ديوان الشاعر / عباس بن عسل

نصيحة ..

	ســـلام مــن قـــلبٍ بحـبه صــفا لك =قلبٍ عطــوف لك يحبك ويغليك واهديك من قلبي نصيحة عسا لك =فيهــا يــا بو بندر علومٍ تقديك إحفــظ لدينــك يا الســـنافي وبالـــك= تمشي مع الغاوين وبليس يغويك افطــن لدينــك تــره غاية منا لـك = هــو الذي من ظلمة النار ينجيك واقصر على قول الجــماعة مقــــالـك = ولا تبتــدع فتوى وبالنار ترديك وليا حفظت الديــن تحفــظ جــــلالك = ولحــاجتك رب البــرية يمشــيك حفظك اركان الديــن فيها الرضـا لــك = من الواحد اللي يوم تحتاج يعطيك شــهادة إن اللــه ربــك ولا لــك =غيــره يضــرك أو يفيدك ويهديك وتشــهد شــهادة حــق مـن بعد ذلك = محمـد رسول الله ما فيه تشكيك وقيــم الصــلاة وزك يالذيــب مالـــك = وصوم رمضان وحج مكة إذا بيك وايصــل لرحمك من جفاك وصفا لك =واحــذر تجافي من تشوفه مجافيك وشيبانك أبدا يا الفتى من عــيالك =وعقوقهم في ظلمة النار يرديك وجـارك تريــه أقربهــم الـلي دنا لــــــــك=أوصيك فيه أوصيك واوصيك واوصيك وخويك انجز حــاجته قبــل حــالك =وصــديقك ارفـا زلــةٍ زلها فيك واحـذر تقــدم واحــد مــن عيــالك=شوف الحقد في عين خيه ويكفيك واذخر لشخصٍ لا عجزت ارتكا لك =تجيبــــه حميــاه لــو مــا يدانيــك وافخر بقومك تــر عدالــه عـــدالك =طيبه لك وما به ردا صايرٍ فيك وعيـال عمـك لا مــن الله هــدالك=أخوانك اللي حين عجزك تقويك ولا تعــالى بعــد ما كثر مــالك =ولا تخــلي رفعــة الجــاه تعميك خــلك تحــط النــاس كلــه ببـــالك=وليا حقرت أحــدٍ يبان الردا فيك واحفظ لهمك وسط قلبك لحالك=خله بقلبك لا تشمت معاديك واذا الولي ساتر ردايــا عمالك=خله بستره لا الردايا ترديك كتمك لســرك يا الســــنافي جمــالك =ولا شاع سرك ما خويٍ يخاويك ولام العيــال احــذر تـــزود دلالـك=تكسر قــراراتك ولا همت تثنيك وبالك تخبرها بما قد جــرالك=لابـد من يـومٍ تكشف لخافيك واحذر تهين اللي غلاها صفالك=اللي عـن دروب الرذيلـة تنسيك تصون بيتك في قفاك وقبــالك= بنت الرجال اللي نسبهم يكفيك واعلم ترا مالــك يكثــر عيــالك=واغلـب عيال العجز لجله تداريك ذولا بني عمك وذولا خــوالك=لا زاد مالك كلهم من عوانيك ومالك عوين إن قل في يوم مالك =ويا كثــر ما تسـمع تقلع وما بيك وكانك عدو مالك عدوين مالك=يخفـي عدوينـك ويظهر محبيك والطيب ما يشرى بمالي ومـالك =الطيــب رب الطيب للطيب يهديك والطيب يسلك له صعيب المسالك=وليـا فعلـت الطيَب الطيب يلفيك