بعـمـره كالغزال تتكددي قال العوض يابن الحميدي روسنا =عن حـس زجـر الليث ادن لبلدي وان جيت ذاك الصوب خذ مني عهد=علي جـدران الكـويـت تـشـيدي مـانـا بللـسـبـع اللـطـوم مـقـابل=باغـيـه لي عـقب القـوامـه سـيدي هذا ولد هاذاك وماغاب احـتـضر=ماخلف الضاري فـهـو منه ازودي عجل بولد الحـضـف يـسـكن دارنا=من خوف طـماعن علينا يعـتـدي واظن ولد الحـضـف لاناش اللحـم=مـن مـس روحه يــم ربه تصعدي وأنا مـن الـجـيـران حـالـي حالهم =بالـنـار والا بالجــنـان مخـلـدي دارن لنا بـيـن الشعيب ووساره =وبـيـن الـهـلالـيـة وأبان الاسودي اقبس من اطرافه زعاطير الظـفر=عـيـت من اطواب العساكر تهتدي مار عـفـناه لاجل مـدلـهـين الناقة =أهـل حـمـى ذروات يــم الاجردي ياما فـقـدهـم مـن ضعيفٍ وعايب =ومن شايبٍ على العـصاء يـتـوجدي مار زمـل تـرد ارقـابهـا لـنحورها =وتـنـتـف اوباره عـساها تجحـدي مـاتـاخـذ الحـــقان مـن قـبـيـــلـة =شـرهٍ عـلـى راع البساط الاحمدي والله مانـصـبـر بـلاكــم سـاعـه=ولااحـدن على العوشق يحب المرقدي (4)-الشاعر رويشد بن زقيحان الحربي وذلك عندما ضاف اناسا لم يقوموا بواجبه ثم خرج منهم ووجد بيتا لواحد من شمر(اسلمي)فوجد كرامته كامله كما هي عاداتنا العربيه الاصيله فقال:
شـمـر مطيرة الشعاف الطـنـايـا=بهم على كل الـمـخـالـيـق نـوفي اهل الصحون الشدق ماهي نسايا=والا نجـيـش مـثـل لمس الحيوفي انـشـد هـل العيرات لاجوا ونايا=من اللي يهلي قبل عرف الضيوفي ودلالـهـم فـي كل واجــب ركـايا=ماغـيــبــن عن ضيفهم لا يشوفي فـنـجـالـهـن يغدي عماس الخوايا=ماهو تـنـيــول صـبـهـم له وقوفي وركابـهـم مـن كـثـر الادلا حفايا=كـم ذود مـصلاح غدوا به شعوفي يامـا خـذوا مـن مـغـترات الرعايا=عوض اهـلـهـن صفقهم بالكفوفي والله رب الـعـرش جــزل الـعـطايا=ما قـلـتـهـا طـمـاع ابي معلوفي (5)-الشاعر زيد الخشيم امير قفار في وقته من بني خالد وعندما غضب عليه طلال العبدالله الرشيد وعزله عن الاماره اتي يعتذر للامير بقصيدته الرائعه الحكيمه وهي:
قال الذي ولـف من القيل منجور=لو كان قبله ناشـف القيل غـاير عذرن لـمن يعـلـم خفى كل مستور=سـمً لـمـن يـدي خـبـر كل زاير ياشيخ انا اشكي لك لياضكن الجور=الفكر يامسطور الاولاد حاير تزوم عـبـرات الـضـماير من الزور=العفو كني بلجت الصدر فاير غديت مثل اللي عن الفرق مكسور=وضيعت من شدة طناك البصاير ياشيخ يا مروي شـبـا كل مشذور=ياللي تعــــدد دقـــها والكــباير يامضهر الونـدات مـن كل صابور=ياشيخ يا حامي عـقـاب الجراير من تـالـي عـنـدك نـصـيبي بحادور=ومن اولـن يافـرز الأبطال ثاير ناشن منك ياعرب الأجـداد شابور=هـنـديـتـن ملحه على العظم جاير ما احـسـب زلاتي ولو كلهن عور=ماترفـعـونـه للـعـدى بالـقـشـاير لياصرت عندك محدثن بالخلاء زور=عن الناس تبدوها علي بالسراير انتـــه بحــل وبتــحيـــات ماجـــور=وبحـقـته لو كل ماجان صاير ياشيخ انا منكـــم ليا نفــخت الصور=ماهي بقالات العمل والسواير حجلن برجل وكاسر الـعظم مجـبور=وبزمرتك لو ذقت منك المصاير ماهو قصيدن بالـقراطـيـس مـسـطور=يهذر ولايذكر على حول داير قول بقــــول وبالغ القــول ماثــور=وعندك يصير لكل قولن نظاير اخترت اســد الـهـيش عن قنيت الثور=اللي له اقوام النواحي هجاير ونصيت عن جو الخـنـى راس زابور=حيدن تعانقه السحاب السواير حاسه وداسه وقــدر الشر بشرور=وساطه وخاطه عن جميع الدواير من طلعته صرنا بأمـانن عن الجور=سحنا ورحنا عقب ضيق الحصاير بحر الـــموده من بنـــانيه مفـــجور=يشرب على جاريه سم العشاير معطي جياد الخيل مع شـمـخ الخور=وماجاب نزال البحر والجــزاير فات الشتاء والشـبـط مافاخت الكور=والصيف زل وداخلن بالصواير وبالـقـيـض وردهــن على كل مخبور=لاحيث انه هون سطار الفطاير كم حاكمن باســلاف خلي على الدور=حاضاه مع سبع الخلاء كل طاير ياشـيــخ ياللي والفــك كـــل محرور=يامـعـطـبن كل العداء بالشطاير كانك جـفـيـتـن ياحـمــى جـانب السور=محـدن يـعـزن ياحجى كل ناير وان صح بالـدنـيـا لنا مـنــك منظور=فا انا بـعـزن ياعـزيـز القصاير عساك عــدل وزايـد الـعـمر بعصور=ولاني بحال مدبـشـيـن الخضاير وخلاف ذا يامـرهـقـن كل مـسـطور=ياريف هــتـاش الليالي الـشـراير دنـيـاك لا لـقـت لـك الـوجـه بـنحور=شيـنـه يـزيـن ولو عمن البصاير وإذا ادبـرت مايـنـفـع الـراي والـشور=ولو ملـيـت من الحرس كل عاير لا قـدر امــرن مـاجـلـى كل مـحـــذور=الـهـم زود وماقـضـى الله صاير وصـلـوا عـلـى اللي سـار بالهدي مأمور=الهاشـمـي راع الحرم والمناير (6)-الشاعر محمد العوني الشهير وهو من اهالي القصيم واقترب للرشيد في فترة حكمهم الاخيره وله عدة قصائد ولكني سأختار لكم هذه القصيده والتي كانت في اواخر امارة الرشيد فقال:
عـزي لقلـبٍ كــل مــا طــرف اللـيـل =علـيـه صـــارن الـدقـايـق جـلايــل واعتاظ عن طيـب الكـرى بالتعاليـل =بـافـكـار واذكـــار وقـــول وقـايــل والعيـن كـن ابـمـوقـهـا يــدرج المـيـل =عيت تطيق النوم مـن فـور جايـل على بني عـمـي اسنـادي عـن الميـل =نطـاحـة الكـايـد اكـبــار الحـمـايـل اقـفـوا كـمـا مــزنٍ ثقـيـل المخايـيـل =من زاعج الغربي حدر لـه شعايـل شمـر مقابيـس الـمـنـايـا هــل الخـيـل =عصمـان الاريـا مقحميـن الدبـايـل يا دار ويـن أهـل المهـار المشاويـل =اهـل الـنـزول الـلـي تـعـز النـزايـل بكيتهـم يـوم ارتـكـى فـوقـي الشـيـل =وذكرتهـم يـو اقبـل الـضـد صـايـل وصاح الصيـاح وطـوحـن الـهـلاهيـل =وهلت ادمـوع معكرشـات الجدايـل وقلت ابشرن مـا دام بالعمـر تمـهيـل =مـا دام مـا رزت عليـنـا النضـايـل لا تبكـيـن الـوحـدة قِــل الرجـاجـيـل =مــا دام عـيـن الله عليـنـا تـخـايـل وظهرت أنا باسم العـصـاة المشاكيـل =لـو هــم قلـيـل يـدركـون الجمـايـل هـم حاصـلـي لا كملـنّـا المحاصـيـل =غوش الجبل خـزنـي غـلامين حايـل باعـوا عزيـز العمـر دون المضاليـل =وحمـوا حماهـا مقدمـيـن الفعـايـل قالوا عليهم قلت يزجوا اهـل الخـيـل =وقهرتهـم غـصــب ووردوا غـلايـل واذنـيـت هـجـنٍ يقـربـن المـحـاويـل =هــوج هجاهـيـج اهـجـاف نحـايـل عليـكـم يـطـرب قـلــوب المـراسـيـل =خفـقـات رفـقـات صــلاب جـلايــل قـلايـص عـوص صعاصـع شمالـيـل =من سـلـسـلة نسل السبـاق السلايـل الصبـح مـدن كنـهـن جـولـة الـريـل =رفـيـحٍ عـلـت من فوقها ارجال حايل وصبح اربعٍ تلفـي نـزول كمـا الليـل =شمّـر إليـا عــدت فــروع القبـايـل أدنــى بـالادنـى خبـروهـم بتفـصـيـل =لا تسفهـون اصفارهـم والجمـايـل ولازم إليـا شـافـوا اركــاب مقـابـيـل =تلزمهم النشدات عـن سكـن حايـل قولـوا لهـم يـا مقـبـليـن عـلـى خـيـل =نـجـد واهلـهـا يطـلـبـون الاوايـــل جونا هـل الـعـارض جموع كما الليـل =يـبـغـون دار هـابـهـا كـــل عـايــل وجـرى لـمـنـا يومٍ يـا طـب بـه الشيـل =يطيـح مـا تشنـى عليهـا الرحـايـل واضفـا علـى عـكـاش مـثــل الهـمـال =يليـا طـول مـا حنـا لهـم بـالاوايـل ويـن الطنايـا ؟ ويـن شرابـة الهيـل =وين الرجال اللـي تـشـيـل الثقايـل ويـن السيوف اللي نعـدل بهـا الميـل =ويـن الرماح اللي تــرد كـل عايـل ويـن النشامـا والـعـصـاة المفالـيـل =وجميع من ضربـه تـضيـع الدلايـل نشرب بهـم صافـي القـراح الشخـاليل =يلوننزل بهم غصب على كل طايل تذكرتهـم يـوم ارتـدم فـوقـي الشـيـل =ونخيتهـم يـوم اقبـل الضـد صايـل غلبـا تــرى بلدانـكـم لبـسـت النـيـل =تنخى الرجـال المكرميـن الاصايـل تنخـى اهـل العـادة كــرام الاسابـيـل =يوم التعـازي والدخـن لـه صلايـل قلته وانا معكـم علـى العـدل والميـل =لـعـل مـــا نـعـتـاظ عـنـكـم بـدايــل تمـت وصلـوا عــد وبــل المخـايـيـل =علـى نـبـي الـحـق مــا زال زايــل (7)-الشاعر فجحان الفراوي المطيري من فحول الشعراء وقد نصح امير بريده ابن مهنا بعدم دخول حرب مع الامير محمد العبدالله الرشيد ولكنه خالف شوره وكانت النتيجه هزيمته في المليداء فقال فجحان يلومه على عدم طاعته لشوره ومادحا الرشيد وشمر فقال:
عز الله انا يابوصالح نهيناك=ولا ربح قبلك واحد قـد عصاني طاوعت من لا سر عينك ودهواك=واليوم حطك في محـل الهواني طاوعت شور ابليس وابليس غواك=وطاوعت شور مشرهـفين الاذاني مانته ردي مير ان سيفك بيسراك=جوك الرشيد سـيـوفهم باليماني ماهو ردا بك مير ماهم حلاياك=صبيح ما ظـلـعـه يشادي لاباني واجهت مسط الروس ماهي حكاياك=مثل الحدج في ناعـمــات المثاني زامل فكاك الريق وانته تعشاك=كم مـصـعـب خلوه جاء مرجعاني يالله ياللي كل عين ترجـاك=انك ترجـي باذريـن الحساني لالمهم بأمر الولي مجـرى الادراك=تحط مـيـتـهم شهيد الجناني بغيت اعاون ذا وهـذا على ذاك=ولو ماحـضـرته في يدي في لساني ذكرت نو الخـير من ذا وذولاك=وهودت عن رأي الـعرب في مكاني طبعا بقي الكثير والكثير جدا ولكني سوف اجعلها في الجزء الثاني من هذا الموضوع والذي اتمنى من الاخوه التعليق والتعديل لكل غلط او وهم يظهر فيه لعموم الفائده والسلام000 ابن غسلان البقعاوي000 |
|
جرح العرب للي من الجرح داواه=واللي من جروح الليالي يشيله
ان ماوصل للي وصل له وساواه=حط الافاعي بالخفى في شليله 
|
|
15-11-2007
|
#7 | |
|
الاخوه والاخوات اعضاء منتدانا الكريم000
لقد اطلعت على تعليقاتكم الكريمه وتشرفت بمروركم النبيل يالعزوه00 اشكركم جزيل الشكر على مشاعركم الكريمه والغاليه00 تحياتي العطره لكم000 الراوي |
|
|
جرح العرب للي من الجرح داواه=واللي من جروح الليالي يشيله
ان ماوصل للي وصل له وساواه=حط الافاعي بالخفى في شليله
|
|
21-11-2007
|
#9 | |
|
ودلالهم في كل واجب ركايا
ماغيبن عن ضيفهم لا يشوفي فنجالهن يغدي عماس الخوايا ماهو تنيول صبهم له وقوفي وركابهم من كثر الادلا حفايا كم ذود مصلاح غدوا به شعوفي ياما خذوا من مغترات الرعايا عوض اهلهن صفقهم بالكفوفي الله الله الله رووعــــــــــــــه الله يعطيــــــــــك الف عآآآآآآآآآآآآآآفيه على هالطـــــــرح لاهنــــــــــــت.. |
|
|
يَ رب أمطرني بفرحً إلى يوم يبعثون .. !
|
|
21-11-2007
|
#10 | |
|
الإدارة
|
تسلم يالراوي ابن غسلان
الله لايهينك وبيض الله وجهك تحياتي لك |
|
|
لن يضرك ان ترد على زميلين او ثلاثه في كل مره تزور المنتدى
رحم الله من أهدى لي قبسا يضيء لي عتمة المكان من حولي
|
 |
| مواقع النشر (المفضلة) |
| الذين يشاهدون محتوى الموضوع الآن : 1 ( الأعضاء 0 والزوار 1) | |
|
|
إن جميع ماينشر في المنتدى من أشعار ومشاركات ماهي إلا نتاج أفكار تمثل رؤية كاتبها فقط ولا تمثل رأي المنتدى
(رأيت الحر يجتنب المخازي.. ويحميه عن الغدر الوفاء.. فلا والله مافي العيش خيرٌ.. ولا الدنيا إذا ذهب الحياءُ)
المشرف العام
العرض العادي
