ديوان / الشاعر محمد سوعان الربيع

اللي ظلمني

	اللــي ظلمنــي جعـــل الايـــام تبـلاه = ويـا علهــا تمضي عــزايـر حياتــه جعـــل المصـايـب بالليــالـي تـــولاّه = يصبح ويمسي والبـلا وسـط ذاتــه جعــل الفضـايح تـحتـريـه وتمـثنـاه = والستر جعلـه عنـه يكشف عبـاتـه وعسـاه متهــومً بـلا ذنـب ســوّاه = صيــدً ســهــــل ياعــل تكثــر رمـاتـه وقـضيتـه بيـديـن ظـــــلاّم واطـغــاه = وعســـــاه مــا يلقــى دليـل لبـراتـه جعـله فقيـر الحـال والـدّيـن يقـفـــاه = من عقب ما اقفــت هيبته مع غناتـه هــذا يصــدّ وذاك جـنب ولا اعطـاه = والبعـض مـنهـم قـال ولّ ابشـماتـه جعـله امحــرّول مــا يعـينـنه اعـظـاه = ومن شاف زوله قال ماقشر صفاته وجعلـه ضريـرً مـا يـدل ويـن ما طاه = بيـضً عيــونـه والمقـدي عصـاتـه جعلـه ســقيم الحـال ما حصـل ادواه = وعســاه مـا يلقـى عــلاج لنجـاتـه وجـعـله وحيــد ومــيتـيـنـن دنيـــاه = مالــه وريــثً كــود ســــبعه بنـاتـه كل ظــالـمً لابــد مـا يُكشـف اغـطـاه = وللناس عيبــه ينتقـل فـي مـراتــه وعسى تطـول ايـام عمـره ومنـهـاه = ويشـوف ذلّــه قبـل يـاتـي ممـاتــه يشــوف غـبنـه والقـهـر والمعــانـاه = ولابـد ما بـه من يسوّي أســواتـه وان مـات مــا احـدً قال حـنا فقـدناه = وعليـه من صلّـى يُشـك بصــلاتــه

بقلمــــــي ,,,,,,,,

شكري لبو غازي شريف النوايا

......................................

استاذنا الكريــم ابــو غـازي
مدير منتـدى نشامى شــمر الموقــر
الســـــــــــــلام عليكم ورحمـــة الله وبركـاتــــه
اتقدم اليك ومن خلالك لجميع منتسبي منتدى شمر من اداره ومراقبه واعضاء
احيي الجميع في هذا الصرح الشامخ لكم الشكر الجزيل والعرفان الصادق
على ثقتكم الغاليه والتي هي عندي اعـز واعظم ما يكون ويشهد الله لاتثمن بثمن ,
اشكركم على منحي درع التميز والذي ترك بنفسي كبير الاثـر والاعتزاز والفخر
وتعجز الكلمات والجمل ان تعبر عن مدى تقديري ومودتي واعتزازي بهذا التكريم المعنوي الكبير والذي جاء من اخوةً لي اعزاء على قلبي في هذا المنتدى الغالي
اسمحوا لي بهذه الابيات المتواضعه والتى جاءت وليدة وقتها اتمنى ان تحوز على اعجابكم جميعا .

شكري لبو غازي شريف النوايا

	شـــكري وتــقديــري وجــلّ امــتنانــي = للقــرم ابــو غـــازي ســليـل الطنــايـــا شـــكراً علــى درعً وصــلني وجــانــي = هـديـــةً تـســـوّى جـميـــع الهــــدايـــا مــن منتـــدى ربـــعً غـــوالـي لفــانـي = شــمّر هــل الطــولات ســـتر الصـبـايــا وافعــالهــم فــي كُـل وقــت ومــــكانـي = ريـف الخـوي والجــار واهــل العطــايـا تكـريمكـــم لي كان صـك وظمـانـي = فـخـــرً يـنـومـســــني بـكـل النــحــايـــا مــن منـتدى تـــزدان فيـــه المعــانـي = اروي ظـمـا الظـاميــن واروي ظـمـايـا ذي فــرصــةً مــا جـــاتلـي بـالتـمـاني = شــــفي ورغبــة خـاطــري مـع هــوايـا فيهــا الفخـــر يا اخوان اول وثـــانــي = وتـكــريمـكـــم بـالحيـــل بـــدد عنـــايـــا وعسـاني احظــى بالجمــالـه عســاني = واللــه يــوفـقـنــي وازيــــد ابـــوفــايـــا ومـن كُــل زلّـــه يـالعظيـــم اتحمـانـي = واتيّســـر امـــري بـالصبـــاح ومســـايــا واكسـب رضى الاجواد طول الزماني = قبـــل ً تـــداركنـــي اســـــهـوم المنــايــا وابشــــكـر اللـــي وّدنــي ما نســـاني = شــكري لبو غـــازي شــــريف النـــوايـا

بقلمـــي ...............

(( ابـــي اتمنـــى ))
اهداء متواضع الى اخــوي وصديقي العـزيـز والغــالي
محمد بن مبــارك بن ظــلاّم الشــراري ,,,, ابوسلطان
حيث قررت من خلال امنيتي ان اخالف اعراف السفر المتبع اما بسياره ام بطياره
وهنا قررت السفر من خلال حرّه فتيه من ركاب الشرارات انهج عليها عبر الصحاري
مع كل شعيب ومهميه اوادي . اليكم تلك الابيات اتمنى ان لايلومني احد او ينتقدني
وبالتالي هي امنيه وادري صعبه لكن ......؟

ابي اتمنى

	ابـي اتمنـى والتمــاني صعيبــات = وادري فلا ياتن بكيــف اعتقـــادي ابــي استعيـد ايام هفــن قــديمات = شفي ومنوة خــاطـري والمـــرادي ودي بسجه بالفجوج الوســــيعات = مع كل شـــعيب ومهمــهيـه اوادي مشوار نجلابه عن الصدر ضيقات = اللي لجت فـي ضامـري والفــوادي ودي بحمــرا تقطـع الـدوّ بســكات = من هجن قـومً يظهــدون الاعـــادي حُــرّه فـتيــه من اركاب الشـرارات = ولا فـوقهـا الا الميركه والشــدادي والخــرج يزهنّـه سـفايف جـديــدات = مــتخـالـطن بيـاضهـن بالســوادي غشــــيمـةً مـا ضــريّت للســباقـــات = تجفل ليا سمعت حساس المنـادي عنيــدةً واعنــادهـا شــــين نــــوبـات = ولولا الـرسن ماتنقـوي والـقيادي ماحاصــروهــا في شــبوك وبركسات = ولا طببوها سـوق هجـن المزادي مــا كـــنهـا الا قــــايــــــدً للجميــلات = ولاّ هنـوفً زيـنـهــا حيــل بـــادي انهــج عليـهــا مـا بغيــت الـونيــتـات = وانـا على المعبـود تــم اعتمــادي مسـراي مـن عمّـــان قبـل الصلــوات = اليّا غـفـت عين البليــد الـربــادي مابين حــــرّه والســهــول الوســيعات = من حـد ضلعـان الاشـاقف وغـادي شـــرقي حـديثـه والهـدف بالقـــريــات = نبـي الـذي مشحاه هـاك البــلادي مـــلفاي ابــن ظـــلاّم زبــــن الـونيـات = وكلن فابــو سلطان يمدح وشـادي فـي مجلســـه نلقــى دلالً عــــذيــــات = رسـلان ولاّ مــن بــلاد ابغــــدادي فنجالهــن يـغـدي عــن الراس دوخـات = اشــقر وريـح الهيــل يجـلا انكادي رصـد لهــن جهــــده وحمـر الـريـالات = ولا يوم ابن ظـلاّم كان اقتـصــادي قـولـة هـــلا وحـييت فــي كـل الاوقـات = ينطـق بها للضيف صبح وهجـادي هــذا مـحمــــد مــا نـقــوله دعــايــات = حـــرً يصيـد النـادره مـــا يصـادي الجــود طــبعــه والـــوفـــا والمــروات = ماله شــبيـه الا طيــور الهـــدادي علمـه جـذبني وامتلك جـــوهــر الـذات = والشـوق يـدفع خطـوتي باجتهادي لاشــك ابـو سلطـان حــاز الشهـــــادات = ومن كُــل طيّـب وقـعت بـاعتـمادي الضيـف يشــهــد والخــوّي والقصيرات = وكلمة نعـــــم لاحـل ذكــره اتــزادي مــن لابـــةً يــوم الليــالـــي عســــيرات = فــوق الاصايـل ينطحـــون الاعـادي فهــود الــزراج اولاد مكلــب شـــرارات = من لابــة العـــزام علـــمً وكــــادي شـــموخهــم يشـــدي اجبـال الســراوات = فـــي ظفهـــم تلقى الـدفا والبـرادي هــــذا الوكــاد ولا بهـــــرجــي خيــالات = والحق ماحـــدً عنـه صـار احـتيادي شــوف النشــامــا منهجـــي والمســرات = شـــوقي لهم والله مـاهــوب عــادي حــب البـــدو واضعــونهـــم لــه ملــذات = واروم انــا عـاداتـهــم والســــوادي هــذا طمــوحــــي والهــــدف والميـــولات = ولاني بحـال اللي يـريـد انـتـقــادي ويـامـا ويـامـا قــلـــت انـا واحلـــــــولات = مسـتجــديً ولاّ على غيـــر جـادي ويــا لايـمــي بـــالله خـــــل المـــلامــــات = وانــا ترى يــاصاح مانـيـب غـادي

بقلمــــــــــي ,,,,,,,,,

همســـــة وفــــــــــاااا .............

همســـــة وفــــــــــــاااا ,,,,,

	مــن عاصمــة نجد المسمّـى ســـريـنـا=لارض الكــويت الغاليـه دار الاحــرار ومن ارض الرياض اللــي نحبــه نــوينـا= نمشـــي علــى جيــبً تضـــرى للاســـفـار مــن ديــرةً فــي غيـــرها مـــارضـيـنا= وحكامـهـــا آل ســــعود وافيــــن الاشــــبار للديـــره اللــي فـــي كـــنفهـــا ربـيـنــا=دار الصبــاح اخــوان مـريـــم هــــل الكـــار ولــو نـبـتـعـد عـن ارضـهـا مـا نسـيـنـا=الا اذا الابــــــرار ينســـــــــــون الاذكــــار نشــكر ونــذكــر فضــلهــا مــا حـيـيـنـا=ولا يجحــد المـعــروف يا كــــود الاقــــــذار ومــن ينـكـــر المعــــروف نـــذل ولـعيـنـا= ولا لـــه مـــع الـوافيــن حشــمه ومــقــدار يــا كـــويت حـبــك بـــالضمــاير دفـيـنـــا= والشـــــاهــد اللــي قسّـــم ايـــام الاعـمــار وحنــا الثمـن لاخــلاصــنا مــا احـتـريـنـا= هــذي اســلوم اجــدودنــا عبـــر الادهـــار شــوق ووفـــا يــدفــعبـنــا والحـنـيـنـــا=حـيث الــوفـــا مــابـه مـعـيـبــه ومــعـيـــار مـن عاصمـة نجــد المسمـى ســريـنـا =لارض الكـــويـت الغـاليــه دار الاحــــرار

بقلمــــــــــــي ............

احرص على الواجب

	ان طاح حظك وان تردت عـزايمّـك = مــا ينفعـك تــاريـخ جَــــدّ وقــبيــــله يكـثر من يلومـك وتكثـر شـــتايمّـك = وكـــلً يجنــب منــزلك مــا يجيــــله الناس تُظهــر مع جـديـدك قدايمّـك = وشـــــعاد لـو خــالـك افـعــوله نبيـله اليّا افتخـرت بلابتـك خـاب لايمّــك = لكن : عليـــــك اتــزيــد حـجـم النفيـله احرص على الواجب وخلّه يلازمّك = واحرص على كــل غــانمـه والجميله اســعا لهـا ورب المخاليق يكـرمّـك = وابعـد عـن دروب الــردا والفشــــيله وابليس حــذرا لايـغـرك ويـوهمّــك = وكــم واحــدً خــــاواه ضيّـــع دليـــله علـى التكبــر والتـعــالـي يعـــــلمّـك = ويـهـديــك للــدروب الخطـا والرذيـله ومن مغفرة رب المخاليـق يحـرمّـك = وحتـى احتـرامك بيـن ربـعـك يـزيـله

بقلمـــــــــي ...........

ديــــن الاســــــــــــــــلام

	حسبي على اللي شوهوا دين الاسـلام = بــاوهـــامهــم وارهــابهـم و الجــــرايــــم تســتـروا بـالـديــن هـافـيــن الاذمــام = وتـلـــوذوا خلـــف اللحــــى والعمـــــايــــم تـفننــوا بـاجــــرامهـم هـــاك الاقـزام = ذبـــــح الاوادم زي ذبــــــح البـهــــايـــــم مــا يـفعلــونه تـقشـعـر منـه الاجسام = رعــب وهـلـــع والخـــوف خـلـــوه دايــــم عــادوبـنـــا لايــام تـقـديـس الاصــنام = لايــــام تـعــليـــق الــحـــرز والتـمــــايــــم على الـظــلالــه والتخـلف والاوهــام = انـتـشــرت الـفـتـنــه بـظلـــم وظــــــلايــــم في جسـم الامــه تنتشـر مثل الاورام = حيــث التـــوالـــي والـخــواتـــــم وخـــايـــم عصــر الجهاله طــل فـي راسه وقام = وعشــنا بـجـــوّه وارتـضـيـنــــا الشـــتـايــم جــتــنــا حـــثالات الاوادم والاقـــوام = وصـــرنــا لـهـم بـاوطــانـنـا كــالغـنـــــايـــم فرس ويـهـود وروس والباقي اروام = ومـعهـم غــــراب البيـــن يبــــرا وحــــايــم جـونا بـخــدعه دوخت بـعـض الآنـام = وتـقبـلتــهـــا عقــــول بـعـض الغشـــــايـــم تســتـروا باســـما المســلمين الاكـرام = اهــــــل المبـــادي والقيّــــم والعــزايـــــم والديـن مــنهم ياهــل العـرف يـنـضـام = منهـــم بـــري ديـــنً يــديـــن الجـــرايـــم وتـرى الهدف ماهـوب ابغـداد والشــام = حبــلـه على الجــــرار والجــــو غـــايـــم ولايـنـتهي بـديـــار غـــانـــم وغنـــــام = كــل شـــــي تبيـّن مـــانقـــوله تهـــــايـــم ارض اليمن رفـرف على بـلاد الاهـرام = لسـرت وبنـي غــازي صقــور وحـمــايــم الـحـلم اكــبر قــالــوا الــــدرب قـــــدّام = اصحـوا لـهـــم ولاّ غـــدينـا قســـــايــــم مبطــي وناب الـداب يـدفــق بالاســمـام = قـصـوا ارويـسـه واردعـــوا كـــل لايـــم ضميــركـــم لايمـوت ايضـــا ولا يـنــام = اصحوا لـها يكفي اخضـــوع وهـــــزايــم اعتـصمــوا بحبـل الـذي ســنّ الاســلام = اللـي يـــديــن الشــــعـوذه والنـمـــايــــم

بـقـلـمـي

....... عبدالله اللي ما نسيناه لله ........

((ان العين لتدمع وان القلب ليحزن وإننا على فراقك يا ابا متعب لمحزونين ))

عبدالله اللي ما نسيناه لله

	ليا غاب نجـمً صار نجـم ابمحلـه= هـــذا مسـار ملــوكنا عـبـر الازمـان حكام ما يرضون ضيـــم ومـذلـه = من العهد الاول لين مقرن وسليمان واليـوم مــات اللي نحب ونجلّه= راح وتــرك بقلــوبنـا هــم واحــزان عبــداللّـه اللــي ما نسـيناه لله = وشـعاد لـو لـفـوه فـي بيـض الاكـفان وشـعاد لو دنياه تطـوي سـجلّه= ذكــراه بقلــوب المـلايـيـن تـــزدان بقلـوبـنا مثـــل الجبــال المطلـه=ما دامـنا حـيـيـن .. حـيً ولـه شـــان عـزيـز يبقى فـي رحيلـه وحـلـه= واكـبر دلايــلً يــوم تنعــاه الاوطــان كلــن عليــه اليــوم دمعـه يهله= النـاس مـن شـــتى العقــايـد والاديـان واســـتغفر الله يمكن الكون كله= ابـدى حــداده واعلـن الحـزن اعـــلان وجعل ابو متعب الجنان المظله = مـع الفهـد واخـويـه نايـف وســـــطان وعنـه يتجــاوز خــالقــه كل زله= ويحظــى بعفـو ومغـفـرة رب الاكــوان

بقلمــــي ......

حــاولـــت لكـــن .......؟

ابيــات مــن عبــق القـديــم المتجــــدد

حاولت لكن ....؟

	طنشـت زلـــة صـــــاحـبـــي ليــن مـلـيــت = ومن شان حشمة شخص تحشم قبـايـل واغظيـت انـا وابـطيـب صبــري تـحـليــت = وجــاملـــت مــن لا يـسـتحـق الجمــايـل اهـو ايتســـلا ؟ ويـحسـب انـي تســــليــت = وانـا علـى شـــانـه شــعبـت الـرحــايـــل ولا اذكــر انـــي يــوم فـي حـقـه اخـطيــت = الا ... وبــدلـــت الجـــفــا بــالجمــــايـــل حــاولــت اعــدل مــايــل الـراي وازريــت = وبـذلــت انـا جـهــدي وكُـل الـوســـــايــل تـقـــديــر مـاهــو خــوف جـيتـه ورديــت = مـن شــــان يبقـى حبـل الاوداد طــايـــل لكــن تمـادا .. يحسب ان خــافقـي مـيــت = وارضــى علـى نفســـي بعيـب وفشــايــل كـــرامتـــي مـــا شــــيعـــت بـالتــوابيــت = لا و الــذي انـشــى حقـــوق الـمخــايـــل ومــن راس يـنبـوع الـمعــرّفـه تــرويـت = ولا ســــرت بـــدروب الـــردا والـرذايــــل هـــــذا انــا دايــــم إن اقبـلــت واقـفيـــت = ولاانكـرت انــا ســلـم العــرب والحمــايــل عـوايــدً يــفـخـــرهـــا الـحـــي والميـــت = وانــا عـلــــى مــا قلــــت عـنــدي دلايــــل

بـقـلـمــــــــــــي ...............

........ كـــــلام بعـض العـــــرب .......... ومجــــاراة بــــن عبــــار ...

كلام بعض العرب // ومجــاراة بن عبـــار

	كــلام بعض العــرب مــؤلــم ويــزعـجنـي = وانــا على شان بـعـض النـاس طـنشـته هــرجه يســـمّ الضمـاير ثــم يـخــرجـنـي = عـن طـور صبري وانـا طنشـت دردشـته بعض الحكـي يـزعـل ويجـرح ويحـرجـني = وجــرح الكـرامـه ابــد ما يـوم عـايشـته هـذا الـذي عـن بعـض الازوال هـججــنـي = ولـو كان مـنهم غـزيـر الرزق ماحشـته خـــوة ردي النســـب مـا يـوم تبهـجـنــي = وابـغـض حضـور الردي واكره مناقشـته مــا ابيـه لو هــو على الغـارب يحـججني = ولـو كـان عمري مـن الانـذال طـرشــتـه مـــاابيــه انـا حــزة اســقامـي يعـالجنــي = ولا اذكـر انــي بـضيـق الـوقــت بـلشـتـه النفس عيّـت معــه تمشـــي وتـدمـجنـي = هــذا الــوكــاد اللـــي بالاشــعار كـيّشــتـه ورزقــي علــى الله ولا شــكّ يخـالـجنـي = وايمــان نفســي علـى مـا صـار جيشــتـه يــاعــل ربــي مـــع الابـرار يــدرجــني = هـــذا الامـــل دايــــم ولا يـــوم همشــتــه

.بـقلمـــي ........
وهذه الابيات مجـــاراة من الاخ والشـــاعر الاديــب : عبــدالله بــن عبــــار .

أسبـاب مـا هيّض شعـوري وهيجني = المـقصـد الـلي يا محـمـد تـنـاوشـتـه
الـلّاش مـا ودي لـك الـلـه يهـرجني = والبس لا تـأمنـه كـان أنـت هارشـتـه
ومن كـان قصده يا محمد يبرهجني=كـم واحـد حـاول خـداعـي وخـيشـتـه
والخايـب الـلي بالسوالف تـولـجـني = مـا يـوم شتـمتـه بـعـرضه ولا نشتـه
واللي مـرامه بحكي الـزور يسمجني = الـعـيـب يـوجـد بجـيـبـه كـان فتشته
والحـمـد لـلـه خبيث الطبع يسهجني=والفـار ما يطهـر ولـو كـان روشـتـه
من باع حظّه قليل الفود وش يجـني = دنيـاك هـذي كـما المقناص والكشـته
مـن يتبـع العـدل ما قـادوه للسجـني=والطـيّب يسامـح ولـو كـان هـاوشــته
من خـلقـت الدنيا بهـا جاني ومجني = والخبل يطعـن صاحبه كان حـرشـته
مبطي تلاشى زمان الخيل والهجني = اليوم عصرالذي يسحب طـرف بشـته

عبدالله بن عبار .....

الله تلطف في ضعيفك من الناس

يالله تلطف في ضعيفك من الناس

	مـــادري عــلام النـاس مـاتــرحـــم النــاس = وكلـــن علــى الثـانـي يحــدّ الســنـونــي مـات الضميـر وشــيعــوا مـعـه الاحـسـاس = وبـالوقت هــذا قـلّ مـــن ..يســـــتحـونـي انـفقــدت الـرحـمـــه وكـلـــن لـهــــا داس = وشــفنـا الخـداع اليـــوم مـــن كُــل لــونـي قـسوة قـلوب الناس تجـلب غـثــا اليــــأس = وتجلــب الـى العقــل الســـليـم الجــنـونــي حتــى شــقيقـك عنــك مــا يــرفــع البــاس = لاشـــيمــه ولا قلــب عنـــــده حـنــــونـــي هـذا الشـقيق وكيـف تشـره علـــى النـاس = شـــــيً يشـــيّب مــن غـثـــاه العيــــونــــي هـذي حـقـايـق تــوجـــع القلــب والـــراس = شــــيً مـعـيـــب وخــيـبــــةً للظنــــونــي شــــيً يـضـيـّـق بـالخـــواطـــر والانـفــاس = ومـــع القـهــر يـجلــب عـليــك الـغبــونــي و يـالله تلـطــف فــي ضـعيـفك مـن النــاس = وانــت المـــلاذ اللـــي لـعبــــده يـعـــونـــي يـا مـغنـيً مـا احببـت مـن عقــب الافـــلاس = وكــل شـــي بـمـــرك يـالـهـــي يكـــونــي

بقلمـــــــــــــي ...............