قصيدة مؤثرة جداً .. للشاعر ابراهيم الدحيم الرديعان

قصيدة مؤثرة جداً .. للشاعر ابراهيم الدحيم الرديعان من ((مدينة حائل)) وجهها لأبنه عرفان .. من مميزاتها :

التلقائية، والبساطة، وعدم التكلف يجسدها شعور الوالد تجاه أبنه .. أترككم مع القصيدة :

يقول

يالله ياللي يسجد الكل لرضاك = الدايم الله دون ريب(ن) وتشكيك
أنت المعين وخاب منهو تناساك= نشكرك ولا نحصي فضايل حسانيك
أرفع يديني بالخفا وا ترجاك = منك المدد لا ضيقن المساليك
وقتي صعيب وناظري دوم سفاك = لا تسئلن طالع لوجهي ويكفيك
دن القلم ياديب وصفحات الأبواك = أسئل وأنا لك حاضر الفكر وأمليك
عرفان مندوبي بخطي تنصاك= شعور منهو مخلص(ن) لك ويغليك
عرفان وا وجدي على قرب لاماك= يدق قلبي مثل روس السنابيك
ووجد السجين اللي انسجن خلف شباك = بابه حديد وغلقن الشبابيك
في ديرة(ن) لغواتهم مثل الأتراك = مامن صديق ولا رفيق(ن) يحاكيك
عرفان وا قلبي شكى حرّ فرقاك = عرفان لا تنسى خوي(ن) مخاويك
وكم مرة(ن) للبر ناديت حياك = بالبر بفراشي عن البرد أغطيك
وأن كان عندك شك طالع لماطاك = أقدام رجلي يشبهن لمواطيك
أقصر اخطى رجلي على قدر ممشاك = أقصر اخطى رجلي على شان أباريك
وكم مرة(ن) تطلب وأنا أقولك هاك= ناخذ على الراتب لزومك ونعطيك
وكم مرة(ن) قايست رجلك على حذاك = كنادر الكوره على قياس رجليك
عرفان لاتنسى زمان(ن) تعداك = يوم أنت فوق المتن لاصحت أراضيك
أسهر اليا قالوا لي النوم ماجاك= واليا رقدت أحلم وبالأسم أناديك
وأراجع الدكتور وأخذ لك دواك= أخذ قياس الملعقه منه وأعطيك
وأشري لك المطلوب وأدور أرضاك= وأخذ من الد كان شكليت مع كيك
وكم مرة(ن) حبيت خشمك وعلباك = واليا ضحكت أضحك ويبكين مبكيك
وكم ليلة(ن) نضفي على جسمك أغطاك = خدام لك مثل العبيد المماليك
هذا كلام اللي سهر لجل يرعاك = (لفتة نظر) وأطلب عسى الله يخليك
وكان الشعور اللي كتبناه يخفاك = أسئل عنه خالك ترى الخال ينبيك
لولاك ماخط القلم حرف لولاك = وعز الله أني في حياتي مساويك
ماقلتها تشهير ولا قصدي أشناك = موجز كلامي أطلب عسى الله يهديك
وصلاة ربي عد ما ينبت الراك = وعداد مانشري عروق المساويك
على الرسول اللي نفى دين الإشراك = وعداد من طاف بالحرم وقال لبيك

صح لسان من قالها

قصيدة صادقة ومؤلمة جدا
شكرا لك يا الغالي

صح لسان شاعرها وسلمت يد ناقلها
تحياني

القدير بندر الشمري
تسلم اياديك على نقل هذه الباذخه لنا وابن رديعان من عمالقة الشعراء ونتمنى جميع قصائده تنقل لنا يعلم الله
سلم بنانك وصح السان شاعرها الاستاذ ابراهيم الدحيم الرديعان
خالص التحايا لك

نقل من العيار الثقيل وقصيدة تسوى ذهب

تسلم على النقل اخي الكريم / بندر الشمري

طرح جميل وانتقاء اجمل الف شكر لك ولاهنت

تقبل كل الود

اللهم صـلِ وسـلم عـلى نبينا محمد وعـلى آلهِ وصحبه أجمعين
الأخ العزيز / بندر الشمري
تسلم يمينك يالغالي على هالنقل الجميل جداً وصح لسان شاعرها.
تقبل فائق أطيب تحياتي،،،

صح لسان الشاعر وامدالله في عمره على الطاعة ومشكوراخوي بندرعلى نقل هذه الرائعة لاهنت

شكر لكم والله يعافيكم جميعا